«Jak tabie nie soramna? Pasaromiejsia!» Erdahan adkazaŭ na słovy Kiemala Kyłyčdarohłu
Redžep Taip Erdahan nazvaŭ słovy svajho apanienta ŭ zmahańni za pasadu prezidenta Turcyi Kiemala Kyłyčdarohłu ab umiašańni Rasii ŭ vybary «haniebnymi».
«Ciapier jon (Kyłyčdarohłu) pačaŭ dražnić Rasiju. Jon kaža, što Rasija kiruje vybarami. Jak tabie nie soramna? Pasaromiejsia! Što ty skažaš, kali my skažam, što «Amieryka, Anhlija i Hiermanija kirujuć vybarami?».
«Spadar Kiemal napadaje na Pucina, jon napadaje na Rasiju. Ja hetaha nie ŭchvalaju. Dla nas stasunki z Rasijaj nie mienš važnyja, čym z ZŠA. A handlovyja suviazi z RF navat važniejšyja. Spadar Kiemal ničoha nie razumieje ŭ kiravańni krainaj. My starajemsia padtrymlivać suviazi z partniorami va ŭsich kutkach śvietu, my viedajem, što treba našaj krainie», — zajaviŭ Erdahan.
Try dni tamu Kiemal Kyłyčdarohłu paprasiŭ Rasiju nie ŭmiešvacca ŭ vybary.
«Darahija ruskija siabry, vy staicie za mantažami, zmovami, kantentam Deep Fake i zapisami, jakija ŭčora byli vykrytyja ŭ hetaj krainie. Kali vy chočacie praciahu našaha siabroŭstva paśla 15 maja, trymajcie ruki padalej ad tureckaj dziaržavy. My pa-raniejšamu vystupajem za supracoŭnictva i siabroŭstva», — napisaŭ palityk u tvitary.
Prezidenckija vybary ŭ Turcyi projduć zaŭtra, 14 maja. Redžepu Taipu Erdahanu, jaki kiruje krainaj faktyčna z 2003 hoda, kali staŭ premjer-ministram, supraćstaić kandydat ad abjadnanaj apazicyi Kiemal Kyłyčdarohłu, jaki ŭznačalvaje Respublikanskuju narodnuju partyju, jakuju zasnavaŭ baćka Tureckaj dziaržavy Kiemal Ataciurk. Pavodle apytańniaŭ, Erdahan sastupaje Kyłyčdarohłu. Miarkujecca, što budzie druhi tur.
Ciapier čytajuć
«Ja skazaŭ na videa, što mianie nie katujuć — na toj momant heta było praŭdaj. A praź dźvie hadziny mianie źbili». Ukrainski žurnalist dva hady pravioŭ u rasijskim pałonie — voś što jon pieražyŭ1
Kamientary