Navukoŭcy prapanujuć vykarystoŭvać bulboŭnik dla vytvorčaści kaśmietyki

Jak paviedamlaje Daily Mail, daśledčyki z Abierdzinskaha ŭniviersiteta źviarnuli ŭvahu na toje, što bulboŭnik vyznačajecca vysokim utrymańniem rečyva pad nazvaj sałaniezoł (solanesol). Hety kampanient žyćciova nieabchodny dla vytvorčaści kaenzimu Q10 — mahutnaha antyaksidanta, jaki dobra viadomy ŭsim amataram jakasnaha dohladu za saboj.

Q10 adyhryvaje klučavuju rolu ŭ padtrymańni zdaroŭja i maładości skury, tamu jaho aktyŭna dadajuć u darahija amaładžalnyja syrovatki i ŭvilhatniajučyja kremy.

Akramia taho, u «śmiećci» z bulbianych paloŭ byŭ znojdzieny vitamin K2, jaki zvyčajna pradajecca ŭ vyhladzie tabletak i adkazvaje za mietabalizm kalcyju i vypracoŭku kałahienu.

Na dadzieny momant kaśmietyčnyja kampanii atrymlivajuć sałaniezoł pieravažna z tytuniovych raślin. Prablema ŭ tym, što popyt na jaho rezka vyras: z prykładna 4 tysiač ton na pačatku 2000‑ch da kala 66 tysiač ton u 2022 hodzie. Tamu i źjaviłasia ideja šukać alternatyvu.

Prajekt, jaki atrymaŭ nazvu Phytocosmo, navukoŭcy realizujuć razam ź fiermierami pry padtrymcy dziaržaŭnaha Fondu pa padtrymcy daśledavańniaŭ i inavacyj. Im nieabchodna vyśvietlić, jakija hatunki bulby nazapašvajuć najbolš sałaniezołu, jak najlepš źbirać i zachoŭvać bulboŭnik, i jakaja schiema vydzialeńnia hetaha rečyva budzie ekanamična najbolš apraŭdanaj.

Kali prajekt budzie paśpiachovym, vytvorcy kaśmietyki zmohuć uklučać u svaje srodki inhredyjenty, atrymanyja sa zvyčajnaj bulby. Heta adkryvaje novyja pierśpiektyvy dla fiermieraŭ: zamiest taho kab prosta vykidvać baćvińnie, jany zmohuć pieratvaryć jaho ŭ novuju krynicu dachodu i adnačasova pamienšyć kolkaść sielskahaspadarčych adkidaŭ.

Varta adznačyć, što heta nie pieršy vypadak, kali navuka źviartaje ŭvahu na kaśmietyčny patencyjał bulby. Raniejšyja daśledavańni ŭžo namiakali na karyść hetaha karniapłodu dla skury. Naprykład, u navukovaj pracy, apublikavanaj u 2019 hodzie, śćviardžałasia, što apracoŭka skury ekstraktam bulbianoha łupińnia značna pavialičvaje vypracoŭku kałahienu — białku, niedachop jakoha robić skuru mienš pruhkaj i bolš marščynistaj.

Zrešty, u narodnych receptach bulba daŭno žyvie jak «chatni kaśmietołah» dla baraćby z hipierpihmientacyjaj, ciomnymi kruhami pad vačyma i akne. Isnuje navat mierkavańnie, što zvyčajnaje bulbianoje piure, źmiašanaje ź limonnym sokam, dapamahaje razhładžvać drobnyja zmorščyny vakoł vačej, tak zvanyja «husinyja łapki». Praŭda, z chatnimi mietadami, jak zaŭsiody, varta być aściarožnymi: u ich redka viadomaja dakładnaja kancentracyja aktyŭnych rečyvaŭ, dy i skura moža adreahavać razdražnieńniem.

• 1
• 0
• 1
• 0
• 0
• 0
• 0
• 0