Jeŭraradyjo: Na Biełaruskaj AES adbyłosia apramieńvańnie piersanału
Jeŭraradyjo śćviardžaje, što na biełaruskaj AES mahło adbycca apramieńvańnie piersanału. Heta, pavodle krynic vydańnia, zdaryłasia ŭ krasaviku 2022 hoda. Aficyjnaja infarmacyja pra zdareńnie nie publikavałasia, a pa ŭnutranych kanałach pra zdareńnie nibyta paviedamlałasia ŭ pramiežku ad 17 da 29 krasavika.
Pa časie ź incydentam supaŭ «płanava-papieradžalny ramont», dziela jakoha ŭ kancy krasavika byŭ spynieny pieršy enierhabłok Biełaruskaj AES. Płanavałasia, što jon budzie doŭžycca kala 80 dzion, za jakija budzie praviedziena pieršaja ŭ historyi stancyi pierahruzka jadziernaha paliva. Adnak, nasupierak ahučanym płanam, reaktar byŭ zahłušany na paŭhoda — jaho viarnuli ŭ elektrasietki tolki 9 listapada.
Joŭraradyjo daviedałasia pra zdareńnie z-za taho, što niadaŭna ŭtvaryłasia «dzirka» ŭ sistemie elektronnych zvarotaŭ u dziaržorhany Biełarusi i što źmiest niekalkich tysiač zvarotaŭ trapiŭ u adkryty dostup. Siarod ich žurnalisty znajšli list, adpraŭleny na adras BiełAES ad imia TAA «NaftaChimDyjahnostyka», i ŭ pierapiscy čynoŭnikaŭ išła havorka akurat pra apramieńvańnie piersanału.
Vydańnie pasprabavała daviedacca padrabiaznaści ŭ adkaznych asob i pres-słužbaŭ, kab paćvierdzić ci abvierhnuć infarmacyju. U infacentry atamnaj stancyi im nie zmahli adnaznačna skazać, było apramieńvańnie ci nie, i prapanavali napisać aficyjny zapyt na temu.
Dyrektar «NaftaChimDyjahnostyki» Raman Filipaviec na niekatory čas zadumaŭsia, a potym paprasiŭ źviazacca ź im paźniej i piśmova. Potym jon prapanavaŭ sustrecca «paśla NH i śviataŭ», «padrabiazna ŭsie hetyja pytańni razabrać», «pahartać papiery i ŭsio abmierkavać».
Što tam mahło ŭ pryncypie zdarycca, Jeŭraradyjo zapytałasia ŭ ekśpierta — fizika-jadzierščyka Andreja Ažaroŭskaha.
Akramia vidavočnaj viersii, nadzvyčajnaha zdareńnia ŭ pracy atamnaj stancyi, na jaho dumku, treba razhladać i inšyja, bo sa zvarotu nie zrazumieła, pra piersanał jakoj arhanizacyi idzie havorka.
Apramienicca mahli nie tolki supracoŭniki BiełAES, ale i rabotniki samoj «NaftaChimDyjahnostyki», naprykład, padčas hama-defiektaskapii (sposab pošuku defiektaŭ z dapamohaj radyjeaktyŭnaha vypramieńvańnia). Taksama apramieńvańnie mahło adbycca ŭ čas pracy z naftavymi trubami — na ich mahčymy asadak toryju i ŭranu. To-bok, na dumku Ažaroŭskaha, heta nie abaviazkova źviazana z pracaj AES.
Pakul taksama zastajecca niezrazumiełym, ci źviazana toje apramieńvańnie z zanadta doŭhim ramontam na Biełaruskaj AES.
Kali Kanapackaja stała całkam padkantrolnaja Łukašenku?10
Kamientary
A Ožarovskij davno diepartirovan, i jeho mnienije jajca vyjediennoho nie stoit.