Aleś Puškin mučyŭsia strašnymi bolami, ale jaho nie špitalizavali. Chto načmied u turmie, dzie jon pamior

Što adbyłosia z Alesiem Puškinym?

Jak stała viadoma, mocnyja boli ŭ Alesia Puškina pačalisia jašče ŭ siaredzinie červienia. Adnak turemnyja daktary abmiažoŭvalisia kapieječnymi abiazbolvalnymi srodkami i chacieli adpravić Puškina ŭ ŠIZA za simulacyju.

Boli narastali i narastali.

Za try-čatyry dni da špitalizacyi boli ŭ Alesia Puškina stali niaścierpnymi, adnak jaho nie nakiravali ŭ haradski špital. Jamu stali davać tolki mocnyja abiazbolvalnyja srodki.

Kali b Puškina pryvieźli choć na niekalki dzion raniej, chirurhi, imavierna, jaho ŭratavali b.

Krynica, znajomaja ź situacyjaj sa śmierciu Alesia Puškina, raskazała vydańniu MOST, što adbyłosia ŭ hrodzienskim špitali, dzie pamior palitviazień.

Mastaka ŭžo ŭ nieprytomnym stanie pryvieźli ŭ balnicu 11 lipienia, na apieracyjnym stale ŭ jaho spyniłasia serca.

— Puškina pryvieźli ŭ balnicu faktyčna pry śmierci. U jaho byŭ raźvity pierytanit, byŭ sieptyčny stan i paliorhannaja niedastatkovaść. Kali skazać prostaj movaj, u jaho była dzirka ŭ straŭniku. Praktyčna nie było šancaŭ na vyratavańnie.

Prabadnaja jazva vyklikaje vostry bol, tamu pacyjent adrazu źviartajecca sa skarhami. U bolšaści vypadkaŭ u čałavieka jość niekalki dzion dla taho, kab likvidavać prablemu apieratyŭna. Kali chvoramu svoječasova dapamahčy, jon budzie žyć dalej. Paśla takich apieracyj pacyjenta zvyčajna ŭžo praz paru dzion adpuskajuć dadomu. Kali hetaha nie zrabić svoječasova, to prabadzieńnie jazvy vykliča pierytanit i sieptyčny šok.

Situacyja z Puškinym? Jaho prosta zabili ŭ turmie, inakš ja heta nie nazavu. Prosta nie mahło być takoha, kab jon nie źviartaŭsia ŭ turmie pa dapamohu, bo takaja kliničnaja karcina vyklikaje vostry bol.

Jon pavinien byŭ adčuvać mocnyja pakuty, heta jak kinžał u žyvacie, — skazaŭ surazmoŭca Most.

Surazmoŭca adznačaje, što jazva ŭ Puškina mahła ŭźniknuć praz turemnaje charčavańnie, a taksama praz adsutnaść miedycynskaj dapamohi.

Były turemny miedyk, ź jakim razmaŭlała «Naša Niva», miarkuje, što ŭ momant, kali Puškin adčuŭ mocny bol, adbyłasia pierfaracyja straŭnika, tak zvanaje prabadzieńnie jazvy (uźnikła dzirka ŭ straŭniku).

«Hety stan śmiarotna niebiaśpiečny i patrabuje nieadkładnaj špitalizacyi i chirurhičnaha ŭmiašalnictva. Chutčej za ŭsio, turemny fielčar prosta nie prydaŭ hetamu nijakaha značeńnia, bo simptomy mohuć być roznyja», — skazaŭ «Našaj Nivie» były turemny miedyk, jaki paprasiŭ, kab jahonaje imia nie nazyvali.

«Ale kali jość prabadzieńnie jazvy, to try dni — heta taki termin, što vyratavać čałavieka małaimavierna».

Śmierć Alesia Puškina, jak zaŭvažaje były turemny miedyk, — heta padstava, kab pravieści śledčyja dziejańni i ekśpiertyzy nakont dziejańniaŭ miedycynskaha dy inšaha turemnaha piersanału. Paśla hetaha možna budzie dać acenku, čyja vina była ŭ tym, što zdaryłasia.

