Ukraina rychtuje kontrnastup na Chierson, ale bitva budzie vielmi ciažkaj
Vydańnie Economist apublikavała razhornuty repartaž pra bai ŭ rajonie Chiersona, akupavanaha rasijskimi vojskami. Pa słovach nienazvanaha supracoŭnika ŭkrainskaj vajennaj raźviedki, pieradavyja padraździaleńni USU znachodziacca ŭ miežach snajpierskaha strełu ad pieršych pryharadaŭ Chiersona.
«Nastupnyja paru tydniaŭ buduć jašče bolš cikavymi», — abiacaje jon žurnalistam.
Ale aŭtary artykuła prychodziać da vysnovy, što heta nie padobna na poŭnamaštabny kontrnastup, bo asnoŭnaja ŭvaha ŭkrainskaj armii pakul na sprobach spynić nastup Rasii na ŭschodzie, dzie byŭ stračany Lisičansk.
Paŭdniovaja hrupoŭka USU nie vałodaje rekamiendavanaj dla paśpiachovaha nastupleńnia trochrazovaj pieravahaj, pišuć žurnalisty. Pa ich słovach, ukrainskija vajskoŭcy skardziacca, što im brakuje bojeprypasaŭ i piachoty.
«Naša načalstva lubić pierabolšvać pośpiechi na poli boju», — cytuje vydańnie ŭkrainskaha kamandzira z pazyŭnym «Banderas». Pavodle jaho słoŭ, situacyju mohuć źmianić pastaŭki bolšaj kolkaści zachodnich rakietnych sistem, a pakul na paŭdniovy napramak nakiravali tolki niekatoruju kolkaść amierykanskich haŭbic M777.
Pa słovach inšaha ŭkrainskaha vajskoŭca z terytaryjalnaj abarony, vojska RF pabudavała dla abarony svaich rubiažoŭ pad Chiersonam ŭzmocnienyja padziemnyja bunkiery. Taksama surjoznuju prablemu dla USU ŭjaŭlaje prysutnaść miascovych žycharoŭ, jakich akupanty vykarystoŭvajuć ŭ jakaści žyvych ščytoŭ.
Nastupu ŭkrainskaj armii taksama nie spryjaje adkryty łandšaft Chiersonskaj vobłaści, na jakim vojski akazvajucca ŭraźlivymi dla artyleryjskich udaraŭ. Pa źviestkach, na jakija spasyłajecca Economist, u mai USU panieśli značnyja straty pad siałom Davydaŭ Brod u Chiersonskaj vobłaści pry sprobie farsiravać raku Inhulec.
Kamientary