«Heta budzie armija, jakaja paźniej vyzvalić Biełaruś». Były biełaruski amapaviec dałučyŭsia da bataljona Kalinoŭskaha
Pavieł Kułažanka, čałaviek ź nieadnaznačnaj reputacyjaj, tydzień tamu zrabiŭ adnaznačny vybar. Ën pryjechaŭ va Ukrainu, kab vajavać na jaje baku suprać rasijskaj armii.
Pavieł Kułažanka — asoba ź nieadnaznačnaj reputacyjaj. Jon naležyć da ruchu «Supraciŭ», jaki ŭźnik paśla vybaraŭ 2020 hoda. U Biełarusi Pavieł žyŭ da 2011-ha, słužyŭ va ŭnutranych vojskach i AMAPie. Ciapier jon zrabiŭ adnaznačny vybar — pajechaŭ dobraachvotnikam va Ukrainu. Mužčyna pierakanany, što biełaruski bataljon Kalinoŭskaha stanie vojskam, jakoje ŭ budučyni vyzvalić Biełaruś, piša «Radyjo Svaboda».
Chto taki były amapaviec Pavieł Kułažanka, jaki sprabuje stać radykalnym palityčnym lidaram?
Pavieł raskazvaje, što vylecieŭ z ZŠA na nastupny dzień, jak atrymaŭ vizu. Paśla niekalkich dzion u Varšavie, dzie mieścicca Centr biełaruskich dobraachvotnikaŭ, trapiŭ u Kijeŭ.
«Heta čas vybaru dla ŭsich nas. Kali jon nastupaje, to treba vyznačacca — chto vy. Ja razumieju, što biez svabodnaj Ukrainy nie budzie i svabody ŭ Biełarusi. Dla mianie jak dla biełarusa heta histaryčny šaniec. I kali my jaho prapuścim, to nieviadoma, kali jon nastanie znoŭ. Ukraina — heta adzinaja kraina śvietu, jakaja daje placoŭku dla farmavańnia ŭ budučyni biełaruskaha vyzvolnaha vojska, jakoje farmujecca na bazie bataljona Kastusia Kalinoŭskaha», — kaža Pavieł Kułažanka.
Pieršaj zadačaj biełaruskich dobraachvotnikaŭ jon nazyvaje vyzvaleńnie Ukrainy ad rasijskich zachopnikaŭ, ale kancavym prypynkam dla biełarusaŭ z bataljona jon nazyvaje Biełaruś i «znos łukašysckaha režymu».
«Apošniaja apora Łukašenki — siłaviki. Kali jon pašle ich va Ukrainu, a adsiul pojduć nazad truny, to jon stracić i hetuju apošniuju aporu. Jany ŭžo bačyli, što tut robiać z rasijskimi akupantami, ź imi tut zrobiać toje samaje», — kaža Pavał.
Pavodle Kułažanki, bataljon Kalinoŭskaha vałodaje ŭsioj infarmacyjaj pra toje, jakija vojski skancentravanyja pa toj bok biełaruskaj miažy, jakaja ŭ ich zbroja i adzinki braniatechniki.
«Kali jany zachočuć siudy pryjści ź niadobrymi namierami, to ich čakaje škvalny ahoń i «Bajraktary» (tureckija bieśpiłotniki), i jany ŭsie buduć źniščanyja», — kaža Pavieł.
Na siońnia ŭ bataljonie Kastusia Kalinoŭskaha, pavodle Paŭła Kułažanki, bolš za sotniu bajcoŭ. Na nastupnym tydni čakajecca prybyćcio čarhovaj hrupy.
«Užo jość palityčnaje rašeńnie nakont pašyreńnia našaha farmavańnia. Prabivajem ułasnuju bazu dla trenirovak. Da nas tut vielmi dobraje staŭleńnie, pamiatajuć raniejšy dośvied ź biełarusami», — kaža Pavał.
«U nas mocny kalektyŭ, jaki stvaraje štab kamandavańnia bataljona. Kalektyŭ dobra asensoŭvaje svaje mety, u tym liku kančatkovuju, i robić usio, kab hetaje farmavańnie pašyryłasia. My robim usio dla kancentracyi resursaŭ u adnym miescy».
Biełarusy na ŭkrainskim baku ŭdzielničajuć siońnia ŭ roznych farmavańniach, ale bataljon Kalinoŭskaha — najbujniejšy.
Bajcy bataljona ŭžo ŭdzielničali ŭ bajavych apieracyjach. I siońnia dźvie čarhovyja hrupy vyjšli na bajavoje zadańnie.
Što čakaje Biełaruś u bližejšyja piać hadoŭ? A Rasiju i Jeŭropu? Śpiecdakładčyk AAN pa Biełarusi daje svoj raskład7
Kamientary