Krynicy: dyśpietčar, jaki sadziŭ samalot z Pratasievičam, źjechaŭ razam ź siamjoj
Jak stała viadoma «Našaj Nivie» ad niekalkich dyśpietčaraŭ «Biełaeranavihacyi», razam ź siamjoj ź Biełarusi źjechaŭ dyśpietčar, jaki mierkavana vioŭ pieramovy ź piłotam Ryanair rejsa Afiny-Vilnia, na borcie jakoha znachodziŭsia Raman Pratasievič.
Dyśpietčar Aleh Halehaŭ žyŭ u Minsku razam ź siamjoj, ciaham niekalkich dzion nam nie ŭdałosia dazvanicca da jaho pa chatnim telefonie. U «Biełaeranavihacyi» jon pracavaŭ jak minimum z 2010 hoda. Na pačatku lipienia pavinien byŭ paśla adpačynku vyjści na źmienu, jaho proźvišča stajała ŭ raskładzie dziažurstvaŭ, ale kalehi jaho tak i nie ŭbačyli.
«Asabista ja nie bačyŭ Aleha daŭno, — kaža NN jaho kaleha. — Chodziać čutki, što jon źnik. Kalehi nie mohuć ź im źviazacca i chvalucca: da jaho niemahčyma dazvanicca, jon pavydalaŭ svaje sacyjalnyja sietki. Načalstva aficyjna ničoha nam nie davodziła. Ale ja asabliva praź jaho nie pierajmajusia, bo dumaju, jon prosta pierastrachavaŭsia i źjechaŭ. Śpiecyjalist jon kłasny, rabotu znojdzie biez prablem u luboj krainie. Hołas na apublikavanym zapisie ź incydentam Ryanair jahony».
Hetuju infarmacyju nam prakamientavali ŭ samoj «Biełaeranavihacyi». Namieśnik hiendyrektara Ivan Hierłoŭski spačatku skazaŭ, što Halehaŭ z červienia ŭ adpačynku, i jon ničoha nie viedaje pra jaho źniknieńnie ci zvalnieńnie. Paśla pytańnia, čamu ŭ arhanizacyi takija doŭhija adpačynki, Hierłoŭski ŭdakładniŭ:
— Tak, my, kali ščyra kazać, zvanili, pytalisia, dzie jon znachodzicca, jak jon tam [nierazborliva].
— Vy jamu zvanili?
— Nu zvanili dzie jon žyvie, u cieščy… Hetym adździeł kadraŭ zajmaŭsia.
Aleh Halehaŭ — etničny hruzin. Jon pierajechaŭ u Biełaruś užo ŭ śviadomym uzroście, paznajomiŭsia ź biełaruskaj Hannaj, jakaja była ŭ jahonych krajach u kamandziroŭcy.
«Dumaju, jon źjechaŭ da svajakoŭ u Hruziju», — skazaŭ NN jašče adzin kaleha dyśpietčara.
My sprabavali źviazacca z Aleham i jaho žonkaj, ale mabilny nie adkazvaje, sacyjalnyja sietki vyčyščany. Jość tolki instahram, dzie całkam źmienieny niknejm, vydaleny amal usie fałoviery, a ŭ zakrytaha profilu niama zastavačnaha fota. Anałahičnaja situacyja z žonkaj: tolki niadaŭna atrymaŭšy novyja siertyfikaty hieštalt-terapieŭta (prafiesija, jakaja zvyčajna praduhledžvaje aktyŭnuju prysutnaść u sacsietkach), jana zakryła ŭsie svaje profili. «Naša Niva» adpraviła paviedamleńnie Hańnie Halehavaj, ale adkazu pakul niama.
Ciapier čytajuć
Biełarus Dźmitryj Šepieleŭ raskazaŭ padrabiaznaści chvaroby, lačeńnia i śmierci Žanny Fryskie2
Kamientary