Spartoŭcy Biełarusi abmiažujucca čempijanatami ADKB

Jak biełaruskija, tak i rasijskija spartoŭcy ŭžo adčuli na sabie sankcyi ŭ samych roznych vidach sportu. Suśvietnyja fiederacyi viesłavańnia, łyžnaha sportu, valejboła, tryatłona, kanoe, stralby i badmintona adchilili atletaŭ z Rasii i Biełarusi ad udziełu u mižnarodnych spabornictvach.

Viełasipiedysty i tenisisty z abiedźviuch krain ciapier nie zmohuć udzielničać u mižnarodnych kamandnych spabornictvach, a ŭsie mierapryjemstvy ŭ hetych vidach sportu, jakija płanavalisia ŭ Rasii i Biełarusi, prybranyja ź mižnarodnaha kalendara. Pry hetym asobnyja viełasipiedysty z Rasii i Biełarusi mohuć i dalej spaborničać, ale ŭ statusie niejtralnych atletaŭ.

Mižnarodnaja fiederacyja płavańnia taksama dazvoliła spartoŭcam z abiedźviuch krain vystupać tolki ŭ niejtralnym statusie. Mižnarodnyja fiederacyi rehbi i kańkabiežcaŭ całkam adchilili rasijskich i biełaruskich atletaŭ ad udziełu u turnirach pad svajoj ehidaj.

Alimpijski ruch

U kancy minułaha tydnia vykankam Mižnarodnaha alimpijskaha kamiteta zaklikaŭ nie vykarystoŭvać dziaržściahi Rasii i Biełarusi na lubych spabornictvach, a taksama prapanavaŭ mižnarodnym fiederacyjam pieranieści ci admianić mierapryjemstvy, zapłanavanyja ŭ hetych krainach.

MAK zasnavaŭ svaju paradu na tym, što na momant napadu na Ukrainu jašče nie skončyłasia alimpijskaje pieramirje, jakoje doŭžycca da 20 sakavika.

28 lutaha MAK uvohule rekamiendavaŭ mižnarodnym spartovym fiederacyjam i arhanizataram spabornictvaŭ nie dapuskać da ŭdziełu ŭ ich spartoŭcaŭ z Rasii i Biełarusi. Kali ž pa niejkich pryčynach vykanać hetuju rekamiendacyju nielha, MAK prapanuje dapuskać ich da ŭdziełu pad niejtralnymi ściahami.

Admietna, što praz dopinhavy skandał rasijskija atlety i tak vystupajuć na alimpijadach pad niejtralnym ściaham, ale apošni krok MAK uvohule stavić pierad spartoŭcami pierśpiektyvu zastacca biez spabornictvaŭ.

Što da spabornictvaŭ, dzie ŭžo pozna zabaranić udzieł spartoŭcam z Rasii i Biełarusi, to chutčej za ŭsio, tut mielisia na ŭvazie Paralimpijskija hulni ŭ Piekinie. Zhodna z rekamiendacyjaj MAK, u takim vypadku atlety pavinny byli b vystupać pad niejtralnym ściaham.

Tak i adbyłosia: 2 sakavika stała viadoma, što pa rekamiendacyi Mižnarodnaha paralimpijskaha kamiteta spartoŭcy z Rasii i Biełarusi vystupiać na Paralimpijadzie ŭ Piekinie pad niejtralnym ściaham. Ich vyniki nie buduć uklučanyja ŭ miedalnuju tablicu.

A 3 sakavika paralimpijcam z Rasii i Biełarusi ŭvohule zabaranili prymać udzieł u Hulniach. Siarod pryčyn — toje, što spartoŭcy z šerahu inšych krain vykazali niežadańnie spaborničać z hetymi atletami.

Bijatłon

U biełaruskaha bijatłona, jaki ŭ svoj čas prynosiŭ krainie stolki miedaloŭ i honaru, ciapier vialikija ciažkaści. Suśvietny sajuz bijatłanistaŭ IBU abviaściŭ na vychadnych, što zbornyja z Rasii i Biełarusi buduć dapuščanyja da etapaŭ Kubka śvietu i Kubka IBU tolki jak niejtralnyja spartoŭcy. 

Urad Estonii jak haspadar adnaho z etapaŭ uvohule admoviŭsia puskać na spabornictvy jak rasijan, tak i biełarusaŭ. IBU nie staŭ piarečyć.

Jak śviedčyć Fond spartovaj salidarnaści, biełaruskija čynoŭniki nie zachacieli bačyć svaich bijatłanistaŭ u niejtralnym statusie. Ministr sportu krainy Siarhiej Kavalčuk zahadaŭ atletam nie vystupać na etapach Kubka śvietu i Kubka IBU, jakija pravodziacca ŭ hetym siezonie, a zamiest hetaha vyjechać u Biełaruś. Rasijskija spartoŭcy taksama admovilisia ad praciahu siezona.

Ale ž u miedyja ŭžo hučać śviedčańni pra toje, jakim budzie bližejšy turnir dla biełaruskich bijatłanistaŭ. U kancy sakavika — pačatku krasavika ŭ Ciumieni projdzie čempijanat Rasii pa bijatłonie, na jaki płanujuć zaprasić i biełarusaŭ.

Chakiej

Jašče adzin papularny ŭ Biełarusi vid sportu, i jašče adny žorstkija sankcyi. 28 lutaha Mižnarodnaja fiederacyja chakieja (IIHF) zabaraniła ŭsim chakiejnym kamandam i kłubam z Rasii i Biełarusi ŭdzielničać u lubych mierapryjemstvach pad ehidaj arhanizacyi. Što da Biełarusi, naša kraina stracić pierš za ŭsio mahčymaść hulać na bližejšym čempijanacie śvietu pa chakiei, na anałahičnym moładzievym turniry, a taksama na Kantynientalnym kubku pa chakiei (tudy nie trapić biełaruski kłub «Homiel»).

Rasija, akramia ŭdziełu ŭ turnirach, straciła taksama prava prymać junijorski čempijanat śvietu pa chakiei, zapłanavany na kaniec śniežnia 2022 — pačatak studzienia 2023 hoda.

Čytajcie jašče:

Jak suśvietny sport padtrymlivaje Ukrainu

U Biełarusi — srebra pa alimpijskich miedalach, adabranych praz dopinh. Voś jak my da hetaha dajšli

• 0
• 0
• 0
• 0
• 0
• 0