Na pryhraničnych AZS padniali canu na dyziel, kab zarabić na zamiežnych furach. Ale praličylisia
Na dniach na niekatorych pryhraničnych zapraŭkach dyzielnaje paliva stali pradavać pa 3,58 rubla (u 1,5 razu daražej, čym na inšych AZS krainy). Zhadvaŭsia asablivy vid DP-Ł-K5 ECO. Jon pryznačany dla zapraŭki zamiežnych fur. Žurnalisty Onliner zajechali na paru takich AZS u Breście, kab zirnuć, jak idzie handal. Akazałasia, nie vielmi.
Biełaruś u jakaści lusterkavych sankcyj uviała zabaronu na ŭjezd hruzavomu transpartu, zarehistravanaha ŭ ES. Było vyznačana niekalki miescaŭ, kudy dazvolena ruchacca takim furam dla pieračepki pryčepaŭ z hruzami. Usie hetyja miescy znachodziacca ŭ pamiežžy. Mienavita na zapraŭkach, raźmieščanych niepadalok ad miažy, i ŭviali handal novym vidam dyzielu za 3,58 rubla. Standartnaje dyzielnaha paliva na ŭnutranym rynku kaštuje 2,34 rubla.
«Biełnaftachim» u svaim kamientaryi spasyłaŭsia na pastanovu Saŭmina №276. U joj i zamacavana, što na niekatorych pryhraničnych aŭtazapraŭkach pavinny pradavać DP-Ł-K5, sort S, JESO, ci DP-Z-K5, sort F, ECO, ci DP-Z-K5, kłas 0, ECO, ci DP-Z-K5, kłas 2, JESO. Tam ža pakazany i śpis zapravak, na jakich buduć pradavać darahi dyziel.
«U pieralik patrapili 12 pryhraničnych AZS, zamacavanych za punktami propusku i vyznačanymi miescami ździajśnieńnia hruzavych apieracyj i pieračepki, zhodna z vyznačanym maršrutam ruchu, — havorycca ŭ paviedamleńni kancerna. — Cana na jaho budzie vyšejšaj za ŭzrovień roźničnaj cany na zvyčajnyja vidy dyzielnaha paliva ŭ RB».
Ale ŭčora ažyjatažu na pryhraničnych zapraŭkach nie było.
Čamu nie jeduć zapraŭlacca? Byccam by navat z ulikam padaražańnia biełaruski dyziel tańniejšy za polski. 3,58 biełaruskaha rubla za litr — heta 1,41 dalara. U susiedniaj z Brestam Polščy litr dyzpaliva kaštuje 1,65 dalara. Pa idei, tut zapaŭniać bak bolš vyhadna. U čym sprava?
«Raniej u nas tut byli čerhi. A ciapier patok rezka źniziŭsia: nas abaviazali pradavać mienavita DP-ECO. Z novaj canoj dyzielu za litr vychodzić roŭna na adzin złoty tańniej, čym u Polščy.
Adnak kiroŭcam-mižnarodnikam u «susiedziaŭ» viartajuć PDV (padatak na dadanuju vartaść). Tamu jany ŭsie rezka stali zapraŭlacca z taho boku miažy. Ź viartańniem PDV u Polščy vychodzić tańniej.
I voś hetyja dva dni pierastali da nas zajazdžać tak, jak raniej», — tłumačyli žurnalistam na zapraŭcy kala punkta propusku «Kazłovičy».
Dumku pra vyhadu za košt viartańnia PDV u Polščy paŭtaryŭ i apieratar z druhoj pryhraničnaj zapraŭki.
Pavyšanuju canu na paliva na pryhraničnych AZS uviali z 19 maja.
Kandydat u prezidenty ad kamunistaŭ zaklikaje zabrać i padzialić majomaść apazicyjanieraŭ20
Kamientary