Chłopcu, što uciok z vojska, pahražaje 15 hadoŭ źniavoleńnia
Minskaja mižharnizonnaja vajennaja prakuratura viadzie śledstva pa spravie 20‑hadovaha A., žychara vioski Bubny, jaki 5 kastryčnika ŭciok z vajskovaj čaści №3310 unutranych vojskaŭ, što pad Minskam.
Chłopiec padazrajecca ŭ tym, što paśla ŭciokaŭ, sprabujučy skraści inšamarku, traŭmavaŭ jaje haspadara. V.a.prakurora Minskaj mižharnizonnaj vajennaj prakuratury Alaksandr Vasiluk zaznačyŭ, što kryminalnaja sprava zaviedziena pavodle art. 207 č.2 Kryminalnaha kodeksa — «Rabaŭnictva, ździejśnienaje z metaj zavałodańnia majomaściu ŭ bujnym pamiery».
Za heta pa pryhavory suda možna atrymać ad šaści da piatnaccaci hadoŭ pazbaŭleńnia voli z kanfiskacyjaj majomaści.
«Zatrymany ciapier zaklučany pad vartu. U chodzie papiaredniaha rasśledavańnia jaho dziejańniam budzie dadzienaja pravavaja acenka. Pakul kazać niešta kankretnaje rana», — skazaŭ Alaksandr Vasiluk.
Na pytańnie: ci budzie pravodzicca pravierka ŭ vajskovaj čaści №3310 unutranych vojsk, ź jakoj uciok A., i pravierka pryčyn takoha ŭčynku, Alaksandr Vasiluk adkazaŭ nastupnaje: «My ŭ chodzie śledstva, u adpaviednaści z Kryminalna‑pracesualnym kodeksam, abaviazanyja vyjavić pryčyny i ŭmovy, jakija spryjali ździajśnieńniu złačynstva. Kali buduć padstavy dla pravierki vajskovaj čaści, prakuratura ŭniasie adpaviednaje Pradstaŭleńnie jaje kamandavańniu».
Jak paviedamlałasia raniej, 20‑hadovy žychar vioski Bubny Vilejskaha rajona A. byŭ pryzvany na vajennuju słužbu letam hetaha hoda. 5 kastryčnika, znachodziačysia ŭ sutačnym naradzie ŭ vajskovaj čaści ŭnutranych vojsk, što dysłakujecca ŭ vioscy Akolica Minskaha rajona, A. samavolna pakinuŭ čaść, prychapiŭšy z saboj štyk‑nož.
Pa infarmacyi ŭpraŭleńnia ŭnutranych spraŭ Minabłvykankama, uciakač u vioscy Raŭbičy, pahražajučy haspadaru aŭtamabila «Ford» raspravaj, sprabavaŭ zabrać u jaho mašynu. Hetaha nie atrymałasia, napadalnik traŭmavaŭ vadziciela i źnik ź miesca zdareńnia.
Žychara Bubnaŭ zatrymali ŭ Minsku 6 kastryčnika.
Ciapier čytajuć
Ich Zareckaja: deputat-jabaćka Aleh Navicki kinuŭ biełaruskich inviestaraŭ na miljony dalaraŭ. Detali schiemy2
Kamientary