«U śpisach ja była z paznakaj ab złačynstvach suprać dziaržavy». Arhanizatarka žanočych akcyj, jakaja žyła ŭ Maskvie, terminova źjechała adtul 

Maryna — vypusknica BDUKI. Apošnija niekalki hadoŭ jana žyła ŭ Maskvie (dziaŭčyna zamužam za rasijskim režysioram i členam praŭleńnia Fondu dapamohi chośpisam «Viera» Alaksandram Siominym). Ale ŭ žniŭni 2020-ha nie zmahła zastavacca prosta naziralnicaj. Pakinuła šaścimiesiačnuju dačku doma i pryjechała ŭ Minsk.

«Paśla taho jak my arhanizavali ź dziaŭčatami pieršyja žanočyja akcyi ŭ biełym, ja stvaryła telehram-kanał, u jakim my hetyja akcyi aśviatlali. Kažuć, pretenzii mohuć być praź jaho», — raskazvaje Maryna. 

Praź niekalki tydniaŭ paśla tych łancuhoŭ salidarnaści joj pastupili pieršyja pahrozy z-za artykuła Mukavozčyka, i jana źjechała da dački i muža ŭ Maskvu. 

Za hod z Marynaj dvojčy pravodzili tłumačalnyja hutarki paśla akcyj kala biełaruskaj ambasady — adnu ŭ mikraaŭtobusie, druhuju prosta ŭ horadzie. Papiaredzili, što treci raz cyrymonicca nie buduć. Dziela siamji dziaŭčyna zamoŭkła.

Pavialičyć

Ale na hetym historyja nie skončyłasia. Napačatku žniŭnia pryjšła paviestka na jaje imia — na adras byłoha muža ŭ Minskaj vobłaści. Źjavicca na dopyt Maryna pavinna była na nastupny dzień. Pa jakoj spravie, nichto tak i nie patłumačyŭ. Pryjechać na toj dopyt z Maskvy dziaŭčyna nie mahła.

Jana chvalavałasia, što za niajaŭku jaje mohuć adrazu pryciahnuć da adkaznaści, uziała kansultacyi ŭ niekalkich jurystaŭ. Parada ad usich była adna — terminova źjazdžać z Rasii, bo apošnim časam kolkaść departacyj z krainy vyrasła. Maryna z dačkoj źjechała. 

Paśla ŭžo stała viadoma, što jaje kanał pryznali ekstremisckim.

«Blizkamu siabru ŭdałosia pa svaich suviaziach udakładnić, ci jość ja ŭ śpisach. Ja tam była z paznakaj ab artykule ab złačynstvach suprać asnoŭ kanstytucyjnaha stroju i biaśpieki dziaržavy, z paznakaj ab departacyi. U Rasii napiaredadni vybaraŭ začyščajuć usio, što choć krychu addaje apazicyjaj, zatykajuć raty i ŚMI, i aktyvistam», — dzielicca Maryna.

Pryznajecca, što da paviestki nie dumała, što joj u Maskvie moža štości pahražać.

«Ale my i nie dumali, što jany aśmielacca na płan pahłyblenaj intehracyi, a ciapier heta zdajecca pytańniem času», — zaŭvažaje dziaŭčyna. Ciapier jana z dačkoj u Vilni. 

U Maskvie Maryna vykładała ŭ pryvatnym univiersitecie i zajmałasia prajektam pa seksualnaj adukacyi padletkaŭ. Dla ŭniviersiteta jana praciahvaje zapisvać materyjały.

«A voś novy prajekt pa hiendarnaj roŭnaści, jaki ja płanavała pačać u vieraśni, daviadziecca prytarmazić. Pakul treba ŭsio naładzić tut, vydychnuć i dumać, jak nie ŭpaści ŭ vyvučanuju biezdapamožnać praz hetu situacyju. Kaniečnie, chočacca praciahnuć svaju žanočuju paviestku, ale pakul zahadvać rana».

• 0
• 0
• 0
• 0
• 0
• 0
• 1
• 0