Хлопцу, што уцёк з войска, пагражае 15 гадоў зняволення
Мінская міжгарнізонная ваенная пракуратура вядзе следства па справе 20‑гадовага А., жыхара вёскі Бубны, які 5 кастрычніка ўцёк з вайсковай часці №3310 унутраных войскаў, што пад Мінскам.
Хлопец падазраецца ў тым, што пасля ўцёкаў, спрабуючы скрасці іншамарку, траўмаваў яе гаспадара. В.а.пракурора Мінскай міжгарнізоннай ваеннай пракуратуры Аляксандр Васілюк зазначыў, што крымінальная справа заведзена паводле арт. 207 ч.2 Крымінальнага кодэкса — «Рабаўніцтва, здзейсненае з мэтай завалодання маёмасцю ў буйным памеры».
За гэта па прыгаворы суда можна атрымаць ад шасці да пятнаццаці гадоў пазбаўлення волі з канфіскацыяй маёмасці.
«Затрыманы цяпер заключаны пад варту. У ходзе папярэдняга расследавання яго дзеянням будзе дадзеная прававая ацэнка. Пакуль казаць нешта канкрэтнае рана», — сказаў Аляксандр Васілюк.
На пытанне: ці будзе праводзіцца праверка ў вайсковай часці №3310 унутраных войск, з якой уцёк А., і праверка прычын такога ўчынку, Аляксандр Васілюк адказаў наступнае: «Мы ў ходзе следства, у адпаведнасці з Крымінальна‑працэсуальным кодэксам, абавязаныя выявіць прычыны і ўмовы, якія спрыялі здзяйсненню злачынства. Калі будуць падставы для праверкі вайсковай часці, пракуратура ўнясе адпаведнае Прадстаўленне яе камандаванню».
Як паведамлялася раней, 20‑гадовы жыхар вёскі Бубны Вілейскага раёна А. быў прызваны на ваенную службу летам гэтага года. 5 кастрычніка, знаходзячыся ў сутачным нарадзе ў вайсковай часці ўнутраных войск, што дыслакуецца ў вёсцы Аколіца Мінскага раёна, А. самавольна пакінуў часць, прыхапіўшы з сабой штык‑нож.
Па інфармацыі ўпраўлення ўнутраных спраў Мінаблвыканкама, уцякач у вёсцы Раўбічы, пагражаючы гаспадару аўтамабіля «Форд» расправай, спрабаваў забраць у яго машыну. Гэтага не атрымалася, нападальнік траўмаваў вадзіцеля і знік з месца здарэння.
Жыхара Бубнаў затрымалі ў Мінску 6 кастрычніка.
Цяпер чытаюць
«Мама, давай напішам заяву ў міліцыю, ён мяне ўжо дастаў». Маці школьніка з Брэста, які скончыў жыццё самагубствам, расказала пра цкаванне сына8
Каментары