Chto pierapradaje biełaruski les u Jeŭrasajuz i ci zamiašany tut «Pinskdreŭ»
Jak u Jeŭropu praz Kazachstan i Kyrhyzstan pastupaje biełaruskaje dreva, piša «Biełaruski rasśledavalnicki centr». Śćviardžajecca, što da hetaha datyčnaja i polskaja kampanija.
Jak polskaja kampanija zakuplaje biełaruski les
Polskaja kampanija PLRBL, jakaja na papiery zajmajecca budaŭnictvam i padboram piersanału z Uschodniaj Jeŭropy, 2020 hod skončyła sa strataj u 77,5 tysiačy dalaraŭ.
U žniŭni 2022 hoda, praz paru miesiacaŭ paśla taho, jak biełaruskaje dreva trapiła ŭ niamiłaść, jana zaklučyła damovu z kyrhyzskaj kampanijaj «Admit» na pastaŭku draŭnianych pialet. Za praktyčna, paŭtara hoda, da śniežnia 2023-ha, «Admit» pavinien pastavić PLRBL paliva na 1,5 młn jeŭra.
Voś tolki les dla vytvorčaści pialet zakuplajecca ŭ Biełarusi. A potym pradajecca ŭ ES. Adzin z kiraŭnikoŭ PLRBL, biełarus Vital Lešyk navat nie chavaje hetaha.
Žurnalisty z Frontstory.pl pad vyhladam pakupnikoŭ damovilisia ab sustrečy ź im. Vykanaŭčy dyrektar PLRBL Vital Lešyk dziela patencyjnych klijentaŭ pryjechaŭ ź Białaj-Padlaskaj u Varšavu. Padčas «pieramovaŭ» Vital abmoviŭsia, što moža dapamahčy patencyjnym klijentam u kupli biełaruskich pialet.
Jak raspavioŭ vykanaŭčy dyrektar PLRBL, u ich jość kampanii nie tolki ŭ Polščy i Łatvii, ale taksama ŭ Kyrhyzstanie i Kazachstanie. Les jany kuplajuć u Biełarusi. Adtul jon idzie ŭ Kyrhyzstan abo Kazachstan, dzie pierapracoŭvajecca ŭ pialety. Tam ža afarmlajucca dakumienty, pa jakich atrymlivajecca, što syravina była kyrhyzstanskaja abo kazachstanskaja.
Rasśledavalniki taksama pad vyhladam klijentaŭ nabrali pradstaŭniku PLRBL u Biełarusi. Razmaŭlali z Aleham Janovičam. Jon paćvierdziŭ, što kampanija sapraŭdy zajmajecca pastaŭkami pialet, ale admoviŭsia abmiarkoŭvać detali pa telefonie. Skazaŭ, što baicca «padstavy».
Uładalnik PLRBL Siarhiej Azubins skazaŭ žurnalistam, što nie viedaje padrabiaznaściaŭ kožnaj ździełki, ale admaŭlaŭ, što jaho kampanija parušaje jeŭrapiejskija abmiežavańni. Sa słoŭ biznesoŭcy, jaho kampanija ŭkaraniła antysankcyjnyja zachady.
U Litvu «Admit» taksama pastaŭlaŭ draŭninu z Kyrhyzstana. Adnak pa adrasie rehistracyi kampanii vytvorčaść pialet nie adšukałasia.
PLRBL ź lipienia pa listapad 2022 hoda pastaviła ŭ Litvu amal 2 tysiačy ton pialet na 740 tysiač jeŭra, a «Admit» sa žniŭnia pa śniežań 2022 hoda — 2,5 tysiačy ton na 860 tysiač jeŭra.
Ci zamiašanyja ŭ hetych schiemach «Pinskdreŭ»?
