«Štadler Minsk» adpraŭlaje 60 čałaviek u prastoj na šeść miesiacaŭ
«Štadler Minsk» adpraŭlaje ŭ prastoj da vieraśnia 59 supracoŭnikaŭ zvaračnaj vytvorčaści, vynikaje z dakumienta, zdymak jakoha apynuŭsia ŭ rasparadžeńni redakcyi Zerkalo.io. Hetuju infarmacyju paćvierdzili niekalki rabotnikaŭ pradpryjemstva i pres-słužba.
![](http://nnexpictures.fra1.digitaloceanspaces.com/img/w732d4webp1/photos/z_2022_02/shtadler_20182606-3164-y0add.jpg.webp)
U słužbovaj zapiscy za podpisam načalnika zvaračnaj vytvorčaści Marsela Fraja na imia dyrektara pradpryjemstva «Štadler Minsk» Filipa Brunera vykładzienaja prośba z 1 sakavika pa 31 žniŭnia hetaha hoda abviaścić prastoj 59 rabotnikaŭ cecha.
Tłumačycca takaja nieabchodnaść epidemijałahičnaj situacyjaj, jakaja «pryviała da zboju ŭ pastaŭkach materyjałaŭ i kamplektujučych», i «častymi vypadkami zachvorvańnia na pradpryjemstvie, jakija niehatyŭna ŭpłyvajuć na vytvorčy praces».
Infarmacyju pra chutki prastoj paćvierdzili niekalki supracoŭnikaŭ pradpryjemstva. Pa słovach adnaho z rabotnikaŭ zvaračnaha cecha, u prastoj adpraŭlajuć prykładna pa 15 čałaviek kožnaj z čatyroch źmienaŭ. Paśla hetaha pracavać u adździele zvaračnaj vytvorčaści zastanucca 180 čałaviek.
«Tym, chto ŭ śpisie, adrazu skazali, što jany bolš nie patrebnyja i mohuć pisać zajavu pa pahadnieńni bakoŭ. A kali nie, to paŭhoda buduć atrymlivać 255 rubloŭ u miesiac (2/3 ad akładu) i zastanucca na prastoi da zakančeńnia kantrakta», — padzialiŭsia detalami situacyi rabotnik zavoda ŭ Fanipali.
Nizkija vypłaty źviazanyja z tym, što asnoŭnuju častku zarpłaty rabotnikaŭ pradpryjemstva, pa słovach dvuch surazmoŭcaŭ, składaje premija. Kali akład, jak praviła, nižejšy za 400 rubloŭ, to premija moža dasiahać minimum niekalkich tysiač rubloŭ.
![](http://nashaniva.com/img/w732d4webp1/photos/z_2022_02/shtadler_prostoj2-aqkky.jpg.webp)
«Štadler Minsk» uvieś minuły hod vykonvaŭ biahučyja zamovy. Napierad ničoha nie było. Mnohija zakazčyki admaŭlalisia ad našaha padraździaleńnia z-za palityki. Zaraz zamovy źjavilisia. Ale varyć kuzavy pavinny pačać pa płanie ŭ kancy žniŭnia — pačatku vieraśnia. Da hetaha momantu ŭ chłopcaŭ prosta niama pracy», — raskazaŭ adzin z zavadčan.
U pres-słužbie kampanii «Štadler Minsk» paćvierdzili, što taki dakumient sapraŭdy isnuje, i, jak u im paznačana, niekatorych rabotnikaŭ adpraŭlajuć u prastoj.
«U suviazi z epidemijałahičnaj situacyjaj, składanaściaŭ z-za zatrymak pastavak materyjałaŭ i kamplektujučych. Heta, niesumnienna, upłyvaje na vytvorčy praces», — patłumačyli ŭ kampanii.
Ale tam nie stali kamientavać infarmacyju, što rabotnikam, jakija buduć u prastoi, nie płanujuć padaŭžać kantrakty.
Biełaruski zavod šviejcarskaha vytvorcy ciahnikoŭ «Štadłnr Minsk» zapracavaŭ u Fanipali ŭ 2014 hodzie, staŭšy adnym z najbujniejšych padatkapłacielščykaŭ Dziaržynskaha rajona.
Kamientary