Piensijaniera, jaki abaraniŭ žančynu na maršy ŭ Hrodnie, zamiest chatniaj chimii adpraviać u kałoniju
13 maja ŭ Haradzienskim abłasnym sudzie adbyŭsia pierahlad kryminalnaj spravy ŭ dačynieńni da 63-hadovaha žychara Harodni Juzefa Niamiery, abvinavačanaha pavodle dvuch artykułaŭ Kryminalnaha kodeksa — 342 KK (Arhanizacyja abo aktyŭny ŭdzieł u hrupavych dziejańniach, jakija hruba parušajuć hramadski paradak) i 364 KK (Hvałt albo pahroza ŭžyvańnia hvałtu ŭ dačynieńni da supracoŭnika orhanaŭ unutranych spraŭ). Vyniesienaje paŭhoda tamu pakarańnie — 2,5 hady «chatniaj chimii» — zamianili na 1,5 hoda pazbaŭleńnia voli, paviedamlajuć pravaabaroncy.
U studzieni Haradzienski abłasny sud pierahledzieŭ spravu, bo prakuror padaŭ apielacyjny pratest, ale tady rašeńnie było pakinutaje ŭ sile. U sakaviku Haradzienskaja abłasnaja prakuratura nakiravała apielacyjny pratest i na heta rašeńnie, i tady jano było admieniena, a sprava nakiravana na novy razhlad.
Sudovaja kalehija ŭ składzie sudździaŭ Kuleša, Bubienčyka i Račynskaha pryznačyła Juzefu Niamieru pakarańnie ŭ vyhladzie 1,5 hoda pazbaŭleńnia voli ŭ kałonii ahulnaha režymu. Dziaržabvinavaŭca Anton Šałkievič ža zapytvaŭ 2 hady kałonii.
Nahadajem, Juzef Niamiera ŭdzielničaŭ u maršy pratestu ŭ Harodni 6 vieraśnia i abaraniaŭ žančynu ad žorstkich dziejańniaŭ AMAPa. Pry tym jon šturchnuŭ adnaho ź milicyjantaŭ. Da pieršaha suda, jaki adbyŭsia ŭ listapadzie minułaha hoda, jon znachodziŭsia ŭ SIZA.
Kamientary