Zatrymali na vybarčym učastku, źbili na Akreścina, dali hod kałonii za demanstracyju hiematom na maršy
U sudzie Centralnaha rajona Minska 9 vieraśnia za ŭdzieł u maršach 16 žniŭnia i 25 kastryčnika da hoda kałonii asudzili 45-hadovaha minčuka Alaksieja Muravickaha. Ździejśnienaje im kvalifikavali jak udzieł u dziejańniach, jakija hruba parušajuć hramadski paradak (č. 1 art. 342 Kryminalnaha kodeksa), paviedamlaje spring96.org.
Pavodle viersii abvinavačvańnia, Alaksiej Muravicki 16 žniŭnia minułaha hoda na praśpiekcie Pieramožcaŭ «udzielničaŭ u niezakonnym masavym mierapryjemstvie». Zhodna z materyjałami spravy, jon, parušajučy praviły darožnaha ruchu, vyjšaŭ na prajeznuju častku sa ściaham i nadpisam na śpinie «Usich nie zabješ», paŭpłyvaŭ na parušeńnie raskładu hramadskaha transpartu.
Taksama jaho abvinavacili ŭ błakavańni darožnaha ruchu 25 kastryčnika, bo jon «vyjechaŭ na svaim aŭto na prajeznuju častku na vulicy Bahdanoviča», čym zabłakavaŭ darožny ruch.
Alaksieja Muravickaha abvinavacili va ŭdziele ŭ dziejańniach, jakija hruba parušali hramadski paradak 16 žniŭnia i 25 kastryčnika, pavodle č. 1 art. 342 Kryminalnaha kodeksa.
«Minsktrans» zajaviŭ pazoŭ da abvinavačvanaha «i inšych asob» na sumu 71 255 rubloŭ.
Zatrymali krychu bolš za miesiac tamu i zapisali «pakajalnaje videa»
Alaksieja Muravickaha supracoŭniki HUBAZiKa zatrymali 27 lipienia. Suprać jaho raspačali kryminalnuju spravu pavodle č. 1 art. 342 KK i źmiaścili jaho pad vartu. Taksama z zatrymanym zapisali «pakajalnaje videa», dzie jon tłumačyć svaje dziejańni «ŭpłyvam destruktyŭnych telehram-kanałaŭ», na jakija byŭ padpisany.
Na sudzie Muravicki pryznaŭ vinu. Jon raspavioŭ pra svoj udzieł u maršach 16 žniŭnia i 25 kastryčnika.
Pavodle jaho słoŭ, 16 žniŭnia kala 12-j hadziny dnia jon pakinuŭ mašynu pobač z haścinicaj «Biełaruś» i pieššu dajšoŭ da Steły. Pra marš daviedaŭsia ź internetu. Prajšoŭ da Niamihi ź inšymi ŭdzielnikami pratestnaj akcyi. Z saboj była muzyčnaja kałonka i transparant «My mirnyja ludzi, mahutnyja razam…». Muravicki adznačyŭ, što vyjšaŭ na marš, bo jamu zdalisia niespraviadlivymi masavyja zatrymańni i jon takim čynam vystupaŭ suprać hvałtu. Muravicki vykrykvaŭ łozunh «Žyvie Biełaruś», ale ŭ dałoni nie plaskaŭ.
U toj dzień u rajonie Niamihi nieznajomy čałaviek prapanavaŭ napisać jamu na śpinie na miescy hiematom na plačy frazu «Usich nie zabješ». Muravicki pahadziŭsia. Kala budynka KDB jaho sfatahrafavali, hety zdymak jon potym bačyŭ u internecie. Jak adznačyŭ Muravicki, hiematomy na plačy źjavilisia paśla zatrymańnia 9 žniŭnia i ŭtrymańnia ŭ IČU. Ale padrabiaznaści vyrašyŭ nie raspaviadać.
Jak raskazaŭ na pracesie Alaksiej, 9 žniŭnia jon čakaŭ na łaŭcy kala svajho vybarčaha ŭčastka vynikaŭ vybaraŭ. Da jaho źviarnuŭsia nieznajomy mužčyna z prośbaj dapamahčy na ŭčastku, bo tudy nie puskajuć niezaležnych naziralnikaŭ. Muravicki pahadziŭsia. Jon zajšoŭ u škołu, dzie ŭžo było kala saraka aburanych ludziej, i prapanavaŭ napisać kalektyŭnuju zajavu ŭ Centrvybarkam pra niadopusk niezaležnych naziralnikaŭ. Praz paru chvilin prybyŭ AMAP i zatrymaŭ niekalki čałaviek, u tym liku i Muravickaha.
