Leanidu Kraŭčuku było 88 hadoŭ. Jon byŭ adnaho hoda naradžeńnia sa Stanisłavam Šuškievičam — 1934-ha, ale naradziŭsia ŭ studzieni (Šuškievič u śniežni). A voś pamierli abodva palityki, čyje podpisy stajać pad Biełaviežskimi pahadnieńniami, jakija spynili isnavańnie SSSR, amal adnačasova. Šuškievič pamior tydzień tamu, 3 maja.
Leanid Kraŭčuk pachodziŭ z Zachodniaj Ukrainy, jon naradziŭsia 15 studzienia 1934 hoda ŭ siale Vialiki Žycin Rovienskaj vobłaści.
Padčas jahonaha naradžeńnia jahonaja radzima była častkaj Polščy, adpaviedna i Kraŭčuk mieŭ u dziacinstvie polskaje hramadzianstva. Hety fakt mieŭ niemałoje značeńnie dla partyjnaj karjery, bo ludziej z takim pachodžańniem nieachvotna vyłučali na vysokija pasady, a stać 1-m sakratarom CK KPU było nierealna.
Ale ŭ časy, kali Saviecki Sajuz staŭ chilicca da raspadu, pachodžańnie, a hałoŭnaje — ideałahičnaja niezašoranaść Kraŭčuka stali jahonym nie minusam, a plusam. Navat partyjnaj zamšełaj sistemie stali patrabavacca ludzi z novym myśleńniem. A va ŭmovach nacyjanalnych respublik — i z dobrym viedańniem nacyjanalnaj movy. Dla Kraŭčuka ž, jak dla zachodnika, ukrainskaja była rodnaj, i karystańnie joj prablem nie vyklikała. Tady hetym moh pachvalicca daloka nie kožny dziaržaŭny dziejač.
Choć Kraŭčuk dasłužyŭsia ŭ kamunistyčnaj sistemie da sakratara CK KPU pa ideałohii, u kancy 1980-ch jon dobra zrazumieŭ, kudy dźmie viecier. I zamiest taho, kab dalej ruchacca pa partyjnaj linii, staŭ u 1990-m hodzie staršynioj Viarchoŭnaj Rady Ukrainy, a ŭ pačatku śniežnia 1991-ha — prezidentam.
Najbolš viadomy ŭsiamu śvietu podpis u jakaści prezidenta byŭ pastaŭleny Kraŭčukom litaralna praź niekalki dzion paśla abrańnia na pasadu — 8 śniežnia 1991 hoda ŭ Viskulach u Biełaviežskaj puščy. Navat kali b jon nie zrabiŭ ničoha bolš — heta ŭsio adno ŭniesła b jahonaje imia ŭ historyju.
Prezidentam Kraŭčuk, praŭda, byŭ nie vielmi paśpiachovym. Pad upłyvam krytyki ŭ 1994 hodzie jon pahadziŭsia na daterminovyja vybary i prajhraŭ ich byłomu premjer-ministru, a da taho dyrektaru bujnoha zavoda «Poŭdzieńmaš» u Dnieprapiatroŭsku Leanidu Kučmie. Ułada ŭ Biełarusi i Ukrainie źmianiłasia, darečy, praktyčna z roźnicaj u adzin dzień. 19 lipienia 1994-ha na pasadu zastupiŭ Leanid Kučma, a 20 lipienia — Alaksandr Łukašenka. Paśla taho historyja dvuch blizkich pa movie i kultury narodaŭ pajšła zusim roznymi šlachami.
Kraŭčuk jak palityk — asoba zusim nie adnaznačnaja. U jahonaj palityčnaj bijahrafii i paśla adstaŭki byli roznyja niečakanyja pavaroty, u rozny čas jon palityčna supracoŭničaŭ i ź Viktaram Miedźviadčukom, i ź Viktaram Janukovičam. Ale ŭ cełym, vidać, jahony ŭkład u historyju Ukrainy budzie acenieny stanoŭča. I chavać svajho pieršaha prezidenta ŭkraincy buduć, addajučy jamu ŭsie znaki pašany.
Kamientary