SBU: Zatrymany biełaruski ahient, jaki płanavaŭ terakt u Kijevie
Padčas śpiecapieracyi siłaviki zatrymali žychara Kijeva, jaki sprabavaŭ padpalić aŭtamabil kala budynka adnoj z hramadskich arhanizacyj.
SBU śćviardžaje, što jon taksama datyčny da zapałochvańnia pradstaŭnikoŭ ŚMI i zamiežnych hramadzian.
Ukrainskaja śpiecsłužba apublikavała videa zatrymańnia čałavieka, jakoha nazvali ahientam.
Pavodle SBU, zatrymany pakidaŭ pahrozy i ładziŭ pravakacyi ŭ Kijevie, taksama paviedamlaŭ pra łžyvaje miniravańnie.
Ukrainskija śpiecsłužby taksama vyjavili, što zatrymany mieŭ dačynieńnie da arhanizacyi niesankcyjanavanych mitynhaŭ kala zamiežnych dypłamatyčnych pradstaŭnictvaŭ.
Taksama zatrymany źbiraŭ źviestki pra ŭkrainskich vajskoŭcaŭ z pamiežnych rajonaŭ.
Dziejańni «ahienta praciŭnika», pavodle papiarednich źviestak SBU, byli nakiravanyja na raschistvańnie ŭnutrypalityčnaj situacyi va Ukrainie i dyskredytacyju jaje pierad ES i hramadzianami Respubliki Biełaruś.
Pavodle śledstva, jon byŭ zavierbavany praz adnu z ananimnych hrup mesendžara «Telegram». Hrošy za dyviersijnuju dziejnaść atrymlivaŭ z-za miažy na bankaŭskuju kartku.
Śledčyja raspačali kryminalnuju spravu pa dvuch artykułach: dziaržaŭnaja zdrada i terakt.
Špijonski skandał razvaročvajecca na fonie niaprostych stasunkaŭ pamiž Ukrainaj i Rasijaj na fonie pahrozy ŭvarvańnia rasijskich vojsk na terytoryju Ukrainy. Pavodle zachodnich vyviedak, jano moža adbycca z terytoryi Biełarusi. Ciapier u Biełarusi prachodziać maštabnyja vajskovyja biełaruska-rasijskija vučeńni. Ukraina sa svajho boku taksama pačała vučeńni.
Tydzień tamu biełaruskija ŭłady abvinavacili Ukrainu ŭ špijanažy — nibyta ukrainski bieśpiłotnik 24 studzienia niezakonna pieralacieŭ biełaruskuju miažu i navat pralacieŭ 40 km uhłyb Biełarusi. Pasoł Ukrainy byŭ vyklikany z hetaj nahody ŭ MZS. Ukrainski bok nazvaŭ incydent «čarhovaj pravakacyjaj biełaruskich uładaŭ».
Kamientary