Хлопчык вучыўся тады ў 9 класе, яму было 14 гадоў. На перапынку падышоў настаўнік, папрасіў зайсці да яго ў кабінет. «Я думаў, па справе», — кажа хлопец.
Спачатку яны размаўлялі. Потым настаўнік «рэзка замкнуў кабінет» і прымусіў падлетка да аральнага сэксу. «Я, вядома, спалохаўся вельмі моцна. Хацеў крыкнуць, адсунуць яго, але падумаў, што гэта бессэнсоўна ўсё, таму што ён здаравейшы за мяне, нашмат мацнейшы».
Хлопец кажа, што былі чатыры такія выпадкі: «Пасля першага разу пайшлі добрыя адзнакі і добрае стаўленне».
Настаўнік кожны раз клікаў вучня ў кабінет, казаў, што па справе, трэба нешта забраць, аднесці. «Я чакаў, каб нарэшце скончыць гэты клас і збегчы адтуль».
Настаўнік пісаў падлетку, тэлефанаваў. «Ён пісаў: я кахаю цябе, я без цябе не магу. Але я ведаў, што гэта ненармальны чалавек, як такое можна пісаць дзіцяці».
Хлопец нікому не расказваў пра тое, што здарылася, «ці мала што ён мог зрабіць». «Я думаю, што нават калі б да настаўнікаў я падышоў і распавёў, яны сказалі б: як такое можа быць, гэта ж настаўнік». Таму ахвяра маўчала. «Хацеў давучыцца і сысці адтуль».
З сябрамі тое, што здарылася, хлопец таксама не абмяркоўваў. Але кажа, што думае, ён не быў адзіным. «Усе пацаны ў школе добра да яго ставіліся, усе ў яго збіраліся, размаўлялі», — распавядае ён.
Цяпер ён спадзяваецца, што настаўнік панясе пакаранне. «Я ведаў, што гэта аднойчы выявіцца, што ён так выкарыстоўваў дзяцей, таму што, я думаю, гэта самае апошняе, што можа здарыцца з чалавекам — дзяцей гвалтаваць, таму што яны нічога не могуць зрабіць. Некаторыя дзеці баяцца нават бацькам, камусьці яшчэ сказаць пра гэта, таму што будуць гнабіць».
«Гэта па-любому ніколі не забудзецца, застанецца да канца жыцця», — кажа пацярпелы.
У 2022 годзе ў Беларусі рэгіструецца ўсплёск педафіліі. За студзень—красавік устаноўлена 390 фактаў злачынстваў супраць палавой недатыкальнасці непаўналетніх. Гэта значыць, кожны дзень больш за тры выпадкі. Дзесяць гадоў таму МУС выяўляла ў сярэднім толькі 36 такіх злачынстваў на год.
Устаноўлена 214 падазраваных і 358 пацярпелых дзяцей.
Сярод падазраваных — сем работнікаў сістэмы адукацыі, трое — аховы здароўя, 64 чалавекі з'яўляюцца беспрацоўнымі. Жанаты быў 51 фігурант, 163 падазраваных халастыя або разведзеныя.
