Babka ad Azarava i zakuski ad Džypsinkova. Palityki i sielebryci padzialilisia śviatočnymi receptami
Siarod hetych receptaŭ — haračyja stravy, aryhinalnyja zakuski i desiert, pravierany pakaleńniami.
Sieladziec pad šubaj ad Aleha Dułuba, hałoŭnaha treniera FK «Lvoŭ» (Ukraina)
Bolš za ŭsio na navahodnim stale Aleh Dułub lubić sieladziec pad šubaj, tym bolš što ŭ jaho recept hetaj stravy abnoŭleny. Trenier pakaštavaŭ novuju viersiju sałaty va Ukrainie, u restaranie, dzie charčavaŭsia razam sa svajoj kamandaj. Raskazvaje, što asnoŭnaje adroźnieńnie pamiž biełaruskim i ŭkrainskim receptami — heta bolš drobnaja narezka praduktaŭ va ŭkrainskaj stravie.
Kolki brać inhredyjentaŭ? «Zvyčajna ŭsio biaru na voka, tak skazać, pa brazilskaj sistemie, u kaho što jość. U kahości, moža, bolš bulby, u kahości — burakoŭ, heta absalutna nie pryncypova. Hałoŭnaje, što atrymlivajecca prosta fantastyčnaje spałučeńnie smakaŭ, heta ź dziacinstva maja lubimaja sałata», — dzielicca Aleh.
Spačatku treba advaryć bulbu, morkvu i buraki, potym nacierci heta ŭsio na samaj drobnaj tarcy, što ŭ vas jość. Tady šuba atrymajecca «puchnataja».
Potym treba razrezać cybuliny na dźvie častki i zamarynavać — zalić ich haračaj vadoj, dadać trochi vocatu i pasalić na smak. Pakińcie cybulu ŭ vadzie, pakul vada nie stanie chałodnaj, to-bok na hadzinu-dźvie, potym treba nacierci cybulu na samuju drobnuju tarku — jana stanie padobnaj da žele.
Jašče adzin važny momant — sieladziec pavinny być bočkavy. Trenier raić, jak dastać z ryby kostki: «Biarom sieladziec chvastom da siabie, razvaročvajem na 180 hradusaŭ, ciahniem jaho za dźvie pałovy chvasta — i ŭsie kostki zastajucca na ruce».
Dalej treba narezać sieladziec vielmi drobna, jak i inšyja inhredyjenty.
Potym usio ŭkładvajem pa słajach. Spačatku idzie bulba, potym cybula, sieladziec, potym morkva i buraki. I dalej heta ŭsio pakryvajem sietačkaj z majanezu i paŭtarajem znoŭ.
«Kali ž my robim hetuju sałatu na navahodni stoł, treba jašče zrabić z ahurka hadzińnik sa strełkaj na bieź piaci chvilin poŭnač. I tady vy dakładna nie zabudziecie, što treba pakaštavać hetuju sałatu bieź piaci dvanaccać», — śmiajecca Dułub.
Śviatočny piroh ad kiraŭnika NAU i namieśnika kiraŭnika Abjadnanaha pierachodnaha kabinieta Paŭła Łatuški
Rabić hety piroh na śviaty — daŭniaja tradycyja ŭ siamji Paŭła Łatuški.
«Maju mamu Valancinu Vasiljeŭnu navučyła piačy hety piroh jaje mama Lidzija Łučanok, a ŭžo maju babulu, Lidziju Łučanok, navučyła jaje mama — Nadzieja Łučanok, — raskazvaje palityk. —
Hety piroh mama zaŭsiody piakła na dzień naradžeńnia majho baćki i na Novy hod. Jana nie ličyć recept pracajomkim i robić heta z zadavalnieńniem. Dy i naohuł, hatavać treba zaŭsiody z zadavalnieńniem!
