«U Minsku možna arhanizavać spatkańnie ŭ toj ža viečar, tolki kali paabiacaješ seks». Plus-sajz madel pra toje, jak šukaje paru ŭ internecie
«Moj instahram mužčyn adpužvaje. Usie hetyja viečarynki, konkursy pryhažości i prafiesijnyja fatahrafii ŭhaniajuć zvyčajnaha biełaruskaha mužyka ŭ stupar i pravakujuć žadańnie zmycca», — padzialiłasia Jaŭhienija Ciulenieva. Jana ciapier u pošuku adnosin. Zaviała śpiecyjalna dla hetaha novy instahram, acaniła sajty znajomstvaŭ. Raskazvaje, jak pośpiechi i što nie tak ź biełaruskimi adzinokimi mužčynami.
«Tvoj instahram vyhladaje tak, byccam ty žyvieš na 30 tysiač dalaraŭ»
«Kali mužčyny znajomiacca z taboj užyvuju, prapanujuć abmianiacca instahramami. Ja davała svoj — i mužčyna źnikaŭ. Ja pačała dumać: što nie tak?
Pa akaŭncie mužčyna aceńvaje, čym ty zajmaješsia. Maja publičnaja dziejnaść źviazana z pachodami na mierapryjemstvy, i ludziam, jakija nie viedajuć, što heta častka pracy, zdajecca, što ja pastajanna tusujusia. Adzin moj znajomy maskvič skazaŭ: «Tvoj instahram vyhladaje tak, byccam ty žyvieš na 30 tysiač dalaraŭ». I adpaviedna mužčyna dumaje: ja takoje nie paciahnu. Jon nie razumieje, što heta ŭsio biaspłatna. Kali ja staju z kielicham na fonie ściany i tam napisana «Udava Kliko», heta nie značyć, što ja jaje pastajanna kuplaju i pju.
Status błohiera vielmi adpužvaje mužčyn. Tamu ja zaviała zvyčajny instahram. Tam ja publikuju toje, što rablu sama, za svaje hrošy (śmiajecca). U mianie nie było zadačy pakazać siabie praściej, čym ja jość. Raskazvaju, jak sustrakajusia ź siabrami, baćkami, zajmajusia vindsiorfinham, hulaju z sabakam. Ja daŭno chacieła stvaryć taki akaŭnt, kab vyhružać foty, jakija prosta padabajucca ci fiksujuć kłasny momant, ale, naprykład, niedastatkova pryhožyja, kab patrapić u błohierski instahram i sabrać šmat łajkaŭ.
Pakul čaściej pišuć mužčyny inšych nacyjanalnaściaŭ, bolš uschodnich. Sprabavała znajomicca niekalki biełarusaŭ. U mianie była śmiešnaja pierapiska, kali małady čałaviek kidaje aŭdyjapaviedamleńni (a ja nie adkazvaju, bo zaniataja), paśla piša «ech ty svołač», a praź niekalki dzion prapanuje usio ž sustrecca.
Jość ludzi, jakija dumajuć, što łajk ci sercajka niešta značać. Apošni hod sercajka stała niejkim simvałam jadnańnia, i ja pačała vykarystoŭvać jaho ŭ asabistych pierapiskach.
I niekalki razoŭ mužčyny ŭsprymali, što dziełavuju razmovu ja pieravožu ŭ flirt. Apošni raz mužčyna adkazaŭ mnie, što jon žanaty i padkatvać da jaho nie treba — a ŭ mianie nie było naohuł takoj dumki!
Mnie zdavałasia, bolšaść razumieje, što «dziakuj» i sercajka — heta prosta «vialiki dziakuj». Chacia ŭ mianie jość siabroŭki, jakija hetak ža ŭsprymajuć łajki — bačać ich pad maimi fota ad roznych maładych ludziej i prypisvajuć novuju simpatyju.
Ja zarehistravana na sajtach znajomstvaŭ. Źbirajusia tam pamianiać hieałakacyju — pastavić «Zachodniaja Jeŭropa» i pahladzieć, jak pojdzie. Čamu? Mužčyny bolš schilnyja da pierajezdu za lepšaj pracaj, i heta ŭ tym liku pryvodzić da taho, što da 35 hadoŭ žančyn u nas zastajecca bolš. Ja ekanamist pa adukacyi i viedaju, što na lubym rynku košt vyznačajecca popytam i prapanovaj. Kali kłasnych žančyn bolš, čym mužčyn, to maładyja ludzi stanoviacca razbeščanymi.
U raźvitych i darahich haradach, dzie situacyja inšaja, nosam pačynajuć krucić žančyny. Adpaviedna mnie, jak kaštoŭnaj papiery, bolš vyhadna syści na rynak, dzie maja kaštoŭnaść vyšejšaja.
