Fejk na ANT: «Cichanoŭskija atrymali dolu ŭ kampanii siamji Babaryki zadoŭha da vybaraŭ». Hladzim dakumienty
14 krasavika telekanał ANT pakazaŭ u efiry čarhovaje «rasśledavańnie» — ab tym, što siamja Cichanoŭskich mieła dolu ŭ adnym ź biznesaŭ siamji Babaryki. A heta, maŭlaŭ, śviedčyć pra toje, što padziei leta 2020 hoda — nie vypadkovaść.
Padčas rehistracyi Śviatłany Cichanoŭskaj kandydatam u prezidenty staršynia Centrvybarkama Lidzija Jarmošyna doŭha abmiarkoŭvała z kalehami, ci ŭsie pradastaŭlenyja dakumienty adpaviadajuć rečaisnaści.
Siarod inšaha Jarmošyna skazała, što Cichanoŭskaja nibyta nie ŭkazała svaju dolu ŭ niejkaj kampanii «Chajv Prodžekt». Vyhladała, Śviatłana nie nadta razumieła, pra što idzie havorka. Jana pačała tłumačyć, što jaje firma ŭsio adno likvidoŭvajecca, tamu, maŭlaŭ, jaje i nie ŭkazvali… Adnak u vyniku jaje ŭsio adno zarehistravali kandydatam.
«Chajv Prodžekt» — jurydyčnaja asoba, jakaja była zasnavalnikam kraŭndfandynhavaj płatformy «Ulej». Jaje tvaram byŭ Eduard Babaryka, syn Viktara Babaryki.
«Cichanoŭskija za niešta atrymali dolu ŭ kampanii siamji Babaryki zadoŭha da vybaraŭ, akcyi aformili na Śviatłanu. A pracavali ŭ hetaj kampanii ŭ asnoŭnym tyja, chto ciapier atačyŭ Cichanoŭskuju ŭ Vilni. Karač sa svaimi kantaktami ŭ apazicyjnym asiarodździ kaža, što ničoha dziŭnaha niama, usie ŭsio razumiejuć. Akramia nibyta niezaležnych partałaŭ, jakija va ŭpor admaŭlajucca kapać u zadadzienym kirunku», — zajaviŭ u efiry ANT viadučy Ihar Tur.
Kapać nasamreč nieskładana, dastatkova zamović dźvie vypiski z Adzinaha dziaržaŭnaha rehistra jurydyčnych asobaŭ i indyvidualnych pradpramalnikaŭ. Pracedura kaštuje 29 rubloŭ i dastupnaja lubamu hramadzianinu, u tym liku Iharu Turu.
Takim čynam, što za tavarystva z abmiežavanaj adkaznaściu «Chajv Prodžekt»?
Z daty zasnavańnia, 18 sakavika 2015 hoda, jaho ŭłaśnikam byŭ TAA «Pravavy dyjałoh» (da jaho my vierniemsia paźniej). U červieni 2015 hoda dadalisia jašče dva ŭłaśniki, hramadzianie Biełarusi Andrej Vasin i Anton Marozaŭ. Usie jany byli haspadarami da žniŭnia 2019 hoda, kali pradali (ci padaryli, nie maje značeńnia) svaje aktyvy łatvijskamu akcyjaniernamu tavarystvu «MVS Inviestmient».
Jak vidać, pra Cichanoŭskich nijakaj zhadki niama. Moža, jany byli haspadarami «Chajv Prodžekta» praz dolu ŭ «Pravavym dyjałohu»?
U hetaj kampanii ŭłaśnikaŭ bolš: Alaksiej Hieraščanka (7,5%), Andrej Charłanovič (7,5%), Eduard Babaryka (7,5%), Anton Marozaŭ (10%), Śviatłana Dabralot (15%). Jość i jurydyčnyja asoby — niepasredna «Biełhazprambank» (10%), łatvijskaje akcyjaniernaje tavarystva «MVS Inviestmient» (17,5%), jašče adno łatvijskaje akcyjaniernaje tavarystva «Ałdzi Prodžekts» (25%).
I čysta dla historyi zhadajem byłych akcyjanieraŭ: Siarhiej Dabralot, «Bałtyjas Inviestycyju Hrupa», «Łatvijskaje Inviestycyjnaje ahienctva Aŭstrumu Tyłts» i strachavaja kampanija «Bi End Bi Inšurens».
Ale Cichanoŭskich znoŭ niama. Jak tak? Sprava ŭ tym, što jany pa stanie na leta 2020 hoda nasamreč likvidoŭvali svaju firmu — «Viasiołku zabavaŭ». Tolki heta absalutna inšaja jurydyčnaja asoba, jakaja nie maje ničoha ahulnaha ź Viktaram Babarykam.
U lipieni 2020 hoda Lidzija Jarmošyna zbłytała «Viasiołku zabavaŭ» i «Chajv Prodžekt». Ale navošta ANT amal praz hod vyciahvaje jaje pamyłku i robić z hetaha «rasśledavańnie», zastajecca niezrazumiełym.
Kamientary