Siem pryčyn, čamu Niepał — nie najlepšaja kraina dla padarožža

Aŭtar Die Welt pieršy raz trapiŭ u Niepał u pačatku pandemii — i jamu vielmi spadabałasia padarožža pa Himałajach u adzinočku. Ciapier jon vyrašyŭ paŭtaryć hetu vandroŭku, ale atrymaŭ zusim inšy dośvied. U svaim artykule jon nazyvaje siem pryčyn, čamu straciŭ cikavaść da hetaj pryhožaj krainy la padnožža hor.

1. Turysty bolš nie mohuć chadzić pa Himałajach u adzinočku

Z 1 krasavika 2023 hoda Niepalskaja turystyčnaja asacyjacyja (NTB) zabaraniła adzinočnyja pachody ŭ Himałai. Ciapier turysty mohuć padarožničać pa Himałajach tolki ź licenzavanym hornym hidam. Takaja vandroŭka pavinna być zabraniravanaja praz turystyčnaje ahienctva.

Aficyjna havorycca, što heta zroblena dla biaśpieki haściej, bo štohod adbyvajecca niekalki źniknieńniaŭ turystaŭ i avaryj. Adnak, pa danych sajta Missing Trekker, tolki niamnohija sa zhadanych vypadkaŭ źviazanyja ź piešym turyzmam u adzinočku.

Realnaja meta zabarony, jak kaža Marcin Lavicki, — dać zaniataść bolšaj kolkaści hornych hidaŭ i takim čynam pryciahnuć bolšuju kolkaść hrošaj u śfieru turyzmu.

Adnak dla padarožnika najaŭnaść hida nie tolki ciahnie za saboj istotna bolšyja vydatki, ale i abmiažoŭvaje svabodu vybaru: mnohija hidy ŭklučajuć u svaje tury płatu za tyja hateli i restarany, ź jakimi jany supracoŭničajuć.

2. Da turystaŭ staviacca jak da «chadziačych bankamataŭ»

Niepał — adna z samych biednych krain Azii. Zvyčajny dachod składaje kala 15 tysiač niepalskich rupij — heta 105 jeŭra za šeść dzion pracy na tydzień.

Turystaŭ z Zachodniaj Jeŭropy razhladajuć u Niepale najpierš jak krynicu hrošaj. Ty nie tolki płaciš jak turyst, ale ludzi taksama pastajanna padychodziać da ciabie na vulicy i prosiać hatoŭku.

3. Vietlivaść ci biznes?

U Niepale ciažka razabracca, chto vykazvaje da ciabie ščyruju pryjaznaść, a chto prosta robić biznes.

Naprykład, vy nie možacie prajści pa centry Katmandu, nie pahavaryŭšy z handlarami. Pryčym jany buduć zapeŭnivać, što nie majuć mety štości pradać, a chočuć prosta papraktykavać anhlijskuju movu. Adnak vy navat nie zaŭvažycie, jak apyniaciesia ŭ kramie ci halerei, dzie vam pačnuć prapanoŭvać tavar. Ad takich siabroŭskich zazyvał daviadziecca adbivacca ŭvieś čas.

4. Ježa moža vyklikać prablemy sa straŭnikam i kišečnikam

Kab nie zajmieć prablem sa straŭnikam, lepš vielmi ŭvažliva padyści da vybaru kaviarniaŭ i restaracyj, dzie vy budziecie jeści.

Na žal, takaja mahčymaść u Niepale jość nie ŭsiudy: padčas pachodaŭ u hory jaduć toje, što trapicca ŭ darozie, a traplajecca nie zaŭsiody najlepšaje. Padčas piešych prahułak heta moža jašče bolš asłabić arhanizm, tamu biarycie z saboj suchi pajok.

5. Padarožža na aŭtobusie — katavańnie

Vy možacie sieści ŭ najlepšy turystyčny aŭtobus zamiest kiepskaha miascovaha abo zamović niešta nakštałt taksi — adnak heta nie admienić niebiaśpiečnych hravijnych daroh, poŭnych vyboin. Padskokvańni aŭtobusaŭ mohuć być nastolki varjackija, što vaš krokamier u smartfonie naličyć tysiačy krokaŭ.

Akramia taho, na darohach uzdymajecca pył, što vyklikaje žadańnie dobraachvotna nadzieć achoŭnuju masku. Paśla niekalkich hadzin jazdy aŭtobus całkam pakryvajecca čornym pyłam.

Pavialičyć

6. Śmiećcie

Baluča hladzieć, jak niepalcy zabrudžvajuć pryrodu, choć jany i ŭvieś čas kažuć, što hanaracca łandšaftam svajoj krainy.

Pa słovach Lavickaha, kali jon spytaŭsia ŭ maładoha žychara hornaj vioski, čamu toj tolki što vykinuŭ pustuju płastykavuju butelku la ściežki, jon pačuŭ u adkaz: «Usio dobra». Sumna, što navat maładoje pakaleńnie ŭ Niepale nie asabliva kłapocicca pra navakolnaje asiarodździe.

7. Časam hor prosta nie vidać z-za pyłu

Napeŭna, kožny, chto jedzie ŭ Niepał, choča ŭbačyć hory. Ale heta nie tak prosta, nie tamu, što ich niama, a tamu, što jany časta niabačnyja z-za zabrudžanaha pavietra.

Prynamsi, u nižnich rehijonach, pamiž 1—2 tysiačami mietraŭ nad uzroŭniem mora bačnaść abmiežavanaja, bo ŭ zasušlivyja časy pył, padniaty z hruntavych daroh, i vychłapnyja hazy zasłaniajuć krajavidy, jak husty tuman. 

U Niepale vas mohuć padścierahać i inšyja niečakanaści: pieraboi z elektryčnaściu, kiepskaje žytło i absurdny transpartny ruch z kiroŭcami-kamikadze. Na žal, usie hetyja momanty robiać adpačynak u hetaj krainie nie najlepšym varyjantam, tym bolš u śviecie šmat inšych miescaŭ z pryhožymi hornymi krajavidami.

Adnak kali vas usio ž pryciahvajuć samyja vysokija viaršyni śvietu, prosta padrychtujciesia da składanaściaŭ, jakija vas mohuć padpilnoŭvać na šlachu.

 Čytajcie jašče:

Ciapier «Biełaruskija Maldyvy» možna naviedać aficyjna

U heta składana pavieryć, ale ŭ Chielsinki jość park Lenina

Raskazvajem pra kłasnuju łakacyju ŭ centry Tbilisi, pra jakuju viedaje mała chto z turystaŭ

• 13
• 0
• 4
• 2
• 6
• 4
• 6
• 0