Były biełaruski palitviazień daŭ svajo tłumačeńnie tamu, što pajšoŭ vajavać za Pucina

Alaksiej Koršun — były biełaruski palitviazień, jaki paśla vyzvaleńnia z kałonii źjechaŭ u Rasiju. Zrešty, jon žyŭ tam i da aryštu. U Rasii Koršun stvaryŭ novuju siamju. Jaho abrańnica — vałhahradskaja manikiurščyca Anžeła.

Čamu ž jon zapisaŭsia na front? Alaksiej davaŭ siabram arhumient, što nibyta stamiŭsia žyć pad rehularnymi načnymi abstrełami, jakija viadzie Ukraina.

Dakładna nieviadoma, dzie žyvuć Koršuny, ale kali ŭ samim Vałhahradzie, to jaho słovy — niapraŭda. Pa samim horadzie ŭkraincy nie bili, traplała tolki pa naftapierapracoŭčym zavodzie.

Dyk voś, pavodle słovaŭ Alaksieja, takoje žyćcio jamu nadakučyła, tamu jon, maŭlaŭ, i padpisaŭ kantrakt z rasijskim vojskam.

Na vajnie Koršun ramantuje aŭtamabili i inšuju techniku. 

Kamientar napisaŭ jašče da vybaraŭ

Kamientar, za jaki Alaksieja Koršuna asudzili ŭ Biełarusi, jon pakinuŭ u mai 2020 hoda, padčas pieršaj chvali karanavirusa. Mužčyna abvinavaciŭ biełaruskija ŭłady ŭ padmanie sa statystykaj zachvorvańniaŭ. Zatrymali jaho ŭ sakaviku 2021 hoda. Sud prysudziŭ jamu dva z pałovaj hady kałonii, a pravaabaroncy pryznali palitviaźniem.

17 vieraśnia 2021 hoda Koršunu źmiakčyli pakarańnie: kałoniju zamianili na chimiju. Jon pracavaŭ hruzčykam u sielpo, ale nieŭzabavie źbieh. Dla hetaha Koršun pakinuŭ telefon u aŭtobusie, kab nakiravać milicyju pa pamyłkovym śledzie, sam ža dabraŭsia da Viciebska, a adtul biez dakumientaŭ vyjechaŭ u Rasiju.

Niaŭdałaja evakuacyja

Spačatku Alaksiej Koršun žyŭ u Smalensku, paśla pradstaŭniki BySol dapamahli jamu pierabracca ŭ Biełharad. Adtul jaho źbiralisia vyvieźci va Ukrainu, ale 24 lutaha 2022 hoda pačałosia poŭnamaštabnaje rasijskaje ŭvarvańnie.

Razhladaŭsia i vyjezd u Hruziju, adnak hety płan sarvaŭsia. Tady biełarus pierajechaŭ u Varoniež i ŭładkavaŭsia ŭ aŭtaservis.

Paźniej u razmovach ź siabrami Alaksiej Koršun zhadvaŭ tuju niaŭdałuju evakuacyju z kryŭdaj — maŭlaŭ, takich ža ŭciekačoŭ vyvozili z Rasii ŭ Polšču i Litvu, a jaho praciahvali pieramiaščać pamiž rasijskimi haradami. 

U červieni 2022 hoda taksi, u jakim jechaŭ Koršun, spynili supracoŭniki DAI. Dakumientaŭ u biełarusa nie było. Paśla pravierki adbitkaŭ palcaŭ vyśvietliłasia, što na radzimie jon znachodzicca ŭ vyšuku.

Alaksiej Koršun paprasiŭ u Rasii časovy prytułak. Pakul razhladalisia dakumienty, jon znachodziŭsia ŭ centry ŭtrymańnia zamiežnikaŭ. Rasijskija ŭłady admovili jamu ŭ prytułku i nie stali čakać razhladu skarhi. 26 kastryčnika 2022 hoda mužčynu pasadzili na samalot da Minska, dzie prosta ŭ aeraporcie jaho čakali siłaviki.

Biełaruski sud zamianiŭ reštu chimii na kałoniju. Alaksiej Koršun adbyvaŭ pakarańnie ŭ škłoŭskaj kałonii №17 i vyjšaŭ na volu 20 žniŭnia 2023 hoda. Paśla hetaha jon druhi raz vyjechaŭ u Rasiju. Tam spačatku adkryŭ aŭtaservis, paśla zakinuŭ hetuju spravu, kupiŭ zakinuty ŭčastak, pačaŭ budavać dom i vieści dačny błoh. Ale i heta jamu nadakučyła. 

Byłaja niaviesta ź dziciom ciapier u Maskvie

Paśla pieršych uciokaŭ Koršuna siłaviki pryjšli da jahonaj tahačasnaj niaviesty i zabrali jaje telefon na pravierku. U 2022 hodzie paviedamlałasia, što pravaabaroncy dapamahli žančynie razam ź dziciom pierajechać u Litvu.

Jak stała viadoma «Našaj Nivie», paźniej jana vyjšła zamuž za inšaha mužčynu i ciapier žyvie ź siamjoj u Maskvie. Blizkich adnosin z Koršunam jana nie padtrymlivaje.

• 0
• 0
• 1
• 13
• 0
• 0
• 1
• 0