Va Ukrainie adnoviać vydaču dazvołaŭ na pastajannaje i časovaje pražyvańnie hramadzianam Biełarusi. Pra heta na bryfinhu ŭ čaćvier paviedamiła kiraŭnik Dziaržaŭnaj mihracyjnaj słužby Ukrainy Natalla Navumienka, piša zerkalo.io.
Čynoŭnica adznačyła, što paśla pačatku vajny ŭ mihracyjnaj słužby była «paŭza» ŭ absłuhoŭvańni hramadzian Rasii i Biełarusi. Ciapier ža jość razumieńnie adnosna dalejšaha padychodu da hramadzian Rasii, pakolki jana aficyjna pryznana ŭ Ukrainie krainaj-ahresaram.
«Nakont hramadzian Biełarusi — takoha aficyjnaha pryznańnia niama. Ale my mieli peŭnuju kolkaść asob, jakija mahli ŭjaŭlać cikavaść dla našych śpiecsłužbaŭ, tamu što niezrazumieła, čym jany zajmalisia na terytoryi Ukrainy.
Tym nie mienš, palityka adnosna hramadzian Biełarusi na dadzieny momant nie źmianiłasia. My budziem u najbližejšy čas adnaŭlać pryniaćcie dakumientaŭ i afarmleńnie dakumientaŭ hetaj katehoryi hramadzian», — skazała Navumienka.
Što tyčycca hramadzian Rasii, praciahnuła jana, to tyja ź ich, chto ŭžo maje dazvoł na časovaje abo pastajannaje pražyvańnie, praciahvajuć znachodzicca va Ukrainie na zakonnych padstavach i «mohuć bieśpieraškodna ažyćciaŭlać ujezd i vyjezd z terytoryi Ukrainy praz kantralavanyja punkty propusku». Pra biełarusaŭ ničoha admysłova nie kazałasia, ale jaŭna ŭ ich budzie prynamsi nie mienš pravoŭ, čym u rasijan.
Pry hetym, pa słovach čynoŭnicy, mihracyjnaja słužba razam z pravaachoŭnymi orhanami ciapier pravodziać «poŭny aŭdyt «taho, nakolki abhruntavana vydavalisia rasijanam vidy na žycharstva, dazvoły na imihracyju i atrymańnie hramadzianstva, kab «vyłučyć tych, chto moža vieści dziejnaść suprać Ukrainy». Zaraz viadziecca raspracoŭka adpaviednych pravavych aktaŭ.
Što tyčycca nadańnia hramadzianstva biełaruskim i rasijskim dobraachvotnikam, jakija vajujuć na baku Ukrainy, pa sproščanaj pracedury, to Navumienka adznačyła, što hetaje pytańnie jašče da pačatku vajny było paśpiachova ŭrehulavana ŭ zakanadaŭstvie.
Usiaho va Ukrainie aficyjna žyvuć bolš za 150 tysiač hramadzian Rasii i Biełarusi, dadała kiraŭnik mihracyjnaj słužby Ukrainy.
Kamientary