31 kastryčnika ŭ Łarysy Simakovič byŭ apošni pracoŭny dzień u Biełaruskaj dziaržaŭnaj fiłarmonii. Jana vyjšła na scenu, dzie hučaŭ jaje novy tvor — kosmamisteryja «Kraj».
U piatnicu 29 kastryčnika Łarysie Simakovič addali pracoŭnuju knižku, piša «Radyjo Svaboda».
Pa słovach kampazitarki, namieśnik hiendyrektara Andrej Łapcionak paviedamiŭ, što ź joj nie praciahvajuć kantrakt «pa ŭzroście».
«U mianie skončyŭsia kantrakt, jaki raniej praciahvali niekalki hadoŭ biez prablem. I raptam niečakana, choć ja mahu zdahadvacca pra niejkija realnyja pryčyny, namieśnik hiendyrektara skazaŭ, što «pa pryčynie ŭzrostu». Kali ja zapytałasia, ci jość da mianie prafiesijnyja pytańni, namieśnik adkazaŭ upeŭnienym «nie!», — raskazała Simakovič «Svabodzie».
Łarysa Simakovič za 13 hadoŭ pracy ŭ fiłarmonii pastaviła 11 śpiektaklaŭ, adkryła novyja žanry dla biełaruskaha charavoha mastactva. Jana z 1992 hoda — siabra biełaruskaha Sajuza kampazitaraŭ.
Aproč dziejnaści ŭ jakaści prafiesijnaha kampazitara, Łarysa Simakovič pracavała na pałovu staŭki viadučym redaktaram u miedyjnych strukturach fiłarmonii. Jana składała anonsy i muzyčnyja prahramki dla hledačoŭ. Pavodle Łarysy, za amal 13 hadoŭ pracy ŭ fiłarmonii jana nivodnaha praduktu nie vydała na ruskaj movie, a tolki na biełaruskaj.
«Choć u fiłarmonii pieravažaje ruskaja mova. Na siońnia tam nie zastałosia nivodnaha čałavieka, jaki b vałodaŭ u toj miery biełaruskaj movaj, jak vałodaju ja. I kali ja spytałasia adnosna taho, što nivodnaha biełaruskamoŭnaha ŭ fiłarmonii nie zastajecca, toj ža namieśnik dyrektara adkazaŭ: «Nu kak-to!» Dla mianie stała jasna, što biełaruskaja mova dla hetaha čynoŭnika nie jość duchoŭnaj kaštoŭnaściu, — kaža Łarysa Simakovič. — Ja dumaju, što heta adna ź pieršych pryčyn, bo biełaruskaja mova siońnia markier, abaznačeńnie pazicyi čałavieka. Heta było pry kamuniźmie i paźniej».
Łarysa Simakovič skazała, što ciapier šukaje pracu, «kab nie dumać pra hrošy, a pra tvorčaść».
Łarysa Simakovič viadomaja jak kampazitarka, baletmajstar, mastackaja kiraŭnica falkłornaha teatra «Hościca» i režyser-pastanoŭščyk, a da taho ž tancorka i śpiavačka.
Što čakaje Biełaruś u bližejšyja piać hadoŭ? A Rasiju i Jeŭropu? Śpiecdakładčyk AAN pa Biełarusi daje svoj raskład8
Kamientary