Hulajuć skrynšoty z Anžalikaj Mielnikavaj u trenažorcy ŭ Minsku

Ukrainski błohier Alaksandr Rykaŭ (BalaganOFF) zajaviŭ, što jamu dasłali skrynšoty sa storyz trenierki z trenažornaj zały sietki GYM24 u Minsku, na jakich nibyta fihuravała źnikłaja z dalahladu ŭ sakaviku 2025 hoda Anžalika Mielnikava.

Bałahanaŭ napisaŭ, što jon dva dni vahaŭsia, pierš čym apublikavać skryny, bo nie viedaŭ, sapraŭdnyja jany ci nie.

«Mnie skinuŭ akaŭnt hetyja fota, kaža pahladzicie — zdajecca, što Mielnikava, vielmi padobna. Hety akaŭnt mnie nikoli nie pisaŭ raniej, tamu ja i vahaŭsia, ale ŭrešcie ŭsio ž vyrašyŭ apublikavać», — raskazaŭ «Našaj Nivie» Bałahanaŭ. — Videa ŭ mianie niama, ale ja dla vas spytaju ŭ hetaha akaŭnta, moža jon zachavaŭ».

Čamu mienavita jamu dasłali skrynšoty, Bałahanaŭ nie viedaje. «Moža tamu što ja ŭkrainiec i ja jaho dakładna nie zdam», — vykazvaje zdahadku jon.

Analiz skrynšotaŭ z dapamohaj instrumientaŭ štučnaha intelektu pakazvaje, adnak, što tvar na fotach pa jakaści adroźnivajecca pa stupieni ściskańnia ad astatniaj vyjavy. Heta moža być maska, nakładzienaja pavierch vyjavy.

My paraŭnali vobłaść tvaru z susiednimi ŭčastkami kadra: va ŭsich troch skrynšotach varyjatyŭnaść koleru ŭ zonie tvaru składaje ad 219 da 525, a vakoł — ad 1623 da 3484 adpaviedna, što pakazvaje na łakalna zhładžanuju abo zamazanuju vobłaść.

Jašče adna prykmieta manipulacyj — ślady łakalnaj apracoŭki paśla paŭtornaha JPEG-ściskańnia: u vobłaści tvaru jany krychu vyšejšyja, čym pa vidarysie ŭ siarednim, što časta byvaje tam, dzie niešta damaloŭvali, zamylvali abo ŭstaŭlali pa-nad zychodnikam. Tvar adroźnivajecca ad astatniaj fatahrafii pa detalizacyi, koleravaj struktury i śladach redahavańnia — pryčym istotna.

Kali ŭčastak vyjavy adnačasova zanadta roŭny pa kolery, biedny pa tekstury i krychu vyłučajecca pa śladach ściskańnia, heta typovy profil łakalnaj ličbavaj apracoŭki, a nie narmalna źniataha tvaru. 

«Moj techničny analiz pakazvaje, što tvar na zychodnych kadrach naŭmysna pierakryty ličbavym razmyćciom abo adnarodnym filtram, bo ŭ hetaj zonie zafiksavana anamalna nizkaja detalizacyja i koleravaja varyjatyŭnaść u paraŭnańni z astatnim vidarysam. Z-za hetaj štučnaj «maski» realnych rys tvaru faktyčna nie vidać, tamu prahramy raspaznavańnia buduć vydavać vysoki pracent supadzieńnia pamyłkova, abapirajučysia tolki na ahulny kontur hałavy, šyju i pryčosku», — taki vierdykt nam na asnovie najaŭnaj infarmacyi vynies GPT 5.4 Thinking.

Bolš pakul skazać ciažka. Dla kančatkovaha adkazu treba analizavać pieršasnaje videa, a jaho niama.

* * *

Śpikierka Kaardynacyjnaj rady Anžalika Mielnikava pakinuła terytoryju Polščy i Jeŭrasajuza 26 lutaha 2025 hoda i palacieła ŭ Łondan. Pavodle rasśledavalnikaŭ, za dzień da vyletu jana zareziervavała numar u piacizorkavym hateli na Šry-Łancy, dzie ŭžo byvała raniej. Z 28 lutaha da 7 sakavika Mielnikava žyła ŭ tym hateli ź dziećmi. 7 sakavika Mielnikava ź dziećmi palacieła ŭ Dubaj, tam jaje śled hublajecca. 25 sakavika jana pierastała vychodzić na suviaź.

Kaardynacyjnaja rada zajaŭlała, što 13 sakavika ź jaje akaŭnta byli spampavanyja dakumienty, jakija tyčacca pracy arhanizacyi.

U tym ža miesiacy, pavodle źviestak «Kibierpartyzanaŭ», Mielnikava pieraviała na asabisty rachunak bolš za 150 tysiač dalaraŭ sa srodkaŭ fondu Białoruś Liberty. Viadoma taksama, što pierad źniknieńniem jana lota­ła na Kubu i ŭ Šry-Łanku razam z Alaksiejem Łabiejevym, supracoŭnikam łukašenkaŭskich śpiecsłužbaŭ.

* * *

Udakładnieńnie. U pačatkovaj viersii artykuła zamiest «GPT 5.4 Thinking» było pamyłkova napisana «ChatGPT Thinking 4.6». Pieraprašajem.

• 13
• 0
• 15
• 11
• 1
• 2
• 3
• 0