Raman Pratasievič praciahvaje zastavacca ŭ zakładnikach. Ciapier jamu prydumali novuju rolu — jon budzie «pravaabaroncam» pad kryłom Dźmitryja Bielakova, praŭładnaha aktyvista. U hetaj roli Raman pravioŭ žyvy efir, dzie adkazvaŭ na pytańni.
U strymie Pratasievič zajaviŭ, što jaho siońnia ŭpieršyniu za doŭhi čas vypuścili ź miesca, dzie jon znachodziŭsia pad chatnim aryštam. Ale Raman praciahvaje być pad kryminalnym pieraśledam. Taksama Pratasievič zajaviŭ, što zaklučyŭ dasudovuju damovu sa śledstvam. Jon nie viedaje, kali skončycca rasśledavańnie kryminalnaj spravy. Dadaŭ tolki, što jaje viadzie Śledčy kamitet, a nie KDB.
Nahadajem, što raniej dasudovuju damovu sa śledstvam zaklučyła Safija Sapieha. Kryminalnuju spravŭ u dačynieńni da jaje pieradali ŭ sud.
Taksama ŭ strymie Pratasievič kaža pra pasadku samalota Ryanair— «mahli padstavić svaje».
Pra telehram-kanał, jaki Pratasievič pačaŭ vieści, ale chutka zakinuŭ, taksama było zhadana. Raman kaža, što budzie vieści jaho jak asabisty błoh.
Na pytańnie, chto pieramoh na prezidenckich vybarach-2020, jon adkazaŭ: «Nie majho rozumu sprava».
Było zaŭvažna, što Raman niarvujecca. Adkazy na mnohija pytańni jon nie davaŭ, uchilaŭsia, tłumačyŭ, što «pytańnie nie ŭ jaho kampietencyi» ci «davać acenku musiać adpaviednyja ludzi» (ci «adpaviednyja orhany»).
Jon zapeŭniŭ, što padčas znachodžańnia na Danbasie nikoha nie zabivaŭ i navat nie stralaŭ.
Taksama ŭ jaho pramovie było šmat kazionnych vyrazaŭ, kštałtu «biełaruskija śpiecsłužby nieadanarazova dakazali, što jany prafiesijanały svajoj spravy». Taksama Pratasievič skazaŭ, što jamu «treba padumać, čym moža być karysnym hramadstvu i dziaržavie». Łukašenku jon nazyvaŭ vyklučna dadajučy «prezident».
Kamientary