Viersija Čałaha: Łukašenka viedaje pra płany Pucina pa vajnie ź Jeŭropaj, tamu vyvodzić hrošy
U svaim novym videa ekanamist Siarhiej Čały robić analiz apošniaha zamiežnaha turne Łukašenki i prapanuje try viersii — małaimaviernuju, abnadziejvajučuju i piesimistyčnuju.
Čały razvažaje pra vizit Łukašenki z synami ŭ Aman i Ałžyr: u rehijonie, dzie «hrošy lubiać cišyniu», takija farmaty zvyčajna śviedčać pra karupcyjnyja damoŭlenaści i asabistyja hiešefty kirujučych siemjaŭ.
Adnak tryvožnym sihnałam Čały paličyŭ «niazvykłuju paśpiešlivaść», jakuju pačali tranślavać biełaruskija ŭłady.
Čały zaŭvažaje, što rytoryka čynoŭnikaŭ i samoha Łukašenki źmianiłasia: ciapier ad usich patrabujuć nievierahodnaha paskareńnia.
Jon cytuje słovy ministra zamiežnych spraŭ Maksima Ryžankova:
«Jon ad nas usich patrabuje paskaracca. Jak jon kaža: žyćcio takoje, što kali chočaš być napieradzie, to treba biehčy».
I paŭtaraje słovy pres-sakratarki dyktatara Natalli Ejsmant:
«Hałoŭnaje słova, jakoje my čujem ad Łukašenki, heta tempy. Ničoha nie pavinna pieraškadžać. Temp, temp, temp. Śfiery vyznačanyja, prajekty jość. Ale patrebnyja tempy. Čas ciapier taki, što treba nie iści, a biehčy».
Analityk źviartaje ŭvahu i na słovy samoha Łukašenki, vykazanyja padčas sustrečy z premjeram Ałžyra:
«Hrošy siońnia, a zaŭtra tym bolš, ničoha nie značać. Vy ž bačycie, što adbyvajecca. Žachlivaja inflacyja pa asnoŭnych reziervovych valutach u śviecie. Treba śpiašacca, treba śpiašacca. Ni ŭ jakim razie nielha marudzić, čas taki».
Jašče adzin momant, na jaki źviartaje ŭvahu Čały, analizujučy vystupleńni Łukašenki — źmianieńnie ŭ časavym haryzoncie płanaŭ Łukašenki. Pa jaho nazirańniach, padčas pajezdki ŭ Aman i Ałžyr pastajanna hučaŭ termin «hod-dva», jak niejki dedłajn.
«Na pieramovach z prezidentam Ałžyra: «My pavinny ŭ najbližejšyja hod-dva vyjści na tavaraabarot chacia b u paŭmiljarda dołaraŭ». A voś užo prezident Amanskaha inviestycyjnaha ahienctva supakojvaje Łukašenku:
«U najbližejšyja hod-dva vy ŭbačycie realny ruch pa tych kankretnych prajektach, jakija my z vami paznačyli», — zaŭvažaje Čały i zhadvaje, što roŭna hod tamu padčas svaich pieradvybarnych pajezdak pa šmatlikich «Dažynkach» Łukašenka davaŭ inšy časavy haryzont — dva-try hady.
«Niešta mnie padkazvaje, što havorka idzie pra adzin i toj ža časavy haryzont. Prosta za hod my da jaho nablizilisia».
Čały taksama nahadvaje pra słovy Łukašenki, što treba pieradać krainu dzieciam.
Na pasiadžeńni Rady biaśpieki 9 śniežnia Łukašenka skazaŭ: «My pavinny abaranić svaju krainu. I abaranić toje, što naležyć, moža być, užo nie nam, a našym dzieciam».
Try viersii Čałaha: małaimaviernaja, abnadziejvajučaja i piesimistyčnaja
Sprabujučy patłumačyć hety zahadkavy dedłajn, analityk prapanuje try viersii.
