U jaho pracy biare ŭdzieł kiraŭnik Biełarusi Alaksandr Łukašenka.
Pasiadžeńnie Savieta kiraŭnikoŭ dziaržaŭ SND projdzie siońnia ŭ Kišyniovie. U jaho pracy voźmie ŭdzieł kiraŭnik Biełarusi Alaksandr Łukašenka.
Pavodle infarmacyi Vykankama SND, na paradku dnia samita — kala 20 prajektaŭ dakumientaŭ. Kiraŭniki dziaržaŭ, u pryvatnaści, abmiarkujuć pytańni pieraadoleńnia nastupstvaŭ suśvietnaha finansavaha kryzisu, pahłybleńnia intehracyjnych pracesaŭ u humanitarnaj śfiery i ŭ halinie arhanizacyi biaśpieki.
U liku najbolš važnych tem abmierkavańnia — prajekt Rašeńnia ab sumiesnych mierach pa pieraadoleńni nastupstvaŭ suśvietnaha finansava‑ekanamičnaha kryzisu, uniesieny pa inicyjatyvie Biełarusi. Dakumient rekamienduje ŭradam ustrymacca ad uviadzieńnia novych pratekcyjanisckich mier dla ŭłasnych tavaravytvorcaŭ, jakija pryviaduć da dalejšaha abmiežavańnia dostupu na ich unutranyja rynki tavaraŭ ź inšych krain SND. Prajekt taksama źmiaščaje daručeńnie Savietu kiraŭnikoŭ uradaŭ na čarhovym pasiadžeńni razhledzieć pytańnie ab efiektyŭnaści pryniatych mier pa pieraadoleńni nastupstvaŭ kryzisu.
U śfiery mižnarodnaj biaśpieki ŭdzielniki samita płanujuć razhledzieć prajekt Rašeńnia ab mierach pa ŭmacavańni pahraničnaj biaśpieki ŭ ramkach realizacyi Kancepcyi ŭzhodnienaj pahraničnaj palityki dziaržaŭ SND, prajekt Pahadnieńnia ab utvareńni Savieta kiraŭnikoŭ orhanaŭ dziaržaŭ — udzielnic SND pa kantroli za abarotam narkatyčnych srodkaŭ, psichatropnych rečyvaŭ i ich prekursoraŭ, a taksama baraćbie ź ich niezakonnym abarotam, paviedamlaje Vykankam SND.
Palitołahi adznačajuć, što ciapierašni samit prachodzić u niaprostych umovach.
Naprykład, kiraŭnik prahram Rasii i SND Hiermanskaha savieta pa źniešniaj palitycy Alaksandr Rar źviartaje ŭvahu na toje, što
ŭ Kišynioŭ nie pryjeduć kiraŭniki Turkmienistana, Tadžykistana, Kazachstana i Uźbiekistana.
«Kali na samit SND nie pryjazdžajuć členy ADKB — samyja dziejazdolnyja partniory Rasii, to možna havaryć ab pachavańni Sadružnaści», — cytuje palitołaha rasijski « Kommiersant'». «Kazachaŭ pakryŭdziła, kali Rasija ŭ adnabakovym paradku zajaviła, što choča ŭvajści ŭ SHA razam ź Biełaruśsiu i Kazachstanam. Tadžykistan čakaŭ ad Rasii bolšaj dapamohi i ciapier šukaje jaje na inšych paralelach. Turkmienistan nie daruje Maskvie, što taja padviała Ašchabad pry kupli turkmienskaha hazu. Uźbiekski prezident Karymaŭ tym časam dačakaŭsia, kali jamu darujuć padziei ŭ Andyžanie, i pačatkaŭ razvarot u bok Zachadu. Prezident Kyrhyzstana Kurmanbiek Bakijeŭ pryjedzie ŭ Kišynioŭ, ale tolki tamu, što 9 kastryčnika ŭ jaho zapłanavana dvuchbakovaja sustreča ź Dźmitryjem Miadźviedzievym. Adnačasova Maskva padsapsavała adnosiny ź Minskam. Biełarusi admovili ŭ rasijskim kredycie», — piša «Kommiersant'».
«Niezavisimaja hazieta» nahadvaje, što «ŭ svoj čas SND zadumvałasia jak forma razvodu». «Usie hetyja hady Sadružnaść trymałasia na ŭzajemaźviazanaj ekanomicy, i hetyja suviazi možna było b vykarystać dla stvareńnia efiektyŭnych rehijanalnych struktur, ale ŭsie sproby byli biezvynikovymi. Adzinaja ekanamičnaja prastora akazałasia mylnaj burbałkaj, arhanizacyja JeŭrAzES taksama zastałasia tolki na słovach. Nie vyklučana, što čarhovaj kazkaj dla narodaŭ stanie Mytny sajuz Rasii, Biełarusi i Kazachstana», — ličyć «NH».
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary