Što pahladzieć. «Raździaleńnie» — hipnatyzujučy ofisny tryler z vysokimi rejtynhami i zachoplenymi vodhukami
Na Apple TV+ vyjšaŭ sieryjał «Raździaleńnie» pra śviet, dzie čypy prymušajuć ofisnych klerkaŭ zabycca na žyćcio za ścienami karparacyj. Hledziačy pa rejtynhach, hetaja historyja začaravała jak krytykaŭ, tak i hledačoŭ.
… Maładaja žančyna pračynajecca na stale ŭ zamknionym pakoi. Jana nie pamiataje, chto jana i adkul, nie viedaje koler vačej ułasnaj maci, usio, što jana maje — heta hołas z hučnahavaryciela, jaki, zdajecca, viedaje, što ź joj adbyvajecca.
Heta Chiejli, novaja supracoŭnica kampanii Lumon. Nieviadoma, čym zajmajucca ŭ hetaj karparacyi, i ci maje hetaja praca ŭvohule niejki sens.
Ale ž hetyja ludzi pravodziać u jaje ścienach pa 40 hadzin na tydzień, i na praciahu hetaha času jany zabyvajuć usio pra siabie — pra tych, kim jany byli ŭ zvyčajnym žyćci. A kali supracoŭniki Lumon viartajucca dachaty, jany, naadvarot, zabyvajuć usio, što było na pracy, nibyta pasłuchmianyja šrubki karparatyŭnaj sistemy.
Za dobruju pracu klerki atrymoŭvajuć uznaharodu — naprykład, vafli ci muzykalnyja paŭzy.
Ale dla niekatorych ź ich važniej prostaja mahčymaść zabycca pra zvyčajnych siabie i na čas pracy pierasialicca ŭ inšy śviet.
Taki, naprykład, hałoŭny hieroj «Raździaleńnia» Mark, jaki straciŭ žonku ŭ aŭtakatastrofie i pakutuje ad depresii. Lumon daje jamu mahčymaść zapoŭnić svajo žyćcio składvańniem na ekranie ličbaŭ u virtualnyja skrynački i nie viedać, što pa viečarach jon zahłušaje svoj bol ałkaholem.
«Raździaleńnie» ciažka adnaznačna adnieści da fantastyki — chutčej, heta historyja pra realnaść, daviedzienaja da absurdu.
Niaciažka ŭjavić sabie čałavieka, jaki b šukaŭ u pracy ci to suciašeńnia ad ułasnaha hora, ci to ŭciokaŭ ad niečaha, navat ad samich siabie.
«Raździaleńnie» prosta davodzić hetuju situacyju da absalutnaha absurdu, kali kožny bok atrymoŭvaje toje, čaho jamu nibyta chočacca: karparacyja — pasłuchmianaha raba, čałaviek — doŭhačakanaje zabyćcio.
Ale ž niešta idzie nie tak. Za ścienami Lumon prachodziać pratesty suprać biesčałaviečnych mietadaŭ kampanii, dy i sami jaje supracoŭniki vyrašajucca na bunt. Usiamu vinoj taja samaja Chiejli, jakaja nie moža pahadzicca na ŭmovy kampanii, jakaja bačyć niełahičnaść i biessensoŭnaść svaich pracoŭnych abaviazkaŭ u Lumon.
Klerki aśmielvajucca na pratest, niahledziačy na toje, što zvolnicca z kampanii niemahčyma (usie zhody zafiksavanyja na videa), a za lubuju pravinnaść supracoŭnikaŭ čakaje strohaje pakarańnie.
Karparacyi nie dapamahaje ni toje, što da zasnavalnika karparacyi prymušajuć stavicca amal jak da niabiesnaj istoty, ni toje, što vinavatyja ŭ niečym klerki vymušanyja čytać pakajannyja malitvy.
Čałaviek nie moža być prosta elemientam pazła, jon našmat bolš składanaja istota, jakaja maje prava na ščaście i na ŭłasnyja pačućci. A kali čałaviek hetaha nie atrymlivaje — jon budzie za heta zmahacca, navat kali pamiać pra sapraŭdnaje ściortaja.
Hetaja historyja spačatku raźvivajecca pavolna, niby ŭ śnie — vidać, u tym ža, u jakim znachodziacca hałoŭnyja hieroi. Ale z kožnaj chvilinaj dziejańnie paskarajecca, i bližej da kanca sieryjał vychodzić na nadta dynamičny ŭzrovień… i niedzie na im abryvajecca. Raźviazka zastajecca adkrytaj — na pytańni, što stavić sieryjał, hladač vymušany adkazvać sam.
Rejtynhi na suśvietnych resursach
IMDB — 8,7 / 10
Rotten Tomatoes — 98%
«Našu Nivu» finansujuć jaje čytačy — padtrymać prosta
Čytajcie taksama:
«Matryca: uvaskrašeńnie». I što nam tam stvaryŭ štučny intelekt?
Film tydnia: «Pieršy sustrečny». Ramantyčnaja kamiedyja z Dženifier Łopiez — idealny varyjant, kab prosta rassłabicca
Ciapier čytajuć
«Z maskalom havary, da kamień za pazuchaju dziaržy». My daviedvajemsia ŭsio bolš novaha pra Kastusia Kalinoŭskaha — palityka, jakoha ciapier nie chapaje3030
Kamientary