Vajskoŭcy Burkina-Faso zajavili pra paśpiachovy dziaržaŭny pieravarot
Armija abviaściła pa telebačańni ab źviaržeńni prezidenta Roka Marka Kryścijana Kabare, rospusku ŭrada i parłamienta i zakryćci miežaŭ. Raniej kiraŭnika dziaržavy zatrymali, paviedamlaje Reuters.
Vajskoŭcy Burkina-Faso raspuścili ŭrad i Nacyjanalnuju asambleju — parłamient, a taksama zakryli miažy, paviedamlaje Reuters sa spasyłkaj na zajavu armii.
U zajavie miaciežnaha padpałkoŭnika Pol-Anry Sandaaho Damiby, začytanaj vajskoŭcami, havorycca, što pieravarot ździejśnieny «biez hvałtu, zatrymanyja znachodziacca ŭ biaśpiecy». Zajava była zroblena ad imia arhanizacyi «Patryjatyčny ruch za abaronu i adnaŭleńnie» (Patriotic Movement for Safeguard and Restoration; MPSR), u jakuju ŭvachodziać usie vajskovyja padraździaleńni.
Vajskoŭcy abviaścili, što prezident nie zdolny abjadnać nacyju dla supraćstajańnia vyklikam, jakija stajać pierad joj. Rok Mark Kryścijan Kabare kiravaŭ hetaj zachodnieafrykanskaj krainaj z kanca 2015 hoda.
Chvalavańni ŭ hetaj krainie adbyvalisia na fonie rehularnych niaŭdač uładaŭ u baraćbie z uzbrojenymi džychadystami. U krainie rehularna ŭčyniajucca masavyja zabojstvy. Za apošnija šeść hadoŭ u vyniku napadzieńniaŭ isłamistaŭ zahinuli tysiačy žycharoŭ krainy, nie mienš čym miljonu pryjšłosia pakinuć svaje damy. Pravaabarončyja hrupy paviedamlajuć ab masavym hvałcie i z boku vajskoŭcaŭ.
Burkina-Faso — kraina na zachadzie Afryki, byłaja francuzskaja kałonija pad nazvaj Vierchniaja Volta. Viadomy pabłažlivy vyraz «Vierchniaja Volta z rakietami» — heta ad jaje, bo da 1984 hoda tak zvałasia i niezaležnaja dziaržava. A Burkina-Faso — heta kambinacyja słoŭ adrazu ź dźviuch miascovych movaŭ, u pierakładzie aznačaje «radzima sumlennych ludziej».
Musulmanie składajuć tut bolšaść nasielnictva, kala 60%, ale jość šmat ludziej i inšych vieravyznańniaŭ. Da 2014 hoda Burkina-Faso kiravaŭ Błez Kampaare, adzin z najbolš zasiadziełych prezidentaŭ pry ŭładzie (z 1987 hoda). Ale 8 hadoŭ tamu jaho ad ułady adchilili, taksama padčas vajskovaha pieravarotu.
U Burkina-Faso vajskovy miaciež
Akaŭnt Kabančuka ŭzłamali — ale ci biełaruskija śpiecsłužby?11
Kamientary