Pamiatajecie 14-hadovaha futbalista, jakoha zatrymlivaŭ AMAP? Źlili razmovy siłavikoŭ pra jaho spravu, a «Naša Niva» daviedałasia, čym skončyłasia historyja
Baćku chłopca zusim niadaŭna vyklikali ŭ KDB — pahutaryć.
«Pryvitańnie z haŭnaaŭtobusa»
Minskaha padletka Ivana Askierku zatrymlivali viasnoj 2021 hoda, tady chłopcu było 14 hadoŭ. Jon spartoviec, zajmaŭsia futbołam.
Tady pra zatrymańnie Ivana raskazvała jaho maci. Pa jaje słovach, chłopca adpravili zabrać zakaz na Hrušaŭku, ale tam jaho «ŭziali».
«U syna rost 185 santymietraŭ, jon, ščyra kažučy, nie vyhladaje na 14 hadoŭ. Tamu siłaviki, napeŭna, nie zrazumieli spačatku, što jon niepaŭnaletni. Zaciahnuli ŭ mikraaŭtobus, dzie, jak užo kazała, ździekavalisia ź jaho, — kazała žančyna. — Syn raspavioŭ, što jon spakojna dajšoŭ ad mietro da kramy na praśpiekcie Dziaržynskaha, zabraŭ zakaz, pakłaŭ u kišeniu ček, vyjšaŭ na hanak, nadzieŭ navušniki. U hety čas da jaho padyšoŭ niejki nieviadomy mužčyna ŭ cyvilnym i biez maski. Heta, darečy, bačyli navat pradaŭcy kramy, tamu što padziei adbyvalisia prosta za vitrynaj.
Pa słovach Vani, hety mužčyna schapiŭ jaho za škirku i skazaŭ: «Nu ŭsio, tabie tryndziec!». Vania paviarnuŭsia, maŭlaŭ, chto vy taki, što vy robicie. Tut ža padyšoŭ inšy mužčyna, jany schapili majho syna i pavałakli ŭ mikraaŭtobus, jaki stajaŭ niepadalok.
Paźniej telefanavała synu, ale jon uvieś čas skidvaŭ, naturalna, nie razumieła, što adbyvajecca, pačała chvalavacca, tamu što takoha nikoli nie zdarałasia. Praciahnuła telefanavać, i praź niekatory čas Vania staŭ niedastupny.
Jak akazałasia, mianie ŭ jaho telefonie zabłakavali hetyja siłaviki. Kali jany pasadzili syna ŭ mikraaŭtobus, tam apynulisia jašče niekalki amapaŭcaŭ. Hetyja ludzi zabrali ŭ Vani telefon, pačali hladzieć u im infarmacyju. Ale ničoha kramolnaha tam nie akazałasia, tolki niejkija futbolnyja rečy, spartyŭnyja hrupy i hetak dalej. Heta značyć, hruba kažučy, Vania ŭ destruktyŭnych tielehram-kanałach, jak kažuć ułady, nie siadzić i ničoha supraćzakonnaha ŭ telefonie nie zachoŭvaje.
Siłaviki sfatahrafavali Vaniu na jaho ž telefon i adpravili zdymak majmu mužu z podpisam «Pryvitańnie z haŭnaaŭtobusa».
Andrej byŭ na pracy, a kali atrymaŭ paviedamleńnie, naohuł nie zrazumieŭ, što adbyvajecca. Potym, jak kazaŭ muž, jon pavialičyŭ fatahrafiju, i ŭbačyŭ spałochany tvar syna. Tady zrazumieŭ, što niešta zdaryłasia.
Tut ža napisaŭ u adkaz: «Kali ty kranieš jaho palcam — mnie ŭžo hublać niama čaho». U adkaz pryjšło inšaje paviedamleńnie: «Tabie patelefanujuć». I ŭ dadatak siłaviki jašče dasłali fatahrafiju čyrvona-zialonaha ściaha.
Muž napisaŭ jašče prośbu, kab nie telefanavali žoncy, heta značyć, mnie. Jon chacieŭ sam va ŭsim razabracca, zabrać Vaniu i razam ź im viarnucca dadomu, kab ja nie chvalavałasia.
Jašče synu skazali, što jaho tatu taksama *** [kaniec], što pryjeduć da mamy i zabiaruć dziaciej. Vania prasiŭ patelefanavać mnie, ale siłaviki nie dazvalali. Pry hetym pastajanna zadavali adno i toje ž pytańnie: «A što, tvaja mama nie na mitynhu, ci što?».
Paśla hetaha na chłopca skłali pratakoł za drobnaje chulihanstva, abvinavacili ŭ tym, što jon nibyta pakazvaŭ «nieprystojnyja žesty» siłavikam. Jon niejki čas pravioŭ u milicyi, adkul jaho zabraŭ baćka.
«Byŭ tam hety palec ci nie?»
