Pijarščycy, jakaja prapanoŭvała palepšyć imidž MUS, dali hod «chatniaj chimii». Jak tak atrymałasia?
Pijar-mieniedžarka ahienctva «Virus» Viktoryja Žardzieckaja atrymała hod «chatniaj chimii». Drybinski sud pakaraŭ jaje za abrazu dziaržaŭnych simvałaŭ. «Naša Niva» daviedałasia akaličnaści hetaj historyi ad ludziej, znajomych z materyjałami spravy.
U mai minułaha hoda Žardzieckaja prapanavała studentu z Drybina stać administrataram jutub-kanała. Tematyka — naviny ŭ Biełarusi. Raspracavali dla kanała łahatyp — damalavali da dziaržaŭnaha hierba dźvie małanki i hniazdo z załatymi jajkami. U listapadzie kanał byŭ vydaleny.
Čamu hetuju spravu razhladaŭ Drybinski sud? Možna skazać, źbieh abstavinaŭ. Administratara kanała zatrymali ŭ sakaviku i dali sutki, paśla zaviali kryminalnuju spravu za abrazu dziaržaŭnych simvałaŭ (artykuł 370 KK) i ŭ časie śledstva vyjšli na Viktoryju. Nibyta ŭ jaje na kampjutary zastalisia ślady stvareńnia emblemy.
Śledstva paličyła, što hierb byŭ źmienieny «dziela nadańnia kanału papularnaści i demanstracyi svajho bluźnierskaha staŭleńnia».
Studentu, jak administrataru błoha, dali try miesiacy aryštu, Viktoryi — hod abmiežavańnia voli biez nakiravańnia ŭ papraŭčuju ŭstanovu.
Jašče ŭ mai 2020-ha pijarščyca padtrymlivała Capkału. A paśla vybaraŭ raspracavała płan palapšeńnia imidžu MUS: stvaryć błoh «Welcome to Belarus» i zaprasić tudy Natallu Ejsmant, Volhu Čamadanavu, Ivana Kubrakova, Maryju Vasilevič. Taksama prapanoŭvałasia zładzić pres-kanfierencyju i paprasić fejsbuk i tvitar razbłakavać akaŭnty prychilnikaŭ Łukašenki, a staronki, jakija «hańbiać honar i hodnaść krainy» — zabanić. U advarotnym vypadku Žardzieckaja hraziłasia, što Biełaruś stvoryć ułasnyja sacsietki. Prapanavała dziaŭčyna i słohan dla MUS — «My na vašym baku».
My sprabavali źviazacca z samoj Viktoryjaj, kab vyśvietlić detali spravy. Jana adhuknułasia tolki paśla publikacyi materyjału i pahadziłasia pahavaryć z nami pry ŭmovie, što jaje čas budzie apłačany. Ale «Naša Niva» nie płacić hierojam za infarmacyju.
Jak paśla kanca śvietu. Ahrasiadzibu ŭ Salihorskim rajonie zaniesła ziamloj3
Kamientary