«My jašče ŭsurjoz nie pačynali». Novy pakiet sankcyj ES zakranie śfieru, jakuju raniej nie čapali
Krynicy «Našaj Nivy» ŭ dypłamatyčnym korpusie raskazali pra niuansy čarhovaha pakieta sankcyj suprać režymu Alaksandra Łukašenki, pra jaki moža być abvieščana praz try tydni.
Na finišnaj pramoj znachodzicca novy pakiet sankcyj suprać łukašenkaŭcaŭ. Što tam budzie?
«Łukašenka dumaŭ, što Zachad užo zrabiŭ usio, što moh. My chočam skazać jamu toj adzinaj movaj, jakuju jon razumieje: «My jašče navat usurjoz nie pačynali», — skazaŭ nam dypłamat adnoj z susiednich krain.
Rasija «ŭsurjoz jašče ničoha nie pačynała» — heta fraza Uładzimira Pucina, jakuju jon skazaŭ u lipieni 2022 hoda.
«Vielmi ćviordaja pazicyja ŭ Varšavy, — adznačaje inšy jeŭrapiejski dypłamat. — Jany aburanyja tym, što Łukašenka robić z polskaj dyjasparaj i jaje majomaściu ŭ Biełarusi. U adkaz na heta Polšča ŭniesła prapanovu ab zabaronie ekspartu ŭ Biełaruś tavaraŭ sielskahaspadarčaha pryznačeńnia z Zachadu», — raskazaŭ jon.
Majecca na ŭvazie nasieńnie, srodki abarony raślin, śpierma žyvioł i hetaj dalej — heta toje, čaho sama Biełaruś i Rasija nie vyrablajuć.
«Hetym pakietam my chočam pakazać, što budziem havaryć z Łukašenkam toj ža movaj, jakoj jon z nami, i stolki času, kolki treba», — kaža dypłamat.
U Jeŭropie ŭstryvožanyja destruktyŭnaj rollu Biełarusi adnosna Ukrainy: Minsk praciahvaje pravakacyjnyja manieŭry, raźmiaščaje rasijskija vojski, rychtuje rasijskuju armiju i retranśluje čałaviekanienaviśnickuju prapahandu. Akramia taho, režym krok za krokam praciahvaje varožyja adnosna susiedziaŭ i Zachadu dziejańni.
«U Jeŭropie jość razumieńnie, što raniej nie zakranutaja sankcyjami sielskaja haspadarka — krynica vializnych prybytkaŭ Łukašenki», — skazaŭ inšy surazmoŭca.
«Sapraŭdy, prapanovy sankcyj suprać pastavak nasieńnia i inšych sielskahaspadarčych tavaraŭ jość. Taksama płanujecca sinchranizavać sankcyi suprać Biełarusi z sankcyjami, jakija ŭžo dziejničajuć suprać Rasii. Prapanovy ŭžo lažać u Brusieli, ich dapracoŭka zojmie niedzie dva tydni. Paśla hetaha budzie try «dni cišyni»: kali lubaja kraina moža pahladzieć vynikovy varyjant i ŭnieści pratest. Kali pratestu nie budzie, to sankcyi buduć pryniatyja aŭtamatyčna», — patłumačyŭ praceduru dypłamat.
Masavyja represii ŭ Biełarusi zrabili režym Łukašenki taksičnym, padniać hołas suprać sankcyj nie rašajucca jaho raniejšyja łabisty. U krainie zaviedziena da 12 tysiač kryminalnych spraŭ, pravaabaroncy pryznali palitviaźniami bolš za 1400 čałaviek, dziasiatki tysiač byli vymušanyja šukać prytułak u Jeŭropie.
A adnosna piersanalij, pa infarmacyi «Našaj Nivy», sankcyi buduć uviedzieny suprać novych sudździaŭ, čynoŭnikaŭ, prapahandystaŭ i dypłamataŭ.
Ale ci nie pryviaduć novyja sankcyi da novych varožych krokaŭ Minska ŭ adkaz? Ci moža reakcyja Łukašenki na ŭdar pa jahonym lubimym dzieciščy — sielskaj haspadarcy — być asablivaj? Asabliva mocnyja represii ŭ adkaz ci ŭdar pa jeŭrapiejskich biznesach?
«Novy ŭdar uładaŭ pa jeŭrapiejskich biznesach mahčymy. U hetym płanie Łukašenka staŭ, miakka kažučy, nieracyjanalny, — kaža Alaksandr Kłaskoŭski, palityčny analityk prajekta @pozirkonline. — Ale, pa vialikim rachunku, łohika represij usio ž inšaja: Łukašenka praciahvaje ich nie «ŭ adpłatu», a najpierš kab nahaniać piermanientny strach na niełajalnych hramadzian. U Jeŭrasajuza ž taksama svaja łohika što da palityki sankcyj. Mnie zdajecca, što tam mała zvažajuć na ich upłyŭ na represii», — kaža Kłaskoŭski.
Jeŭrapiejski dypłamat, u svaju čarhu, skazaŭ «Našaj Nivie», što jany hatovyja da śpirali eskałacyi, «pakul Łukašenka nie zrazumieje, što vychad adzin — pačać damaŭlacca».
Łukašenka pamiłavaŭ eks-kiraŭnika svajoj achovy Uciuryna6
Kamientary
Budut li sankcii v otnošienii łukašienovskich karatielnych stuktur: omon, hubopik, KHB? Priznanije omon, hubopik, KHB tierrorističieskimi orhanizacijami?
Sankcii v otnošienii vsieho sporta ot łukavoho?