Ciapier, na pačatku 2022 hoda, u sieciva źlili aŭdyja razmovy milicejskich načalnikaŭ pra zatrymańnie Vani. Na zapisie pra zatrymańnie chłopca čuvać hałasy, padobna, pałkoŭnika Ihara Padvojskaha, namieśnika načalnika HUUS Minharvykankama, i Dźmitryja Bałaby, kamandzira minskaha AMAP. Padobny na Padvojskaha hołas skardzicca, što paśla zatrymańnia chłopca padniaŭsia šum.
«Ź ministram była razmova. Treba razabracca, dać abviaržeńnie. Vyjšaŭ artykuł na Tutbai — napisana kiepska, što ŭsie ŭrody, a biednaje dzicia 185 rostam, b***, nie vinavataje, palec supracoŭnikam AMAP nie pakazvaŭ. Znajdzi hetych supracoŭnikaŭ, jakija jaho zatrymlivali, pahavary asabista, i mnie akuratna skazać: byŭ tam hety palec ci nie, — daje zahad čałaviek, čyj hołas padobny na hołas Ihara Padvojskaha. — Kali b jon pakazvaŭ i ŭ mašynie było b niejkaje videa — heta budzie samaje lepšaje, što tolki mahčyma, b***, u hetaj situacyi».
Ale ž jaho surazmoŭca, čyj hołas padobny na hołas Bałaby, rasčaravaŭ:
«Pracavali mahilaŭčanie, piać čałaviek było zatrymana. Zakon podłaści — try zapisy jość, na hetaha —niama».
Čym skončyłasia? Z synam usio dobra, baćku vyklikali na razmovu ŭ KDB
«Naša Niva» pahavaryła z baćkam Vani, kab daviedacca, čym skončyłasia historyja i jak žyvie siamja siońnia.
«Była kamisija pa spravach niepaŭnaletnich, — kaža Andrej Askierka. — Kamisija prachodziła ŭ aktavym zale administracyi rajona, tudy prychodziŭ pradstaŭnik inśpiekcyi pa spravach niepaŭnaletnich.
Tam było jašče čałaviek 6-7 z roznych viedamstvaŭ, jak ja zrazumieŭ. Supastavili fakty našy, što syn nievinavaty, pahladzieli pakazańni amapaŭcaŭ, jakija zatrymlivali.
Abvinavačvańnie łopnuła, bo ŭsie fakty ŭkazvali, što ničoha syn nie rabiŭ. Ale kab nie było takoha, što nas apraŭdali, to, skažam tak, tam vynieśli takoje rašeńnie, jakoje zadavoliła i nas, i ich. Faktyčna syna nie pakarali».
Taksama z Andrejem Askierkam u 2021 hodzie nie stali praciahvać kantrakt u aŭtaparku, dzie jon tady pracavaŭ. Ale dali mahčymaść dapracavać.
Bolš syna nie čapali, kaža minčuk, Vania praciahvaje zajmacca futbołam. Ale ž samoha baćku niadaŭna vyklikali ŭ KDB.
Heta było źviazana z tym, što raniej Andreja Askierku zatrymlivali siłaviki — jašče ŭ śniežni 2020-ha. Tady, darečy, jon byŭ z synam, ale Vaniu nie dali zatrymać susiedzi.
Andreja ž sudzili, dali štraf u 30 bazavych, prysud jon abskardziŭ u Minskim haradskim sudzie, jaki vynies rašeńnie ab admienie pryhavoru, spravu adpravili na novy razhlad, ale paśla vyjšaŭ termin daŭniny. Adpaviedna, Andreja ŭ vyniku i nie apraŭdali, ale ž i nie pryznali vinavatym. I ciapier pra jaho «zhadali» ŭ orhanach.
«Mnie pazvanili 2-3 tydni tamu, paklikali ŭ KDB. Kažuć: «Kamitet dziaržaŭnaj biaśpieki turbuje, chacieli b pahavaryć z vami nakont arendy». A ja ipešnik, zdymaju pamiaškańnie ŭ dziaržpradpryjemstva.
Ja spytaŭsia, jakoje dačynieńnie KDB maje da arendy pamiaškańnia, mnie adkazali: pryjazdžajcie, usio patłumačym, — raskazvaje Andrej. — Ja pryjechaŭ. Sa mnoj praviali hutarku. Nie cisnuli, usio vietliva, taktoŭna, zusim nie takija razmovy, jak navat na kamisii pa spravach syna.
Cikavilisia ci ŭdzielničaju ja ŭ niesankcyjanavanych mitynhach, dali zrazumieć, što kali budzie «niešta nie tak», to sa mnoj nie praciahnuć arendu pamiaškańnia. Kažuć: jość niehałosnaje rasparadžeńnie, što z usimi, chto fihuravaŭ pa 23.34 i zajmaje dziaržaŭnaje pamiaškańnie, nie praciahvać arendu.
Paśla ja padpisaŭ, što nidzie nie ŭdzielničaju, u niesankcyjanavanych mierapryjemstvach, na hetym usio».
Ciapier mužčyna kaža:
«U nas vialikaja siamja, piać čałaviek. Chaciełasia b žyć tut, ale ž pytańnie, jak žyć, ź jakim nastrojem. Budziem hladzieć, što budzie dalej».
Kamientary