«Skałanie ŭvieś śviet». ŚMI pra napad Rasii na Ukrainu

Le Monde: «Vinavaty Pucin»

Francuzskaje miedyja piša pra toje, jak ciapierašniaja vajna adroźnivajecca ad raniejšych padziej va Ukrainie: «Bolš niama zialonych čałaviečkaŭ, jak u Krymie ŭ 2014 hodzie. Razhortvańnie sił bolš nie prykryvajuć bajcami dźviuch maryjanietačnych respublik Danbasa. Na hety raz Uładzimir Pucin viadzie vajnu ŭ adkrytuju. Jaje meta nie chavajecca: złamać Ukrainu. I jaho pahrozy lubomu, chto navažycca hetamu procistajać, niedvuchsensoŭnyja: «Zaraz niekalki važnych, vielmi važnych słoŭ dla tych, u kaho moža ŭźniknuć spakusa z boku ŭmiašacca ŭ padziei, jakija adbyvajucca. Chto b ni sprabavaŭ pieraškodzić nam, a tym bolš stvarać pahrozy dla našaj krainy, dla našaha naroda, pavinny viedać, što adkaz Rasiei budzie nieadkładnym i pryviadzie vas da takich nastupstvaŭ, ź jakimi vy ŭ svajoj historyi jašče nikoli nie sutykalisia. My hatovyja da luboha raźvićcia padziej. Usie nieabchodnyja ŭ hetaj suviazi rašeńni pryniatyja. Spadziajusia, što ja budu pačuty», — žorstka zajaviŭ jon u karotkaj pramovie ab pačatku apieracyi — a faktyčna ŭ abviaščeńni vajny». 

Le Monde źviartaje ŭvahu na dźvie pieramieny ŭ palitycy Pucina paśla jaho prychodu da ŭłady ŭ 2000 hodzie. Pieršaja ź ich — usio bolš vyrazny pavarot da aŭtarytaryzmu. Druhaja ž źmiena źviazanaja z pavarotam u staŭleńni da Ukrainy. Z časoŭ Aranžavaj revalucyi 2004 hoda ŭkrainskaja demakratyja stała sapraŭdnym voraham Kramla, Maskva ŭsprymaje raźvićcio hetaj krainy jak pahrozu ŭłasnamu isnavańniu.

«Treba taksama napisać jasna i adnaznačna: Uładzimir Pucin adkazny za hety kanflikt. Nijakaja nieaściarožnaść Zachadu, nijakaja histaryčnaja pamyłka, nivodzin z arhumientaŭ rasijskaha režymu i jaho kleŭretaŭ nie mohuć apraŭdać toj napad, jaki adbyŭsia».

The Wall Street Journal: «Vajna va Ukrainie kładzie kraj jeŭrapiejskaj mary ab siabroŭstvie z Rasijaj»

Jak pišuć aŭtary resursu, siarod pieršych achviar napadu Rasii na Ukrainu akazalisia 30 hadoŭ spadziavańniaŭ Jeŭropy na toje, što Rasija moža być nadziejnym partnioram: «Rasijskaja ataka na Ukrainu aznačaje kaniec šmathadovych namahańniaŭ Jeŭropy, nakiravanych na pahłybleńnie ekanamičnych i dypłamatyčnych suviaziaŭ, jakija praciahvalisia, navat kali Uładzimir Pucin rabiŭsia ŭsio bolš ahresiŭnym susiedam».

Zaraz, pišuć aŭtary WSJ, źjaviacca bolš žorstkija sankcyi ŭ bok Rasii, paralelna z hetym dypłamaty buduć sprabavać damahčysia pieramirja, a ŭkrainskim biežancam buduć dapamahać. Resurs taksama farmuluje pytańnie da jeŭrapiejskich demakratyčnych krain, jakoje, na dumku žurnalistaŭ, moža vyznačyć kirunak nastupnaj epochi ŭ historyi kantynienta: «Jak spravicca z Rasijaj, jakaja adkryta abviaściła, što choča pierapisać kaniec chałodnaj vajny, i zaraz padmacoŭvaje svajo žadańnie siłaj?»

Al Jazeera: «Panika, strach i stojkaść va Ukrainie padčas uvarvańnia Rasii»

Adzin z asnoŭnych artykułaŭ Al Jazeera pa temie rasijskaha napadu — heta repartaž pra toje, jak va ŭkrainskich haradach usprymajuć pačatak bajavych dziejańniaŭ.

Kijeŭski karepandent vydańnia piša pra toje, što ad huku vybuchaŭ i pavietranaj tryvohi niekatoryja ludzi pačali panikavać i šukać bambaschoviščy. Chacia miascovyja ŭłady i źviarnulisia da žycharoŭ z zaklikam nie pakidać damoŭ, na vyjezdach z horada utvarylisia vializnyja zatory. Tym nie mienš, chacia ludzi i pakidajuć Kijeŭ, razmovy pra masavuju paniku nie idzie.

