Ad 4 da 14 hadoŭ pazbaŭleńnia voli. Vyniesieny prysud pa spravie «BiełaPAN»
U Minskim abłasnym sudzie 6 kastryčnika abviaścili prysud pa tak zvanaj «spravie BiełaPAN».
Žurnalista i miedyjamieniedžara Andreja Alaksandrava asudzili da 14 hadoŭ turmy,
jaho žonku Irynu Złobinu — da 9 hadoŭ kałonii,
hałoŭnuju redaktarku i dyrektarku «BiełaPANu» Irynu Leŭšynu — da 4 hadoŭ kałonii,
byłoha dyrektara ahienctva Dźmitryja Navažyłava — da 6 hadoŭ kałonii.
Spravu vioŭ sudździa Viačasłaŭ Tulejka. Sud prachodziŭ u zakrytym režymie.
Palitviaźniaŭ abvinavačvali pa šerahu artykułaŭ Kryminalnaha kodeksa:
č. 2 art. 342 (arhanizacyja hrupavych dziejańniaŭ, jakija hruba parušajuć hramadski paradak, i padrychtoŭka albo navučańnie takoj dziejnaści) — Alaksandraŭ, Złobina;
č. 1 art. 356 (zdrada dziaržavie) — Alaksandraŭ, Złobina;
č. 1 art. 361-1 (stvareńnie i kiraŭnictva ekstremisckim farmavańniem) — Alaksandraŭ, Navažyłaŭ, Leŭšyna;
č. 2 art. 243 (uchileńnie ad vypłaty padatkaŭ i zboraŭ) — Alaksandraŭ, Navažyłaŭ.
Andreja Alaksandraa i Irynu Złobinu zatrymali razam 12 studzienia 2021 hoda. Praź niekalki dzion u aficyjnym paviedamleńni namieśnik ministra ŭnutranych spraŭ Hienadź Kazakievič zajaviŭ, što Alaksandraŭ i Złobina byli zatrymanyja «pa padazreńni ŭ finansavańni pratesnaj dziejnaści». Pa jaho słovach, Alaksandraŭ i Złobina sa žniŭnia 2020 hoda zajmalisia finansavańniem asob, jakija brali ŭdzieł u pratestach u Minsku, u tym liku šlacham apłaty štrafaŭ i kampiensacyi srodkaŭ na ŭtrymańnie ŭ CIP i IČU. Pavodle paviedamleńnia MUS, Alaksandraŭ z 22 žniŭnia pa 9 listapada apłaciŭ 250 štrafaŭ. Śpisy i hrošy na apłatu jamu pieradavaŭ fond BY_help.
30 červienia minułaha hoda Alaksandravu i Złobinaj vystavili novyja abvinavačańni — pavodle č. 1 art. 356 Kryminalnaha kodeksa (zdrada dziaržavie). U čym kankretna ich abvinavačvali — nieviadoma.
18 žniŭnia 2021 hodu ŭ miežach kryminalnaj spravy byli zatrymanyja Dźmitryj Navažyłaŭ i Iryna Leŭšyna paśla pieratrusu i dopytu ŭ Śledčym kamitecie. Ich spravu abjadnali sa spravaj Alaksandrava i Złobinaj.
27 žniŭnia Śledčy kamitet zajaviŭ, što raspačaŭ kryminalnuju spravu pavodle častki 2 artykuła 243 Kryminalnaha kodeksa (uchileńnie ad vypłaty padatkaŭ) u dačynieńni da Andreja Alaksandrava, Dźmitryja Navažyłava, Iryny Leŭšynaj, «a taksama inšych asob».
Čynoŭniki prydumali niezvyčajny sposab utrymać školnikaŭ ad pastupleńnia za miažu7
Kamientary
Nie spadary ciarpiły, łukašyzm treba znosić tolki siłaj