Viarchoŭny sud likvidavaŭ Biełaruski Chielsinski kamitet — apošniuju zarehistravanuju pravaabarončuju arhanizacyju
30 vieraśnia ŭ Viarchoŭnym sudzie prajšło asnoŭnaje sudovaje pasiadžeńnie pa pazovie Ministerstva justycyi ab likvidacyi BCHK.
Namieśnik staršyni arhanizacyi Hary Pahaniajła, jaki pradstaŭlaŭ BCHK ŭ sudzie, zajaviŭ, što BCHK nie pahadziŭsia z dokazami i padstavami dla takoha pazovu, bo samoha fakta parušeńnia nie było, i materyjałami ŭ spravie heta nie dakazana; što BCHK pazbavili mahčymaści dać svaje dokazy, bo materyjały byli ŭziatyja z kryminalnaj spravy, jakaja jašče nie była razhledžanaja. BCHK chadajničała adkłaści razhlad spravy ŭ Viarchoŭnym sudzie da zaviaršeńnia kryminalnaj spravy, ź jakoj uziali materyjały.
Ale sud nie ŭziaŭ da ŭvahi hetyja zajavy i pastanaviŭ likvidavać BCHK.
Staršynia BCHK Aleh Hułak zajaviŭ Svabodzie z hetaj nahody:
«Heta było čakana, chacia b tamu, što jašče nichto nie vyjhravaŭ pazovy Miniusta ab likvidacyi, asabliva ŭ apošnija časy, ciapier zanadta nie da zakonaŭ, kab raźbiracca. Heta palityčnaje rašeńnie ŭ rečyščy ciapierašniaha cisku i pieraśledu, likvidacyi struktur hramadzianskaj supolnaści i ahulnaha palityčnaha kantekstu ŭ krainie. Ale my budziem praciahvać pracu pa abaronie pravoŭ čałavieka, šukać formy, kab rabić heta, nie padstaŭlajučy ludziej».
Za što likvidavali BCHK
Padstavaj dla likvidacyi, na dumku Ministerstva justycyi Biełarusi, maje pasłužyć nibyta «hrubaje parušeńnie zakanadaŭstva» z boku BCHK. Pavodle zajavy, Ministerstvam justycyi ŭ vyniku śledčych dziejańniaŭ u nienazvanaj kryminalnaj spravie byli atrymanyja dakumienty na 2 čałaviek, jakim BCHK nibyta apłaciŭ hanarary za «pasłuhi ŭ doŭhaterminovym nazirańni za vybarami prezidenta Respubliki Biełaruś 2020 hoda».
U paćvierdžańnie hetamu Ministerstva justycyi prykłała da zajavy kopii 6 dakumientaŭ: damovaŭ, prychodna-kasavych orderaŭ i aktaŭ pryjomu i pieradačy.
U BCHK zajavili, što im nieviadoma, ab jakoj kryminalnaj spravie i ŭ dačynieńni da kaho idzie havorka:
«Vidavočna, što vykarystoŭvać materyjały kryminalnaj spravy, jakija jašče nie aceńvalisia sudom u ramkach sudovaha razboru ŭ kryminalnaj spravie, niepravamierna. Havoračy jurydyčnaj movaj, kali Viarchoŭny sud pryznaje, što hetyja dakumienty, pryčym tolki ŭ kopijach, adpaviadajuć rečaisnaści, to hetaje rašeńnie budzie mieć prejudycyjalnaje značeńnie dla kryminalnaj spravy, u jakoj znachodziacca hetyja dakumienty i pa jakim abvinavačvajucca kankretnyja ludzi.
Kamientary