ISW: Pucin nie zacikaŭleny ŭ mirnych pieramovach i maje namier praciahvać vajnu
Rytoryka prezidenta Rasii Uładzimira Pucina śviedčyć pra toje, što jon surjozna nie zacikaŭleny ŭ mirnych pieramovach z Ukrainaj i maje namier praciahvać vajnu, zachoŭvajučy maksimalisckija mety, ličać analityki amierykanskaha Instytuta vyvučeńnia vajny (ISW).
Napiaredadni na sustrečy z pradstaŭnikami orhanaŭ biaśpieki krain SND Pucin zajaviŭ, što Ukraina «straciła suvierenitet». Na jaho dumku, ZŠA vykarystoŭvajuć Ukrainu ŭ jakaści «tarana» suprać Rasii, Sajuznaj dziaržavy Rasii i Biełarusi, ADKB i SND.
Śpikier Dziarždumy Viačasłaŭ Vałodzin uzmacniŭ hety naratyŭ, zajaviŭšy, što «Ukraina straciła zdolnaść isnavać jak dziaržava», «akupavanaja NATA» i «stała kałonijaj ZŠA».
Takija farmuloŭki niesumiaščalnyja ź pieramovami na raŭnapraŭnaj asnovie ab spynieńni ahniu, nie kažučy ŭžo ab raźviazańni kanfliktu, jaki pačała Rasija, adznačaje ISW.
Naadvarot, heta pierakanaŭča śviedčyć ab tym, što Kreml pa-raniejšamu imkniecca da vajennaj pieramohi va Ukrainie i źmienie režymu ŭ Kijevie, što, pa jaho zadumcy, pieraaryjentuje Ukrainu ad Zachadu ŭ bok Rasii, jakaja zmoža kantralavać dziejańni Kijeva.
Heta taksama pakazvaje na toje, što mety Pucina vychodziać za ramki ŭkrainskaj terytoryi, ab dałučeńni jakoj jon zajaŭlaŭ, nie kažučy ŭžo pra tyja rajony, jakija rasijskija vojski faktyčna kantralujuć, zaklučajuć analityki.
Kamientary