Pra top biełaruskich haradoŭ, chaładnik, futboł i zdymki ŭ kino. 20 faktaŭ pra Jahora Marcinoviča
Ranicaj 8 lipienia 2021 hoda siłaviki schapili hałoŭnaha redaktara «Našaj Nivy» Jahora Marcinoviča niepadalok ad doma ŭ čas, kali jon vyjšaŭ na špacyr z sabakam. Siońnia roŭna hod z taho samaha dnia, hod, jak Jahor znachodzicca za kratami. U sakaviku 2022-ha sud Zavodskaha rajona Minska prysudziŭ jamu 2,5 hoda pazbaŭleńnia voli. Adbyvać termin Jahora nakiravali ŭ babrujskuju kałoniju.
Kali vy daŭno čytajecie «NN», to dakładna viedajecie adzin z najpapularniejšych i daŭnišnich našych farmataŭ — «Piać faktaŭ pra». Siońnia, u hadavinu źniavoleńnia našych kaleh, publikujem viadomyja i nieviadomyja fakty pra Jahora Marcinoviča, bliskučaha žurnalista i talenavitaha redaktara i mieniedžara.
1. Jahor abjeździŭ Biełaruś uzdoŭž i ŭpopierak. Nie paśpieŭ naviedać usiaho piać rajonaŭ sa 118. Z bujnych rajcentraŭ svaimi favarytami nazyvaje Pinsk i Połack. A ź nievialikich haradoŭ — papularnyja Navahrudak ź Niaśvižam i zusim nievidavočny Mścisłaŭ. Kartu Biełarusi Jahor viedaje nastolki daskanała, što namalavaŭ jaje pa pamiaci, znachodziačysia ŭ SIZA.
2. Za tydzień da zatrymańnia ŭ čarhovym padarožžy jon paśpieŭ pažyć u numary «luks». Praŭda, było heta ŭ haścinicy Chocimska, dzie z premium-vyhod — tolki haračaja vada za paru rubloŭ dapłaty. Navat televizar narmalna nie išoŭ.
3. U časie vandrovak pa Biełarusi zaŭždy padbiraje aŭtaspynščykaŭ. Pa-pieršaje, Jahor prytrymlivajecca pryncypu «Biełarus biełarusu biełarus» i zaŭždy hatovy pryjści na dapamohu tamu, kamu hetaja dapamoha treba. A pa-druhoje, jamu zaŭždy cikava pahavaryć z čałaviekam pra žyćcio.
4. Kožny svoj dzień narodzinaŭ Jahor imkniecca sustrakać u padarožžy, idealna, kali atrymlivajecca tam, dzie jašče nikoli nie byŭ (što nie tak i prosta, kali ty abjeździŭ užo pad šeść dziasiatkaŭ krain). Naprykład, adzin ź dzion narodzinaŭ Jahor sustrakaŭ u Irłandskim mory na vostravie Men. Abjechaŭ praktyčna ŭsiu Jeŭropu — nie byŭ tolki ŭ Ispanii.
5. Maje sapraŭdny talent u pošuku biudžetnych maršrutaŭ. Jahor uvieś čas manitoryŭ prapanovy pa pieralotach i znachodziŭ supiertannyja varyjanty. Adnojčy jamu ŭdałosia ŭchapić kvitki Lvoŭ — Kijeŭ — Ńju-Jork i nazad za 158 jeŭra! Jon i sam nie moh pavieryć, što takoje mahčyma. A druhi raz nabyŭ kvitki z Paryža ŭ Braziliju i nazad za 210 jeŭra. Pryčym u kamplekcie jašče šła biaspłatnaja načoŭka ŭ Kasabłancy ŭ Maroka. Sarvaŭ džekpot Jahor, i kali ŭziaŭ kvitki z Kaŭnasa ŭ Łondan za śmiešnyja 8 jeŭra.
6. Jahor — minčuk u čaćviortym kalenie. Jaho prababula Maryja Klanoŭskaja pierasialiłasia na Hrušaŭku jašče da vajny. Jahor, jak i niekalki pakaleńniaŭ jaho siamji, taksama žyvie ŭ minskaj Hrušaŭcy.
7. Ź siamji intelihientaŭ. Babula Tamara Mušynskaja była aŭtaram školnych padručnikaŭ pa ruskaj litaratury, pa jakich dahetul vučacca biełaruskija školniki. A dziadula Michaś Mušynski — słavuty daśledčyk, najlepšy znaŭca tvorčaści Jakuba Kołasa i Maksima Hareckaha, člen-karespandent Nacyjanalnaj akademii navuk Biełarusi. Maci — teatralny krytyk, paet i libretyst Taćciana Mušynskaja.
8. Vychadziec ź liceja BDU. U fiłałahičnaj paraleli, dzie vučyŭsia Jahor, na dva kłasy było ŭsiaho dva chłopcy.
9. Skončyŭ žurfak BDU. Cikavaja detalka: na ŭručeńni dypłomaŭ u 2011 hodzie jaho vypusk zładziŭ demarš — vyrašyli nie paciskać ruku tahačasnamu dekanu Siarhieju Duboviku.
