Ministerstva justycyi RF viadzie pieramovy z bujnymi inviestarami ab stvareńni ŭ Rasii centraŭ papraŭčych rabot z kolkaściu pracaŭładkavanych źniavolenych ad 1 tys. čałaviek. Pra heta ŭ paniadziełak paviedamiŭ žurnalistam ministr justycyi RF Kanstancin Čujčenka, piša TASS.
«My pravodzim pieramovy ź biznesam, zaklučajem pahadnieńni, aktyŭna pracujem nad hetym. I ŭ najbližejšych płanach u nas — padniać kolkaść papraŭčych centraŭ i miescaŭ. Ideja ab zamiaščeńni pracy mihrantaŭ, mnie zdajecca, jana pravilnaja, tamu što možna stvarać papraŭčyja centry na bujnych budoŭlach, bujnych abjektach. <…> Nam vielmi cikavyja bujnyja inviestycyjnyja prajekty, dzie kolkaść asob, jakija adbyvajuć pakarańnie ŭ vyhladzie papraŭčych rabot, budzie składać 1 tys. i bolš čałaviek», — skazaŭ Čujčenka.
Jak padkreśliŭ kiraŭnik Miniusta RF, u Rasii pakul stvorana 8 tys. pracoŭnych miescaŭ, kudy b mahli pracaŭładkavacca źniavolenyja. Pry hetym u kałonijach znachodziacca 180 tys. čałaviek, jakija majuć prava adbyvać pakarańnie na papraŭčych rabotach.
«Adpaviedna, my nie možam u poŭnaj miery realizavać prava ludziej na zamienu pazbaŭleńnia voli na papraŭčyja raboty, choć heta sacyjalna značnaja i cikavaja reč, tamu što ludzi tym samym nie adryvajucca ad hramadstva, jany atrymlivajuć zarabotnuju płatu, mohuć vykonvać svaje abaviazacielstvy, jakija vyciakajuć z rašeńniaŭ sudoŭ. Nu i heta maje važnaje ekanamičnaje značeńnie», — padkreśliŭ ministr.
Raniej arhanizavać na bujnych abjektach papraŭčyja centry dla asudžanych, jakija majuć prava na prymusovyja raboty, prapanavaŭ dyrektar Fiederalnaj słužby vykanańnia pakarańniaŭ Alaksandr Kałašnikaŭ. Pavodle jaho słoŭ, takim čynam možna vyrašyć prablemu ź niedachopam pracoŭnaj siły i zamianić pracoŭnych mihrantaŭ.
Kamientary