Što za «apramieńvańnie piersanału» mahło adbycca na BiełAES i ci jano było? Tłumačyć śpiecyjalist
Učora źjaviłasia infarmacyja ab tym, što na Biełaruskaj AES adbyłosia apramieńvańnie piersanału. Navukoviec Siarhiej Biesarab, aŭtar kanała «Navukova-Tiechničnyj·LAB-66», vykazaŭ svajo krytyčnaje staŭleńnie da naviny. Jon patłumačyŭ «Našaj Nivie», čamu nie ličyć, što na BiełAES byŭ surjozny incydent.
Chimik kaža, što, kali pabačyŭ skrynšot, jahonaja pieršaja dumka była pra toje, što hety zvarot źjaŭlajecca fejkam ci prankam. Śpiecyjalist nie razumieje, navošta dasyłać na aficyjnuju poštu BiełAES niejkaje videa z momantam apramieńvańnia.
«Vypramieńvańnie i apramieńvańnie nie bačnaje čałaviečym vokam, radyjacyja taksama nie bačnaja, tamu videa absalutna ničoha nie daść. Heta vyhladaje vielmi dziŭna», — adznačaje ekśpiert.
«Datyčna mahčymaści niejkaha incydentu z udziełam reaktarnaha abstalavańnia, to adrazu prychodzić u hałavu, što štości mahło zdarycca pry pierahruzcy paliva. Ale ž heta, jak my pamiatajem, adbyvałasia ŭ kancy leta 2022 hoda. Dy i adpracavanaje paliva pierahružajecca ŭ basiejn vytrymki (kala reaktara) z dapamohaj manipulataraŭ, dystancyjna. Ludziej tam nie moža być u pryncypie», — ličyć Biesarab.
Pa słovach chimika, śviežaje jadziernaje paliva ŭvohule nie vypramieńvaje pranikajučaj radyjacyi. Asnoŭnaja jaho častka — heta ŭran, jaki źjaŭlajecca słabym alfa-vypramieńvalnikam.
«Alfa-vypramieńvańnie zatrymlivajecca navat słojem pavietra i nijakaj niebiaśpieki dla čałavieka nie ŭjaŭlaje», — zapeŭnivaje navukoviec.
Siarod inšych varyjantaŭ Biesarab nazyvaje niejkaje zdareńnie z uciečkaj achałodžvalnika reaktara, parušeńnie hiermietyčnaści reaktarnaha kontura.
«Achałodžvajučaja aktyŭnuju zonu vada, biezumoŭna, moža vyklikać apramieńvańnie piersanału. Ale jak heta tyčycca videa?» — zadajecca pytańniem chimik.
Jon adznačaje, što radyjacyja nie bačnaja ŭ zvyčajnych umovach, tamu radyjebijałahičnyja efiekty na čałavieku prajaviacca praz tydni. I kab bačyć efiekt uździejańnia na čałavieka, videa patrebna zdymać na praciahu hetych tydniaŭ.
«Uvohule adziny mahčymy varyjant vizualizacyi radyjacyi (a značyć, i metazhodnaść videa) — heta vypramieńvańnie Vaviłava—Čarankova. Błakitnaje śviatło, jakoje ŭźnikaje, kali zaradžanyja čaścinki ruchajucca chutčej za śviatło ŭ prazrystym asiarodku. Taki efiekt možna bačyć unutry reaktara, kali adbyvajecca jahony pusk. Heta značyć, što i niejki ŭmoŭny pracaŭnik AES pavinien siadzieć u vadzie, jakaja achałodžvaje TVEŁy padčas pusku reaktara», — kaža jon.
Siarhiej Biesarab dadaje, što razumieje jak reakcyju Minenierha, tak i nasielnictva.
«Minenierha było šakavanaje tym, što z-za niejkaj drobiazi ŭźniaŭsia taki šum. Ja b asabista navat nie źviarnuŭ uvahi na toj zvarot, kali b nie taki rozhałas u ŚMI, bo z techničnaha punktu hledžańnia adlustravanaje ŭ zvarocie całkam biessensoŭnaje. Ale naturalna, što ŭ zvyčajnaha žychara Biełarusi spracavaŭ tryhier «radyjacyja». Ale toj, chto trochi razumieje u temie — nie źviernie na heta ŭvahi».
Čytajcie taksama:
«Kazać, što my ŭsie pamrem, — dakładna niapravilna». Ekśpiert pra mahčymyja nastupstvy jadziernaj vajny
Ciapier čytajuć
Miunchienskaja pramova Vensa pra novuju palityku ZŠA i čakańni ad Jeŭropy — poŭny tekst28
Kamientary