Film tydnia. «Karol Ryčard» — historyja staleńnia vialikich spartovak i vydatnaja ihra ad Uiła Śmita

«Karol Ryčard» — heta historyja Ryčarda Uiljamsa, baćki zornych amierykanskich tenisistak Siereny i Vinus Uiljams. Hałoŭny hieroj sam niekali cikaviŭsia tenisam, adnak zajmaŭsia im tolki na amatarskim uzroŭni. Adnak dla svaich dačok Ryčard stvaryŭ ceły płan ich budučaj karjery, jaki dapamoh im stać spartoŭkami suśvietnaha ŭzroŭniu.

Žanr filma — spartovy bajopik (bijahrafičny film), ale ž nie treba hetaha pužacca. Na viadomym sajcie-ahrehatary recenzij Rotten Tomatoes krytyki sychodziacca ŭ tym, što karcina pra Ryčarda Uiljamsa «vychodzić za ramki šabłonaŭ spartovych bajopikaŭ, dziakujučy aśviažajučamu apoviedu i vydatnamu vykanańniu Uiłam Śmitam hałoŭnaj roli». Bolš za toje, ekśpierty kažuć, što «Karol Ryčard» maje šansy pazmahacca za «Oskara».

Što ž tak uraziła krytykaŭ?

Historyja

Cim Uajt, adzin z pradziusaraŭ «Karala Ryčarda», jašče ŭ dziacinstvie pačaŭ hulać u tenis i vystupać na spabornictvach. Uajt viedaŭ historyju Ryčarda Uiljamsa i navat bačyŭ jaho ŭžyvuju na spartovych placoŭkach, kali toj padtrymlivaŭ svaich dziaciej.

Prajšło šmat hadoŭ, i Uajt uspomniŭ pra Uiljamsa. Jamu i inšamu pradziusaru, Trevaru Uajtu, zachaciełasia raskazać hetuju historyju. Pavinien byŭ atrymacca apovied pra kiraŭnika nievialikaj achoŭnaj kampanii, u jakoha nie było lišnich hrošaŭ i vopytu ŭ prafiesijnym tenisie. Tym nie mienš, hety čałaviek zdoleŭ zrabić ź dźviuch svaich dačok tenisnych supierzorak — i heta ŭ tyja časy, kali tenis ličyli «sportam dla biełych».

Scenaryj dla «Karala Ryčarda» napisaŭ Zak Bejlin. Na jaho rachunku nie tak šmat viadomych stužak — možna ŭspomnić chiba što «Pabočny efiekt» 2013 hoda z Džudam Łoŭ i Runi Maraj. Adnak historyja pra baćku siaścior Uiljams ŭ Bejlina atrymałasia na słavu. Naprykład, scenaryj pad jaho aŭtarstvam uvajšoŭ u mižnarodny rejtynh Black List 2018 — śpis dobrych scenaryjaŭ, što (na toj čas) pakul nie byli ŭvasoblenyja ŭ filmach. Kažuć, što mienavita dobry scenaryj pryvabiŭ i hałoŭnuju zorku stužki — Uiła Śmita.

Akciorski skład

Biezumoŭna, Uił Śmit — samaje hučnaje imia siarod akcioraŭ stužki. Kažuć, što jon vydatna pakazaŭ siabie ŭ novaj karcinie, i navat moža ź vialikaj vierahodnaściu apynucca siarod naminantaŭ na «Oskar».

Hety akcior nabyŭ viadomaść jašče ŭ 90-ja dziakujučy takim błakbastaram, jak «Ludzi ŭ čornym» i «Dzień niezaležnaści». Šmat hadoŭ adno tolki imia Śmita na afišy dazvalała karcinam pretendavać na kasavy pośpiech. Ciapier akcior trochi adyšoŭ ad spraŭ, ale «Karol Ryčard» — dobraja mahčymaść dla jaho nahadać nam, čaho jon na samoj spravie varty.

Niekatoryja krytyki miarkujuć, što «Oskar» čakaje jašče adnu aktrysu z «Karala Ryčarda». Havorka pra Anžaniu Elis, vykanaŭcu roli Arasin Prajs, maci siaścior Uiljams. Šmat dobrych słovaŭ u svoj adras zasłužyli i junyja aktrysy Sanija Sindej i Demi Sinhłtan, što hrajuć adpaviedna Vinus i Sierenu Uiljams.

Ciomny bok zornaha baćki

Ryčard Uiljams — zusim nie taki adnaznačny piersanaž, jak moža padacca na pieršy pohlad.

Naprykład, niekali jon śpiecyjalna pieravioz ułasnuju siamju žyć u bandycki rajon, kab zakalić charaktar svaich dačok — budučych čempijonak, i kab zekanomić hrošy dla zaniatkaŭ tenisam.

Niejak Uiljams naniaŭ hrupu školnikaŭ, kab jany pryjšli na kort da Siereny i Vinus i vykrykvali ŭ bok siaścior abrazy. Tak jon žadaŭ pryvučyć budučych tenisistak nie reahavać na niehatyŭ u svoj bok.

Paźniej, kali Vinus i Sierena ŭžo hulali na prafiesijnym uzroŭni, Ryčard pastajanna abvinavačvaŭ ich supiernic u rasiźmie i dazvalaŭ sabie časam davoli hrubyja vykazvańni ŭ ich bok.

Ci buduć hetyja i padobnyja da ich historyi ŭklučanyja ŭ film? Pabačym.

Rejtynhi na vialikich mižnarodnych resursach

IMDB — 6,8/10

Rotten Tomatoes — 92%

Metacritic — 72/100

Chutka śviet pabačyć praciah lehiendarnaha sieryjała «Seks u vialikim horadzie». Raskazvajem, čym jon cikavy

Film «Minułaj nočču ŭ Socha». Čamu jaho varta pahladzieć

• 0
• 0
• 0
• 0
• 0
• 0
• 0
• 0