Litaralna za miesiac da ŭstupleńnia ŭ siłu sankcyj suprać biełaruskaj draŭniny — 6 maja 2022 hoda — u Karahandzie pa adrasie aficyjnaha handlovaha pradstaŭnictva «Pinskdreŭ» pa Kazachstanie źjaviłasia novaja kampanija «Manufaktura plus». Zasnavalnikami firmy stali niejkaja Słokva Natalla Uładzimiraŭna i «Handlovy dom «Mebla KZ». A adnaasobny ŭładalnik apošniaha — chołdynh «Pinskdreŭ».
Na sajcie «Manufaktura plus» havorycca, što jana — aficyjny dyler «Siamipałacinskaha drevaapracoŭčaha zavoda №1». A heta adziny vytvorca vialikafarmatnaj faniery ŭ Kazachstanie. Atrymlivajecca, što biełaruski «Pinskdreŭ» stvaryŭ kampaniju, kab pradavać u Jeŭropu pradukcyju svajho kankurenta?
Kali ŭjavić, što «Pinskdreŭ» nie maje dačynieńnia da hetaj schiemy, to vychodzić, što polskija i litoŭskija firmy voziać draŭnianuju pradukcyju z krain, dzie jaje prosta nie moža być u vialikim abjomie.
Paśla ŭviadzieńnia sankcyj suprać Biełarusi, u Kazachstanie i Kyrhyzstanie zdaryŭsia ekspartny cud: prodažy lasnoj pradukcyi z Kazachstana ŭ ES z červienia 2022 hoda pa studzień 2023 hoda vyraśli amal u 137 razoŭ, a z Kyrhyzstana — u 12 tysiač razoŭ. Kali pieravieści ŭ hrošy, atrymajecca 58 miljonaŭ jeŭra za vosiem miesiacaŭ.
Pry hetym treba ŭličyć, što Kazachstan — heta lesadeficytnaja kraina. Tam pustyni i step. Lasami pakryta ŭsiaho 5% płoščy. I heta ŭ 8 razoŭ mienš, čym u Biełarusi, kali paličyć u pracentach. Ale ŭličvajučy, što Kazachstan pa płoščy raz u 10 bolšy, to i płošča lesu tam bolšaja, čym u Biełarusi. Praŭda, pałova hetych lasoŭ prypadaje na saksauł. Heta nievysokija drevy, čaściej za ŭsio z kryvymi stvałami, jakija ŭ asnoŭnym rastuć u pustyni. Ale, tearetyčna, z Kazachstana mahli b iści na pierapracoŭku navat biarozki.
A voś kyrhyzstanski ekspart dreva ŭ takich abjomach vyhladaje jak cud. Hetaja kraina paraŭnalnaja pa płoščy ź Biełaruśsiu, a jaje lasistaść — mienš za 6%. I ŭ asnoŭnym tam raście jełka ciań-šańskaja, a ŭ haračych umovach Ałtajskaha chrybta pieravažajuć arčovyja i pojmiennyja parody.
Ananimnaja krynica ŭ śfiery pieravozak raspaviała, što «Pinskdreŭ» adhružaje svaju fanieru ŭ h. Uralsk (Kazachstan). Tam na tavar lepiać nalepki Siamipałacinskaha drevaapracoŭčaha zavoda №1. Zatym pradukcyju hruziać u mašyny na kazachstanskich i litoŭskich numarach i adpraŭlajuć u Jeŭropu ŭ abychod sankcyj.
Admietna, što «Manufaktura plus» adhružaje ŭpakoŭki pa 27 listoŭ, a nie pa 26, jak na Siamipałacinskim drevaapracoŭčym zavodzie №1.
«Manufaktura plus» pastaŭlała fanieru litoŭskim, polskim, bałharskim, estonskim, vienhierskim i łatvijskim kampanijam.
Za niapoŭny hod hetaja kampanija tolki ŭ Kazachstanie zapłaciła padatku na dadanuju vartaść bolš za 2 młn dalaraŭ.
Rasśledavańnie rabiłasia pry padtrymcy Journalismfund.eu.
«Ja padniaŭ adnaho sa słabavikoŭ — i vypuściŭ jaho na asfalt». Desantnik Rusłan Akostka raskazaŭ, jak adsiedzieŭ 4 hady21
Kamientary