Pieršaja, jakuju jon nazyvaje «małaimaviernaj», źviazanaja ź ciskam na Łukašenku (jak źniešnim, tak i ŭnutranym) z «boku tych, chto zastaŭsia niezadavoleny jaho padmanam sa źmienaj pakaleńniaŭ, pad jakoj razumieŭsia jaho sychod, a ŭ vyniku ŭsio źviałosia da pierastanovak niekalkich fihur va ŭradzie».
U hetym vypadku havorka moža iści pra varyjanty sychodu — ad pieramiaščeńnia na pasadu va UNS da ŭciokaŭ z krainy.
Druhaja viersija — «varyjant, źviazany sa ŭstojlivaj niazdolnaściu da vykanańnia svaich abaviazkaŭ pa stanie zdaroŭja». Hetaja viersija, na dumku Čałaha, lepš za ŭsio tłumačyć turbotu Łukašenki z nahody spadčyny.
«Ja voś prosta ŭjaŭlaju sabie, jak, pakazvajučy na dvuch synoŭ, jon kaža šejchu ci sułtanu: «Hrošy addasi tolki kali hetyja pryjduć udvuch, kožny sa svaim klučom, i paviernuć ich adnačasova». Heta najlepšy sposab harantavać jak zachavanaść srodkaŭ, tak i zachavanaść synoŭ».
I narešcie treciaja, «piesimistyčnaja» viersija.
Analityk zhadvaje słovy prapahandysta Ihara Tura: «U siabie my pa abjektyŭnych pryčynach vyrablać u abjomach bolš užo nie možam, my možam vyrablać naša ŭ našych partnioraŭ».
«Heta značyć, kali raniej Łukašenka damaŭlaŭsia pra «zamiežnyja» inviestycyi ŭ Biełaruś, to ciapier jon damaŭlajecca pra adtok kapitału ź Biełarusi. Pryčym terminova», — rasšyfroŭvaje pasył prapahandy Čały i zadaje pytańnie:
«Z-za jakoj takoj padziei Biełaruś moža raptam stać niebiaśpiečnaj krainaj dla ŭkładańnia hrošaj Łukašenki, faktyčna jaje adnaasobnaha fieadalnaha praviciela?»
Pavodle analityka, pryčyna ŭ tym, što
«Łukašenka viedaje pra płany Pucina pa vajnie ź Jeŭropaj. Pra jakuju ŭžo i sam Pucin vykazvajecca hranična adkryta».
Dla padmacavańnia svajoj dumki Čały zhadvaje słovy Pucina na inviestycyjnym forumie «Rasija kliča». Prezident Rasii, adkazvajučy na pytańnie žurnalista, jak jon stavicca da taho, što NATA zmoža pryvieści svaje vojski ŭ poŭnuju bajavuju hatoŭnaść da 2029 hoda, zaŭvažyŭ:
«Kali Jeŭropa raptam zachoča z nami vajavać i pačnie, my hatovyja prosta ciapier. Nu, heta ž nie Ukraina. Z Ukrainaj my dziejničajem chirurhičnym sposabam, akuratnieńka. (…) Heta nie vajna ŭ pramym, sučasnym sensie hetaha słova. A kali Jeŭropa raptam zachoča pačać z nami vajnu i pačnie jaje, to moža vielmi chutka adbycca situacyja, pry jakoj nam nie budzie z kim damaŭlacca»
Analityk padkreślivaje: havorka idzie nie abaviazkova pra poŭnamaštabnuju vajnu, a chutčej pra scenar, kali Rasija «zachoplivaje častku terytoryi adnoj z susiednich krain», abviaščaje heta «vyzvaleńniem», i dalej dekłaruje hatoŭnaść «abaraniać».
Ciapier čytajuć
Poŭny śpis palitviaźniaŭ, vyzvalenych 13 śniežnia7
Kamientary
Naprykład viedajem, što byŭ u čarnasocienskaj partyi Słavianski sabor «Biełaja Ruś», tamu dalej baicca biełaruskaj movy i trymajecca svajoj rasiejsaj. Ale niama infarmacyi, što zakončyŭ ekanamičny kirunak.