Kraty italjanskija i biełaruskija

U Biełarusi moža razharecca futbolny skandał, padobny da italjanskaha. Piša Źmicier Pankaviec.

Hałoŭnaja futbolnaja navina leta – nie pieramoha zbornaj Italii na mundyjali, a bujny karupcyjny skandał na Apeninach. U skandale akazalisia zamiašanyja adrazu čatyry kluby seryi «A»: «Juventus», «Milan», «Lacyjo» i «Fijarencina».

Prasłuchoŭvańnie telefonnych razmoŭ vyśvietliła, što hiendyrektar «Juventusu» Lučana Modžy mieŭ mahčymaść upłyvać na pryznačeńnie arbitraŭ na matčy italjanskaha čempijanatu. Usiaho naličyli 19 takich pajadynkaŭ. 12 ź ich źviazanyja sa «Staroj syńjoraj». Jak vynik, «Juve» i paciarpieŭ najbolš – turynski klub adpraŭlajecca ŭ seryju «V». Ale nia heta najhoršaje dla jaho zaŭziataraŭ. Klub budzie mieć na starcie čempijanatu minus 17 punktaŭ. Musili raźvitacca z elitaj «Lacyjo» i «Fijarencina», ale apelacyjny sud 25 lipienia paškadavaŭ rymski i flarentyjski kluby. Jany zastajucca ŭ elicie. «Lacyjo» budzie mieć na starcie minus 11 punktaŭ, «Fijarencina» – minus 19. «Milan» – minus vosiem punktaŭ.

Hledziačy na Italiju, zhadvajecca, jak paru hadoŭ nazad spartovaja hazeta «Priessboł» vyjšła z sensacyjnym artykułam «Aperacyja «Krot»», u jakim raskazvałasia pra dahavornyja matčy ŭ čempijanacie Biełarusi, a taksama hulni nacyjanalnaj zbornaj. Aŭtary publikacyi hałoŭny redaktar Ŭładzimir Bieražkoŭ (na fota) i žurnalist Jury Doŭnar pisali, što zbornaja Biełarusi prajhrała dva dziŭnyja matčy vosieńniu 2004 hodu małdavanam i čecham. Prakuratura navat raspačała kryminalnuju spravu pavodle źviestak hazety.

Ci mahčymy padobny da italjanskaha sud u Biełarusi? Spartovy žurnalist Siarhiej Alachnovič kaža, što ŭ imaviernaść takoha pracesu vierycca ź ciažkaściu. «Ale vielmi chaciełasia b, kab heta zdaryłasia. Litaralna paru dzion tamu viarnuŭsia z Polščy, tam taksama nibyta aryštavali niekalki futbolnych sudździaŭ. Nie chaciełasia b, kab Biełaruś adstavała ad svaich susiedziaŭ. Tym bolš što Bieražkoŭ zrabiŭ usio, što ad jaho zaležała jak ad žurnalista. Ciapier užo sprava za pravaachoŭnymi orhanami».

Sam sp.Bieražkoŭ nastrojeny bolš aptymistyčna. Jon upeŭnieny, što padobny praces u Biełarusi moža pačacca ŭ najbližejšy čas: «Z dahavornymi matčami sytuacyja takaja, jak niekali ŭ SSSR z seksam: ich u nas nibyta niama, ale ž takija matčy byli, jość i buduć, kali zaraz nie razabracca z hetaj prablemaj. Hałoŭnaje ciapier – razabracca ŭ sytuacyi i pakarać vinavatych. I ja dumaju, što takoje adbudziecca, tym bolej Italija ź Niamieččynaj padaravali nam cudoŭny precedent. Pakul što «Priessboł» nia maje mahčymaści pisać pra spravu «kratoŭ», bo my nia možam parušać tajnu śledztva, ale, kali źjavicca jurydyčnaja mahčymaść, čakajcie novych materyjałaŭ. Ja dumaju, što zdarovy sens urešcie pieramoža i sud pačniecca».

Pytańnie dahavornych matčaŭ stanovicca hałoŭnaj prablemaj sučasnaha futbołu. To ŭ adnoj, to ŭ druhoj krainie stanoviacca viadomymi fakty karupcyi na futbolnych arenach. Asabliva škada zaŭziataraŭ, jakija časam navat i nie padazrajuć što źjaŭlajucca śviedkami ŭsiaho tolki dobra splanavanaha spektaklu, a nie sapraŭdnych spartovych žarściaŭ. Zło pavinna być pakaranaje.

Pavialičyć

Fota Julii Daraškievič

• 0
• 0
• 0
• 0
• 0
• 0
• 0
• 0