Vobšuk prajšoŭ 10 lutaha, ničoha z rečaŭ nie zabrali. Žurnalist na voli. Pra heta biez padrabiaznaściaŭ Hatoŭčyc napisaŭ u fejsbuku.
Jak vynikaje z paviedamleńnia, jaho praviarali na datyčnaść da «teraryzmu».
«Ja za paradak, a nie za teraryzm! Jość rečy, jakija ja kateharyčna nie prymaju. Možna navat skazać, adnaznačna nienavidžu. Prykładam, teraryzm, jaki niasie śmierć i pakuty ludziam», — napisaŭ žurnalist.
Jon dadaŭ, što słužyŭ u vojsku, byŭ aficeram zapasu, jaho vučyli stralać «pieravažna z tankaŭ, dziakavać bohu, pa mišeniach, zroblenych z tonkaha saśniaku».
«Kali kamu-niebudź z tajemnymi namierami ci dziela vysłužvańnia nadumałasia na hetaj padstavie pryviazać mianie asabista da biaźlitasna žorstkaha hvałtu, to nie treba, panovie», — napisaŭ Hatoŭčyc.
Jak vynikaje z dopisu, imavierna, dźvie hadziny jon byŭ na dopycie.
Heta čaćviorty pieratrus doma ŭ Anatola Hatoŭčyca, treci prajšoŭ hod tamu.
Anatol Hatoŭčyc — paŭstahodździa ŭ žurnalistycy. Pracavaŭ u hazietach «Sovietskaja Biełoruśsija», «Narodnaja hazieta», «Naša Svaboda» dy niekatorych inšych ahulnanacyjanalnych miedyja. Ciapier jon na piensii, apošni čas supracoŭničaje z hazietaj «Narodnaja Vola».
21 hod Hatoŭčyc uznačalvaŭ homielskuju abłasnuju arhanizacyju «Biełaruskaja asacyjacyja žurnalistaŭ», jakuju režym Łukašenki ŭ žniŭni 2021 hoda likvidavaŭ, a ŭ sakaviku 2023 pryznaŭ «ekstremisckim farmavańniem».
Paśla ataki ŭ Mačuliščach u krainie iduć pavalnyja vobšuki i zatrymańni.
Kamientary