«Samym składanym była evakuacyja». Azaraŭ pra padrabiaznaści padryvu rasijskaha samalota ŭ Mačuliščach
Jak doŭha rychtavałasia akcyja, ci stajali za joj zamiežnyja śpiecsłužby, raskazaŭ «Radyjo Svaboda» kiraŭnik BYPOL Alaksandr Azaraŭ.
Telehram-kanał byłych siłavikoŭ BYPOL 26 lutaha ŭ 16:05 pa minskim časie paviedamiŭ, što na vajskovym aeradromie Mačuliščy pad Minskam ranicaj taho ž dnia prahučali dva vybuchi, jakimi byŭ paškodžany rasijski vajskovy samalot. Paźniej źjaviłasia infarmacyja ab mahčymym padryvie samalota dalokaha radyjołakacyjnaha vyjaŭleńnia A-50.
BYPOL paviedamiŭ, što vybuchi paškodzili piaredniuju i centralnuju častki samalota i jon dakładna ŭžo nikudy nie palacić. Adkaznaść za dyviersiju ŭ Mačuliščach uziali na siabie ŭdzielniki płana «Pieramoha».
Kiraŭnik BYPOL Alaksandr Azaraŭ raskazaŭ «Svabodzie» niekatoryja padrabiaznaści hetaj akcyi. Jon kaža, što ŭ peŭny čas paśla ŭzmacnieńnia represij i strełaŭ pry zatrymańni niekatorych partyzanaŭ BYPOL spyniŭ «rejkavuju vajnu», ale staŭ pracavać na inšych kirunkach.
«Padrychtavać akcyju zajmaje 3—4 miesiacy. Treba ž pravodzić vyviedku, pahladzieć, adkul padyści. U nas było šmat varyjantaŭ. Adna akcyja nie atrymlivajecca, biaromsia za inšuju. I voś takim čynam našy partyzany znajšli taki cikavy abjekt. Viadoma, taksama padkazvajem partyzanam, ale i jany ŭ zaležnaści ad svaich mahčymaściaŭ prapanoŭvajuć abjekty. Atrymlivajecca takaja sumiesnaja praca», — raskazvaje Alaksandr Azaraŭ.
Rasijski sajt «Caŕhrad» paviedamiŭ, što ataku na samalot A-50 ździejśniła adrazu šeść dronaŭ, bolšaść ź jakich była źbitaja na padlocie da abjekta.
«Kolkaść dronaŭ my pakul nazyvać nie budziem. Ale ja paćviardžaju, što heta była ataka dronami. Chaj śpiecsłužby sami pracujuć i pasprabujuć vyznačyć, kolki ich było», — raskazvaje Alaksandr Azaraŭ.
Pa słovach surazmoŭcy, padrychtavać evakuacyju ludziej, jakija ŭ hetym udzielničali, było samym važnym i składanym u hetaj situacyi. Azaraŭ nie choča raskazvać padrabiaznaści evakuacyi. Viadoma, što ŭ akcyi brała ŭdzieł niašmat ludziej, tamu biełaruskija śpiecsłužby nie zmahli ničoha pra jaje daznacca.
«Ja asabista pakul nie razmaŭlaŭ z udzielnikami hetaj akcyi paśla taho, jak jany ŭžo vyjechali za miažu. Jany ciapier u biaśpiecy, tak što ciapier usio narmalna».
Biełaruskija aficyjnyja ŚMI i praŭładnyja błohiery pakul nijakim čynam nie kamientujuć taho, što zdaryłasia ŭ Mačuliščach. Niama paviedamleńniaŭ, što heta fejk, ale i paćviardžeńniaŭ taksama niama.
«Im strašna — heta mocny ŭdar pa imidžy Łukašenki i rasijskaha vojska. Mnie zdajecca, što heta moža padkasić upeŭnienaść łukašystaŭ u pieramozie Rasii. Jany nie viedajuć, što rabić z hetym usim, ci davać infarmacyju», — miarkuje kiraŭnik BYPOL.
Na jahonuju dumku, ułady ciapier mohuć znajści «krajniaha». Jak mahčymuju achviaru, jon nazyvaje kamandzira vajskovaj čaści, jakoha mohuć abvinavacić u chałatnaści.
«Nie vyklučaju, što mohuć zatrymlivać aktyvistaŭ i prypisvać im udzieł u płanie «Pieramoha», — kaža Azaraŭ.
«Ludzi ŭ atačeńni Łukašenki nie patrebnyja dla takoj akcyi. Ale našy ludzi, naturalna, jość u roznych miescach i strukturach. Bieź ludziej ničoha nie zrobiš», — kaža Azaraŭ.
Isnuje taksama viersija, što za dyviersijaj mahli stajać nie biełaruskija partyzany, a ŭkrainskija śpiecsłužby.
«Kožny ahučvaje viersiju, jakaja jamu vyhadnaja. Kab my nie viedali dakładna, što heta biełaruskija partyzany, to ničoha b nie kazali. Łukašysty kažuć, što nami kirujuć śpiecsłužby zamiežnych dziaržaŭ, heta niapraŭda. Biełaruskija partyzany pracujuć samastojna. Niachaj łukašysty čakajuć praciahu», — zakančvaje kiraŭnik BYPOL.
Nahadajem, učora rankam kala 9-j ranicy na aeradromie byli čutnyja dva vybuchi. Paviedamlałasia, što paciarpieŭ vielmi kaštoŭny rasijski samalot dalokaj raźviedki DRŁV A-50, jon byŭ padarvany ŭ dvuch miescach. Usiaho takich samalotaŭ u Rasii, spraŭnych i niaspraŭnych, dzieviać. Jon vykarystoŭvaŭsia dla naviadzieńnia rasijskich rakiet na celi va Ukrainie.
Kiraŭnik abjadnańnia BYPOL Alaksandr Azaraŭ paźniej paviedamiŭ, što rasijski samalot A-50 atakavali z pavietra. Napad z dapamohaj dvuch dronaŭ učynili ŭdzielniki płana «Pieramoha», jany ciapier u biaśpiecy.
Čytajcie taksama:
U roznych rajonach krainy z ranicy stajać pasty DAI, praviarajuć mašyny
Łukša raskazaŭ, na jakich umovach adbyvałasia pamiłavańnie6
Kamientary