Fota: asabisty archiŭ
Mama piakła hety piroh u babuli na vioscy ŭ Smalavickim rajonie ŭ piečy. U horadzie, viadoma, jana piakła jaho zaŭsiody na pamier blaški ŭ duchoŭcy, i na hety Novy hod u Varšavie jana abiacaje taksama śpiačy piroh.
Hetym pirahom užo častavalisia supracoŭniki Narodnaha antykryzisnaha ŭpraŭleńnia i nie raz. My taksama častavali i našych polskich siabroŭ.
Kali ja byŭ dziciem, ja vielmi lubiŭ zamiešvać ciesta i dapamahać mamie. Mama kaža, što ja ŭvieś čas sprabavaŭ jaho źjeści, ale syroje ciesta jeści nie rekamienduju. Maja dačka Jana pajšła pa maich śladach i, kali babula robić piroh, taksama sprabuje źjeści syroje ciesta. Ale znoŭ nie rekamienduju heta rabić».
Jak ža hatavać lubimy piroh Paŭła Łatuški? Padrychtujcie inhredyjenty:
- 0,5 litra małaka
- 3 jajki
- 1/3 pačka masła abo marharynu
- 300 hramaŭ cukru
- 1/3 pačka draždžej
- 2 stałovyja łyžki śmiatany
- sol
- razynki
- vareńnie dla načynki
- muka — kolki voźmie ciesta.
Prasiejcie muku. Pakładzicie droždžy ŭ ciopłaje małako i dadajcie 1 stałovuju łyžku cukru dla taho, kab jany padyšli. Potym zamiasicie z hetych inhredyjentaŭ ciesta i pastaŭcie jaho ŭ ciopłaje miesca.
Kali ciesta padydzie, jaho treba abmiać i paŭtaryć tak dva razy. Potym sfarmujcie piroh tak, jak na fota. Dla načynki možna vybirać luboje vareńnie, jakoje padabajecca. Mama Paŭła Łatuški Valancina Vasiljeŭna piače piroh ź jabłyčnym ci višniovym vareńniem. Kali vareńnie zanadta vadkaje, to paśla vykładvańnia na ciesta možna pasypać jaho kruchmałam.
Pierad zapiakańniem možacie pasypać piroh karycaj. Potym staŭcie jaho ŭ duchoŭku, razahretuju da 200 hradusaŭ, i vypiakajcie na praciahu 40 chvilin. Hatoŭnaść praviarajcie draŭlanaj pałačkaj ci zubačystkaj: kali ciesta na jaje nie čaplajecca, značyć, piroh hatovy.
Pryjemnaha apietytu!
Babka sa škvarkami ad Alaksandra Azarava, kiraŭnika «Bajpoła»
Alaksandr Azaraŭ vyrašyŭ padzialicca svaim receptam tradycyjnaj biełaruskaj stravy — babki sa škvarkami.
Kolkaść praduktaŭ, raskazvaje Azaraŭ, biarom na smak — kolki čaho chočaš, stolki i kładzieš. U jaho varyjancie atrymlivajecca kala 200 hramaŭ škvarak, 2 cybuliny, bulby stolki, kolki źmieścicca ŭ formu dla zapiakańnia.
A voś i sam recept ad Alaksandra: «Treba nacierci bulbu, dadać da jaje soli i troški kmienu. Potym pasmažyć škvarki z hrudzinki, pasalić ich i papierčyć. Pałovu škvarak razam z tłuščam dadać u naciortuju bulbu i pieramiašać, a pałovu škvarak adstavić ubok.
Dalej pakryšycie cybulu paŭkołcami i pasmažcie na patelni, źmiašajcie z druhoj pałovaj škvarak. Dalej vykładajem usio ŭ kačačnicu ci inšuju formu, prydatnuju dla zapiakańnia. Spačatku pałova bulby, potym słoj škvarak, źmiešanych z cybulaj, pryčym treba vylić u formu ŭvieś tłušč, a potym zakryvajem usio druhim słojem bulby. Razahravajem duchoŭku prykładna da 180 hradusaŭ i stavim formu ŭ duchoŭku niedzie na dźvie hadziny. Padavać babku treba sa śmiatanaj ci z małakom».
