U Čechii zatrymali kiraŭnika Biełaruskaj fiederacyi futboła Uładzimira Bazanava. Što viadoma na dadzieny momant?
Maraŭska-Silezskaja palicyja zatrymała staršyniu Biełaruskaha futbolnaha sajuza 64-hadovaha Uładzimira Bazanava, piša hazieta Denik N. Padazrajecca, što Bazanaŭ pryjechaŭ u Čechiju na matč miž biełaruskimi i českimi futbalistami biez dazvołu na ŭjezd. Jak paviedamlajecca ŭ haziecie, čynoŭnika razam z žonkaj zatrymała palicyja Maraŭska-Silezskaha kraju.
Palicyja pa spravach zamiežnikaŭ padazraje, što jany parušyli zahad Ministerstva achovy zdaroŭja Českaj Respubliki i što jany nie majuć prava znachodzicca na terytoryi krainy.
«My možam paćvierdzić, što dvoje zamiežnikaŭ, jakich padazrajuć va ŭjeździe i pierabyvańni ŭ Českaj Respublicy z parušeńniem mier abarony Ministerstva achovy zdaroŭja, byli zatrymanyja padčas płanavaj pravierki pa miescy pražyvańnia. My vyvučajem zakonnaść ich pierabyvańnia na našaj terytoryi ŭ adpaviednaści z Zakonam pra pražyvańnie zamiežnikaŭ», — skazała Paŭła Jirauškova, pres-sakratar Maraŭska-Silezskaj palicyi.
Pra pajezdku Bazanava ŭ Čechiju stała viadoma jašče ŭčora. Ministr zamiežnych spraŭ Jakub Kułchaniek zajaviŭ, što kali biełaruski čynoŭnik apyniecca na terytoryi Čechii, jaho departujuć.
Siońnia ž vyśvietliłasia, što paśla pryjezdu ŭ Čechiju Bazanaŭ spyniŭsia ŭ Ostravie, a ŭčora naviedaŭ stadyjon u Opavie. Siońnia tam pavinien byŭ adbycca adboračny matč žanočaha čempijanatu śvietu.
Ale futbolny matč, na jaki jechaŭ Uładzimir Bazanaŭ, pieranieśli. Pryčyna — stanoŭčyja testy na kavid u niekalkich hulcoŭ biełaruskaj zbornaj. Astatnija členy kamandy ciapier pavinny zdać paŭtorny test.
Što kaža ambasada Biełarusi?
Chacia za apošni čas palicyja zatrymlivała vysokapastaŭlenych českich futbolnych čynoŭnikaŭ, pieraśled zamiežnaha futbolnaha čynoŭnika — niezvyčajnaja sprava dla Čechii.
Ambasada Biełarusi pakul nie adkazała, ci viadoma joj było pra prysutnaść Bazanava ŭ Čechii i ci supracoŭniki viedali pra jaho zatrymańnie siońnia. Hazieta taksama pakul vyśviatlaje reakcyju Futbolnaj asacyjacyi Českaj Respubliki na hetyja padziei.
Čamu Bazanaŭ patrapiŭ u sankcyjny śpis?
Češskaja hazieta nahadvaje, što Bazanaŭ patrapiŭ u sankcyjny śpis prybałtyjskich respublik.
«Svaimi dziejańniami ludzi z hetaha śpisu saŭdzielničali ŭ arhanizacyi i padtrymcy falsifikacyj prezidenckich vybaraŭ 9 žniŭnia i padtrymlivali nastupnaje hvałtoŭnaje padaŭleńnie mirnych pratestaŭ i demanstracyj», — havorycca ŭ dakumiencie Ministerstva zamiežnych spraŭ Łatvii. U minułym hodzie Bałtyjkaja infarmacyjnaja ahiencyja hetak ža pisała pra staršyniu praŭleńnia biełaruskaha futboła.
Bazanaŭ źjaŭlajecca kiraŭnikom Biełaruskaj fiederacyi futboła z 2019 hoda. Na pačatku 2010-ch jon uznačalvaŭ «Dynama-Brest». U 2020-m Bazanaŭ udzielničaŭ u viełaprabiehu ŭ padtrymku Łukašenki razam sa staršynioj Alimpijskaha kamitetu, ministram sportu.
Vialikaja hutarka z Alinaj Koŭšyk — pra intervju z Padsasonnym, skandał z Kulejem i reformy na «Biełsacie»23
Kamientary