10. Treba skazać, što našaniviec cikaviŭsia žurnalistykaj z samaha dziacinstva. Jašče školnikam jon vypuskaŭ rukapisny časopis «Śviet». Praŭda, tolki ŭ adnym asobniku. Apošnija numary Jahor užo rabiŭ na kampjutary.
11. Uziaŭ udzieł u zdymkach filma «Kupała» Uładzimira Jankoŭskaha. Zaduma była cudoŭnaja: źjaŭleńnie hałoŭnaha redaktara «Našaj Nivy» 2019-ha ŭ filmie pra redaktara «NN» 1915-ha — takaja paschałka hledaču. Na žal, u vynikovuju viersiju filma scena ź Jahoram nie ŭvašła, ale režysior abiacaŭ, što jana budzie ŭ televiersii (kali jaje kaliści zrobiać).
12. Staŭ hałoŭnym redaktaram «Našaj Nivy» ŭ 28 hod. Heta absalutna nietypovaja źjava dla biełaruskich (i nie tolki) ŚMI, dzie tradycyjna pasadu hałoŭreda addajuć starejšym, bolš daśviedčanym kaleham. Jahor razarvaŭ hety šabłon i zrabiŭ sajt «NN» adnym z samych čytanych u krainie.
13. U svoj čas byŭ najlepšym rasśledavalnikam Biełarusi. Try hady zapar pieramahaŭ u adpaviednaj naminacyi samaha prestyžnaha ŭ krainie konkursu dla niezaležnych ŚMI — «Volnaje słova» — u 2015, 2016 i 2017-m. Aproč taho, Jahor atrymlivaŭ premiju «Svaboda presy» ad «Reparcioraŭ bieź miežaŭ».
14. Amatar nastołak i vialikich pazłaŭ. 1000, 2000, 3000 elemientaŭ mazaiki — vyklik, jaki Jahor zaŭždy hatovy pryniać. Jak zaciaty amatar padarožžaŭ, z takim ža zachapleńniem źbiraŭ krajavidy Rya, Łondana, Bracisłavy i mnohich inšych krain. Kali kalekcyja mazaičnych karcin stała zavialikaj, Jahor razdaŭ jaje, bo nie było jak usio zachoŭvać doma.
15. Lubimaja nastołka — taksama pra padarožžy. Nazyvajecca Ticket to Ride, vy lohka možacie adšukać jaje ŭ luboj kramie nastolnych hulniaŭ. Važnaja ŭmova — sabrać kampaniju, bo sutnaść u tym, kab zbudavać na mapie samy doŭhi maršrut. Čym bolš udzielnikaŭ — tym bolšaja asałoda ad pieramohi.
16. Jahor — vialiki amatar futboła. U škole ŭ jaho była svaja fubolnaja kamanda. Spačatku jon byŭ bramnikam, a paśla pierajšoŭ u napadzieńnie. Byŭ sapraŭdnym lidaram kamandy i praciahvaŭ hulać paŭsiul, dzie vučyŭsia.
Apošnija hady jeździŭ haniać miač dvojčy na tydzień, navat rankam u niadzielu. Zaŭsiody hulaŭ za kamandu našaniŭcaŭ u Kubku pamiaci Šyrokaha — futbolnym turniry pamiž žurnalistami.
17. Samym lubimym kłubam dziacinstva ŭ hałoŭreda byŭ italjanski «Parma», a lubimym futbalistam — Džanłuidžy Bufon (jašče da taho, jak toj staŭ zorkaj). Jahor zaŭzieŭ taksama za «Valensiju» časoŭ Haiska Miendźjety, za «Arsienał», kali tam hulaŭ Alaksandr Hleb.
18. Lubić kapacca ŭ statystycy. Heta zachapleńnie taksama pačałosia praz futboł — doma byli statystyčnyja daviedniki ź likam matčaŭ. Jahor viedaŭ najlepšych snajpieraŭ čempijanataŭ śvietu ŭ roznyja hady. Statystyku biełaruskich kłubaŭ našaniviec u dziacinstvie składaŭ uručnuju, bo tady jašče nie było internetu. Paśla heta cikavaść da ličbaŭ achapiła nie tolki futbolnuju śfieru.
19. U ježy Jahor maksimalna niepieraborlivy, ale asabliva cenić sierbskija kiłbaski, a ŭletku — chaładnik. Z desiertaŭ u topie — žele i hłazuravanyja syrki.
20. Što absalutna nietypova dla žurnalista — Jahor zusim nie pje kavu. Kali jość vybar, to voźmie biarozavik.
Padtrymajcie Jahora, napišycie jamu list:
Atrad 24, Papraŭčaja kałonija №2
vuł. Sikorskaha, 1
213800, h. Babrujsk, Mahiloŭskaja vobł.
Marcinoviču Jahoru Alaksandraviču
Kamientary