«Jon pisaŭ: ja kachaju ciabie». Były vučań lidskaj škoły raskazaŭ, jak staŭ achviaraj svajho nastaŭnika-piedafiła

Chłopčyk vučyŭsia tady ŭ 9 kłasie, jamu było 14 hadoŭ. Na pierapynku padyšoŭ nastaŭnik, paprasiŭ zajści da jaho ŭ kabiniet. «Ja dumaŭ, pa spravie», — kaža chłopiec.

Spačatku jany razmaŭlali. Potym nastaŭnik «rezka zamknuŭ kabiniet» i prymusiŭ padletka da aralnaha seksu. «Ja, viadoma, spałochaŭsia vielmi mocna. Chacieŭ kryknuć, adsunuć jaho, ale padumaŭ, što heta biessensoŭna ŭsio, tamu što jon zdaraviejšy za mianie, našmat macniejšy».

Chłopiec kaža, što byli čatyry takija vypadki: «Paśla pieršaha razu pajšli dobryja adznaki i dobraje staŭleńnie».

Nastaŭnik kožny raz klikaŭ vučnia ŭ kabiniet, kazaŭ, što pa spravie, treba niešta zabrać, adnieści. «Ja čakaŭ, kab narešcie skončyć hety kłas i źbiehčy adtul».

Nastaŭnik pisaŭ padletku, telefanavaŭ. «Jon pisaŭ: ja kachaju ciabie, ja bieź ciabie nie mahu. Ale ja viedaŭ, što heta nienarmalny čałaviek, jak takoje možna pisać dziciaci».

Chłopiec nikomu nie raskazvaŭ pra toje, što zdaryłasia, «ci mała što jon moh zrabić». «Ja dumaju, što navat kali b da nastaŭnikaŭ ja padyšoŭ i raspavioŭ, jany skazali b: jak takoje moža być, heta ž nastaŭnik». Tamu achviara maŭčała. «Chacieŭ davučycca i syści adtul».

Ź siabrami toje, što zdaryłasia, chłopiec taksama nie abmiarkoŭvaŭ. Ale kaža, što dumaje, jon nie byŭ adzinym. «Usie pacany ŭ škole dobra da jaho stavilisia, usie ŭ jaho źbiralisia, razmaŭlali», — raspaviadaje jon.

Ciapier jon spadziavajecca, što nastaŭnik paniasie pakarańnie. «Ja viedaŭ, što heta adnojčy vyjavicca, što jon tak vykarystoŭvaŭ dziaciej, tamu što, ja dumaju, heta samaje apošniaje, što moža zdarycca z čałaviekam — dziaciej hvałtavać, tamu što jany ničoha nie mohuć zrabić. Niekatoryja dzieci bajacca navat baćkam, kamuści jašče skazać pra heta, tamu što buduć hnabić».

«Heta pa-lubomu nikoli nie zabudziecca, zastaniecca da kanca žyćcia», — kaža paciarpieły.

U 2022 hodzie ŭ Biełarusi rehistrujecca ŭsplosk piedafilii. Za studzień—krasavik ustanoŭlena 390 faktaŭ złačynstvaŭ suprać pałavoj niedatykalnaści niepaŭnaletnich. Heta značyć, kožny dzień bolš za try vypadki. Dziesiać hadoŭ tamu MUS vyjaŭlała ŭ siarednim tolki 36 takich złačynstvaŭ na hod.

Ustanoŭlena 214 padazravanych i 358 paciarpiełych dziaciej.

Siarod padazravanych — siem rabotnikaŭ sistemy adukacyi, troje — achovy zdaroŭja, 64 čałavieki źjaŭlajucca biespracoŭnymi. Žanaty byŭ 51 fihurant, 163 padazravanych chałastyja abo raźviedzienyja.

• 0
• 0
• 3
• 6
• 3
• 15
• 66
• 0