Surazmoŭca Al Jazeera śviedčyć, što ŭ Kijevie niama ni paniki, ni krytyčnych prablem ciapier: «Hramadski transpart pracuje jak raniej. Adzinaje, što sapraŭdy źmianiłasia, heta toje, što škoły, univiersitety i dziciačyja sady zakrytyja, a špitali znachodziacca napahatovie, bo parłamient abviaściŭ vajennaje stanovišča».

Guardian: «Pucin zahłušyŭ apošnija prośby ab miry»

Bujnoje brytanskaje miedyja pryśviačaje artykuł apisańniu pasiadžeńnia Rady biaśpieki AAN, što prachodziła ŭnačy z 23 na 24 lutaha.

«Hetaje pasiadžeńnie zastaniecca ŭ historyi AAN jak adno z samych siurrealistyčnych. Bo taja samaja vajna, jakuju pasiadžeńnie pavinna była praduchilić, raspačałasia jakraz padčas jaje.

Uładzimir Pucin, biaźlitasna raźličyŭšy čas, vystupiŭ z pramovaj i abviaściŭ, što Rasija raspačynaje va Ukrainie «śpiecyjalnuju vajennuju apieracyju» — u toj samy čas, kali prachodziła terminovaje pasiadžeńnie Rady biaśpieki».

Kali nadyšoŭ čas havaryć pradstaŭniku Rasii Vasilu Niabienzi, Pucin užo vystupiŭ, i namiery Maskvy bolš nie zastavalisia sakretam: «Niabienzia, jaki tydniami vyśmiejvaŭ zachodnija krainy za ich «isteryčnyja» papiaredžańni pra budučuju vajnu, ciapier pačaŭ śćviardžać, što nasamreč toje, što razvaročvajecca na vačach, — heta nie vajna. Heta «śpiecyjalnaja vajennaja apieracyja» z metaj abaranić narod Danbasa».

Reuters: «Samaja ciomnaja časina Jeŭropy paśla Druhoj suśvietnaj»

U svajoj karespandencyi pra pačatak rasijskaha napadu aŭtary Reuters źviartajuć uvahu na jaho ekanamičnyja nastupstvy: «Rasija — adzin z najvialikšych vytvorcaŭ enierhii ŭ śviecie, jana i Ukraina — adny z hałoŭnych eksparcioraŭ ziernia. Pierśpiektyva vajny i sankcyj pahražaje ekanomikam va ŭsim śviecie, jakija, pakul adychodziać ad nastupstvaŭ pandemii, i tak adčuvajuć pieraboi z pastaŭkami».

Biržavyja kaciroŭki ruchnuli, ceny na dalar i zołata, naadvarot, uźlacieli. Cana na naftu marki Brent upieršyniu za čas z 2014 hoda padniałasia vyšej za 100 dalaraŭ za baral. Taksama, jak śviedčyć Reuters, jak minimum try vialikija pakupniki rasijskaj nafty śviedčać, što zachodnija banki admovili im u akredytyvach, nieabchodnych dla apłaty nafty.

CNN: «Čamu napad Pucina na Ukrainu, jakoha doŭha bajalisia, skałanie Amieryku i ŭvieś śviet»

Amierykanski resurs ličyć, što nastupstvy napadu Rasii na Ukrainu buduć mieć hłabalny charaktar: «Ataka Pucina na Ukrainu, jakoj doŭha bajalisia, recham adhuknucca daloka za miežami Rasii i jaje demakratyčnaha susieda. Jana vyklikaje nastupstvy, siarod jakich buduć balučyja skački ŭ i tak vysokich cenach na paliva dla ludziej, jakija sprabujuć spravicca z nastupstvami takoj pandemii, jakaja byvaje raz u stahodździe. Hetaja ataka moža adnavić chałodnuju vajnu, jakaja niekali zdavałasia pieražytkam historyi, bo praź jaje ŭźniknie novaje i niebiaśpiečnaje supraćstajańnie ZŠA i Rasii — dźviuch samych vialikich jadziernych dziaržaŭ śvietu».

CNN źviartaje ŭvahu, što dziejańni Pucina staviać ZŠA va ŭmovy niečakanaha kryzisu. Amierykancam dakładna varta čakać rostu inflacyi i cen na paliva. Vašynhton, napeŭna, taksama nakiruje svaich vajskoŭcaŭ u Jeŭropu, kab padtrymać sajuźnikaŭ. Jość imaviernaść, što ZŠA buduć finansavać paŭstancki ruch va Ukrainie. Ataka Pucina — heta vyklik statusu ZŠA jak źvierchdziaržavy i amierykanskaj kancepcyi demakratyčnaha śvietu.

• 0
• 0
• 0
• 0
• 0
• 0
• 0
• 0