Za pieršy z pačatku vajny padpał vajenkamata ŭ Rasii dali 13 hadoŭ kałonii
2-i Zachodni akruhovy vajskovy sud prysudziŭ 22-hadovaha ślesara Kiryła Butylina da 13 hadoŭ kałonii strohaha režymu za padpał vajenkamata ŭ Łuchavicach Maskoŭskaj vobłaści. Heta pieršy padpał vajenkamata z pačatku vajny va Ukrainie, pra jaki stała viadoma ŚMI, piša Bi-bi-si.
Dziaržabvinavačańnie raniej zapytała dla Butylina 13 hadoŭ kałonii.
Butylinu byli vystaŭleny abvinavačańni pa troch artykułach — «Terakt» (častka 2 artykuł 205 KK RF), «Vandalizm» (častka 2 artykuł 214) i «Publičnyja zakliki da ažyćciaŭleńnia terarystyčnaj dziejnaści» (častka 2 artykuł 205.2).
Padpał, u jakim abvinavačvali Butylina, byŭ ździejśnieny 28 lutaha 2022 hoda i byŭ pieršym padpałam vajenkamata paśla pačatku vajny va Ukrainie, pra jaki stała viadoma ŚMI.
Jak pisaŭ «Maskoŭski kamsamolec», 28 lutaha Kirył Butylin raźbiŭ vokny budynka vajenkamata Zarajska i Łuchavic i kinuŭ tudy dźvie butelki z «kaktejlami Mołatava». Akramia taho, jak udakładniała vydańnie, varoty vajskovaha kamisaryjata byli razmalavanyja ŭ kolery ŭkrainskaha ściaha i na ich byŭ napisany pacyfiscki łozunh.
Butylina zatrymali tolki 8 sakavika, a praź niekalki dzion jamu ŭdałosia źbiehčy z adździaleńnia palicyi.
Butylin źbiraŭsia dabracca da Litvy i atrymać tam palityčny prytułak, adnak byŭ zatrymany biełaruskimi pamiežnikami na punkcie propusku ŭ Hrodzienskaj vobłaści.
U Rasii ŭ apošnija miesiacy kryminalnyja spravy ab sprobach padpałaŭ vajenkamataŭ zavodziać pa artykułach ab terarystyčnym akcie. U pieršyja miesiacy ŭvarvańnia takija dziejańni traktavalisia pa kryminalnym artykule ab chulihanstvie.
Samy vialiki termin pa anałahičnaj spravie pakul byŭ u Nižniavartaŭsku — 12 hadoŭ za padpał vajenkamata atrymaŭ u kancy studzienia Uładzisłaŭ Barysienka.
U paniadziełak, 13 sakavika, žychar Uhliča Dzianis Papoŭ za anałahičnyja dziejańni atrymaŭ vosiem hadoŭ pazbaŭleńnia voli pavodle artykuła ab zamachu na terakt (č. 1 art. 205 KK RF).
Ciapier čytajuć
Što viadoma pra Maksima Palanskaha i Mikałaja Śvirydava — biełaruskich alpinistaŭ, jakija źnikli ŭ harach Kyrhyzstana1
Kamientary