Jak raspavioŭ Alaksiej, 25 kastryčnika kala 14:00 jon ruchaŭsia na mašynie pa vulicy Viery Charužaj. Kali jon padjechaŭ da skryžavańnia z vulicaj Maksima Bahdanoviča, to spyniŭsia, bo nie moh ruchacca dalej praz marš. U Alaksieja byŭ z saboj BČB-ściah, na emocyjach Muravicki ŭziaŭ jaho, ustaŭ na dach svajoj mašyny i machaŭ im chvilin 5-10, pry hetym kryčaŭ łozunh «Žyvie Biełaruś». Praź niekatory čas minak paprasiŭ taksama zaleźci na dach, Muravicki dazvoliŭ jamu «z salidarnaści».
«Naohuł na maju hramadzianskuju pazicyju paŭpłyvała infarmacyja, jakaja publikavałasia ŭ krynicach, jak ja potym zrazumieŭ, destruktyŭnych», — raspaviadaje Muravicki na sudzie.
U toj momant jon ličyŭ, što spynieńnie jahonaha aŭtamabila na darozie nie źjaŭlajecca krytyčnym, bo praź vialikuju kolkaść ludziej ruchu mašyn nie było. Dalej jon jechaŭ na svaim aŭto ŭ bok vulicy Surhanava, a potym išoŭ pieššu da vulicy Arłoŭskaj pa tratuary.
Na siońnia da zroblenaha Muravicki stavicca niehatyŭna:
«Tyja ŭčynki byli pamyłkovyja. Ź ich vynies urok, bolš u takich mierapryjemstvach nie budu ŭdzielničać».
A što z sumaj škody?
U materyjałach spravy prysutničaje zapyt Śledčaha kamiteta da KUP «Minsktrans». Pradstaŭniki arhanizacyi papiarednie padličyli sumu škody za 16 žniŭnia i 25 kastryčnika — 63 096 rubloŭ. Adnak na sudzie suma pazovu da abvinavačvanaha «i inšych asob» vyrasła da 71 255 rubloŭ.
Prakuror Cimafiej Ničyparuk u sudovych sprečkach prapanavaŭ vyklučyć z abvinavačvańnia infarmacyju pra plaskańnie, bo padčas spravy paćvierdžańnia im nie znajšłosia. U astatniaj častcy jon paličyŭ vinu całkam dakazanaj. Źmiakčalnaj akaličnaściu prakuror paprasiŭ pryznać čystasardečnaje raskajańnie, a abciažarvalnaj — toje, što złačynstva ździejśnienaje pa matyvach palityčnaj i ideałahičnaj varožaści. U vyniku, dziaržabvinavaŭca paprasiŭ pryznać sud vinavatym Muravickaha pa č. 1 art. 342 Kryminalnaha kodeksa i pakarać jaho pazbaŭleńniem voli terminam na adzin hod, a taksama zadavolić zajaŭleny pazoŭ «Minsktransa» na sumu 71 255 rubloŭ.
U apošnim słovie Muravicki prasiŭ pryznačyć jamu pakarańnie, nie źviazanaje z pazbaŭleńniem voli:
«Ja va ŭsich kalektyvach zarekamiendavaŭ siabie dobrym, sumlennym, prystojnym, spraviadlivym čałaviekam. Zaznaŭšy ŭpłyŭ destruktyŭnych kanałaŭ, ździejśniŭ šerah pravinnaściaŭ, nadalej abiacaju nie ŭdzielničać».
U vyniku, 9 vieraśnia sudździa Šabunia pryznała Alaksieja Muravickaha vinavatym pavodle č. 1 art. 342 KK i asudziła jaho da adnaho hoda pazbaŭleńnia voli va ŭmovach ahulnaha režymu. Pazoŭ «Minsktransa» pakinuli biez razhladu: jon budzie vyrašany ŭ hramadzianskim paradku.
Kamientary