«Pierš čym adkazać, našy mužčyny aceniać, jak daloka im jechać na spatkańnie»
Adzinokija mužčyny, jakija znachodziacca na sajtach znajomstvaŭ, kamunikavać nie ŭmiejuć. Prychodziać z ustanoŭkaj «palubi mianie takim, jaki ja jość». Mnie zdajecca, vialikaja pamyłka, kali baćki kažuć, što ciabie pavinny pryniać całkam takim, jaki ty jość. Heta pieraškadžaje zavodzić adnosiny. Bo mužčyny z usimi svaimi prablemami prychodziać na pieršaje spatkańnie, vyvalvajuć ich i nie razumiejuć, čamu ŭ ich nie kleicca.
Mnie adnojčy chłopiec raskazvaŭ, što nie moža znajści siabie, z pracaj u jaho nie ładzicca. Dyjałoh u duchu: «A čym ty zajmaješsia?» — «Voj nie viedaju, ciapier tak śpiakotna, pracavać nie chočacca». Moža, heta niejkaja taktyka: chłopcy takim čynam pakazvajuć, što nie buduć ciabie ŭtrymlivać?
Asnoŭnaja prablema — što mužčyny biezynicyjatyŭnyja, im lanota napružvacca. U jakuju b krainu ja ni pryjechała, na praciahu paŭhadziny znachodžu ŭ cindary dvuch-troch maładych čałaviek, z kim pajści na spatkańnie biez praciahu siońnia ž uviečary. Apošni raz ja była ŭ Adesie, dzie zdajecca, šmat pryhožych dziaŭčat i chłopcy pavinny być razbeščanyja. Ale spakojna pryznačyła dva spatkańni, i pamiž imi, pakul čakała, sa mnoj jašče padyšli paznajomilisia.
U Minsku možna arhanizavać spatkańnie ŭ toj ža viečar, tolki kali ty paabiacaješ dastupny seks. A prosta papić kavy, vina našy mužčyny nie pojduć. Tolki ź niejkimi harantyjami.
Ad čaho ja afihieła: našy mužčyny jašče i spytajuć, dzie ty terytaryjalna znachodzišsia. Aceniać, jak daloka im jechać, pierš čym adkazać.
U tych, chto šukaje surjoznych stasunkaŭ, jość takaja pamyłka — nie prydumać, čym zaniacca na spatkańni. Uziać, naprykład, i paklikać prosta pić kavu. Ja liču, što kali ty nie pryrodžany stendapier, to lepš tak nie rabić. Prydumajcie štości emacyjnaje — zaprasicie na «Supier 8», na vystavu. Budzie što abmierkavać. A pachod na kavu nieznajomych ludziej čaściej vyhladaje, jak sumoŭje.
Ale ja zrazumieła, što i našy dziaŭčaty nie ŭmiejuć padkaty prymać. Napeŭna, u nas nie vypracavana tradycyja znajomstvaŭ na vulicy. Kali da dziaŭčyny padyści i štości cikavaje skazać, jana chutčej padumaje, što ty nienarmalny. Chłopcy nie ŭmiejuć znajomicca, bo, mahčyma, sprabavali i byli adšyty.
Ci mohuć ź cindara atrymacca stasunki? Tak, my z chłopcam sustrakalisia hod. Pryčym u našym cindary ludzi, jak mnie padajecca, ščyra pišuć — chočuć jany paznajomicca dla surjoznych adnosin ci na adzin viečar. Mnie, byvała, mužčyny z chodu kazali, što žanaty i šukajuć paluboŭnicu.
«Mnie zdajecca narmalna — abviaścić, što vy ŭ adkrytym pošuku»
Ja zrazumieła, što lepš za ŭsio znajomicca ŭžyvuju. Bo navat kali my spadabajemsia ŭ internecie adno adnamu pa źniešnich prykmietach i nam budzie cikava pahutaryć, moža akazacca, što ład žyćcia absalutna nie supadaje. I pabudavać adnosiny (kali tabie 35+) budzie składana — u mianie z chłopcam ź cindara tak i atrymałasia.
Ahulny bekhraund možna šukać siarod byłych adnakłaśnikaŭ, adnakurśnikaŭ, kaleh, siabroŭ siabroŭ. Heta adrazu tysiača ačkoŭ na karyść taho, što adnosiny pierarastuć u doŭhaterminovyja, bo vas budzie štości jadnać. Pytańnie ž nie tolki ŭ dastatku, ale i ŭ tym, jak jaho tracić.
I mnie zdajecca narmalna — abviaścić, što vy ŭ adkrytym pošuku i vašy siabry mohuć vas znajomić. Bo kali my šukajem pracu, to vyviešvajem abjavu, a kali paru, sprabujem čamuści heta schavać, bo niajomka. Mnie zdajecca, saromiecca nie treba.
Ciapier čytajuć
Biełarusy sustrakajuć vyzvalenych palitviaźniaŭ u Vilni FOTY i VIDEA2
Kamientary