Zakuski ad błohiera Džypsinkova
Michaił Cyhankoŭ, bolš viadomy jak błohier Džypsinkoŭ, zbolšaha karystajecca ahulnapryniatymi receptami, ale ŭvodzić u ich niekatoryja madyfikacyi. Naprykład, jaho idei dazvolać vam dadać novy smak znakamitaj śviatočnaj sałacie: «Ja dadaju čyrvonuju sałodkuju cybulu ŭ krabavuju sałatu i inakš hetuju sałatu nie pryznaju. U bahaty hod možna krabavyja pałački na krevietki zamianić».
Što da haračaha, Džypsinkoŭ prapanuje zrabić miasa pa-francuzsku, ale raskazvaje, što jano ŭ jaho — sapraŭdnaje: «Nie dzie kavałak miasa i majanez z syram źvierchu. A smažanaja katleta sa smačnaha faršu, źvierchu pamidory i syr. Usio heta stavim u duchoŭku, a źvierchu — smažanaje na maśle jajka z vadkim žaŭtkom».
Zakusić usio heta možna inšaj stravaj ad znakamitaha błohiera: padsmažcie bahiet na maśle, źvierchu pakładzicie tvarožny syr, rukału i jajka pašot.
Ci jašče adzin varyjant cikavaj stravy na asnovie francuzskaha chleba: «Vaźmicie bahiet, zrežcie vierchniuju častku, dastańcie ŭsiu miakać i pakładzicie ŭnutr macarełu. Asobna pasmažcie luby farš, jaki vy lubicie, dadajcie jaho źvierchu na macarełu i natrycie źvierchu vaš lubimy syr. Pastaŭcie stravu na 10—15 chvilin u razahretuju duchoŭku».
Taksama Michaił raić pasprabavać zapiačy śvininu ŭ apielsinach ci ŭ višniovym kanficiury — błohier raskazvaje, što heta vielmi smačna.
Ralmopsy z čarnaślivam ad Aliny Koŭšyk, pradstaŭnicy pa nacyjanalnym adradžeńni ŭ Abjadnanym pierachodnym kabiniecie
Byłaja žurnalistka Alina Koŭšyk niekali viała kulinarny błoh. Dla našaj padborki śviatočnych receptaŭ jana padzialiłasia adnym z receptaŭ z hetaha błoha. Hatujem ralmopsy z čarnaślivam!
Dla hetaj stravy nam spatrebicca sieladziec, čarnaśliŭ, cybula, alej i zubačystki. Važna: sieladcu treba čas, kab dobra pramarynavacca, tamu stravu hetuju robim za paru dzion da zastolla (lepš za try).
Kali sieladziec zanadta salony, pierad hatavańniem možna jaho vymačyć u vadzie na praciahu hadzinki-druhoj. Čarnaśliŭ zalivajem haračaj vadoj na 10 chvilin, čyścim i narazajem.
Ciapier zahortvajem ralmopsy. Na vuzki kaniec file kładziom dźvie śliŭki — možna ich papiarednie razdušyć palcami, kab byli bolš płoskija i vuzkija. Zakručvajem file ŭ rulet, robim heta maksimalna ščylna. Zamacoŭvajem dźviuma zubačystkami paralelna i razrazajem na dźvie častki ŭpopierak — u kožnaj pavinna być adna zubačystka.
Kładziom u słoik trochi cybuli, potym sieladziec i potym znoŭ cybulu, zalivajem usio alejem. Na niekalki dzion pakidajem u prachałodnym miescy. I častujemsia!
«Naša Niva» — bastyjon biełaruščyny
PADTRYMAĆ
Kamientary
"dziakuj", zamiežnyja dziejačy