Chto kiruje miedčastkaj turmy Hrodna

Viktar Łutcaŭ kiruje miedycynskaj častkaj hrodzienskaj turmy vosiem hadoŭ. Jamu 37 hadoŭ, jon vychadziec ź siamji vajskoŭca i pradavački. U jaho jość brat-bliźniuk, jaki taksama pracuje doktaram, pa źviestkach, jakija pieradali nam «Kibierpartyzany».

Paśla škoły Viktar Łutcaŭ z bratam pastupili ŭ Hrodzienski dziaržaŭny miedycynski ŭniviersitet. Padčas vučoby va ŭniviersitecie Viktar padpracoŭvaŭ spačatku na budoŭli, a paśla na stancyi chutkaj dapamohi. Paśla internatury hod pracavaŭ u Hrodzienskim abłasnym kliničnym centry «Psichijatryja-narkałohija».

Paśla pajšoŭ doktaram u siłavyja viedamstvy. Spačatku staŭ narkołaham u lačebna-pracoŭnym prafiłaktoryi №5, jaki znachodzicca niepadalok ad Navahrudka. Tam jamu prysvoili zvańnie lejtenanta. U 2013-m mužčyna pierajšoŭ na pasadu psichijatra-narkołaha ŭ turmu №1 i staŭ staršym lejtenantam. Praz dva hady jaho pavysili da načalnika miedycynskaj častki turmy i prysvoili ŭ 2019-m zvańnie majora.

Žonka pracuje nieŭrołaham, brat-bliźniuk — taksama doktar, jašče adzin z bratoŭ pracuje va ŭpraŭleńni justycyi ŭ Hrodnie.

«Naša Niva» sprabavała źviazacca ź Viktaram Łutcavym, ale jon nie adkazaŭ na telefanavańni i paviedamleńni.

Jak arhanizavana miedycynskaja dapamoha ŭ turmach?

Były turemny lekar, jaki doŭhi čas pracavaŭ u pienitencyjarnaj sistemie, tłumačyć, što ŭ kožnaj turmie ci kałonii jość ułasnaja miedycynskaja častka, u jakoj pracujuć miedyki, jość bazavyja prybory dla dyjahnostyki, nievialikaja łabaratoryja.

«Načalnik turmy adkazvaje za miedycynskaje zabieśpiačeńnie, to-bok ukamplektavanaść miedycynskaj častki piersanałam, i materyjalnaje zabieśpiačeńnie. A načalnik miedycynskaj častki arhanizoŭvaje akazańnie miedycynskaj dapamohi źniavolenym.

Instrukcyja akazańnia miedycynskaj dapamohi takaja: źniavoleny źviazvajecca ź lubym pradstaŭnikom administracyi, a toj pieradaje skarhu miedyku. Kali niestandartnaja situacyja zdarajecca nočču, to paviedamlajuć dziažurnamu pamočniku načalnika ŭstanovy, a jon prymaje rašeńnie — vyklikaje abo miedycynskaha rabotnika, abo chutkuju dapamohu».

Nakolki ŭkamplektavany štat miedčastki hrodzienskaj turmy, nieviadoma.

Čamu jakaść miedycynskaj dapamohi ŭ turmach nievysokaja? Tamu jość niekalki pryčyn. Niedachop daktaroŭ, stomlenaść, vyharańnie (jakoje byvaje i ŭ zvyčajnych paliklinikach).

«Taksama pytańnie lekaŭ — praź niedachop finansavańnia kuplajuć tolki biełaruskija, a jany nie ŭsim iduć. Materyjalna-techničnaja baza miedčastak taksama nie ŭ najlepšym stanie», — tłumačyć były turemny miedyk.

Jašče adnoj pryčynaj jon nazyvaje toje, što na miedykaŭ naviešvajuć šmat dadatkovych abaviazkaŭ.

«Heta i niejkija papierki, i dziažurstvy pa kałonii, i biessensoŭnaja ideałahičnaja praca», — udakładniaje jon.

Turemnym daktaram składana i tamu, što kryminalniki, asabliva recydyvisty, časta simulujuć chvaroby, kab trapić u miedčastku ci kab atrymlivać dymiedroł i inšyja srodki. U toj ža čas źvierchu ŭ SIZA i kałonii pastupajuć ukazańni žorstka abychodzicca z palityčnymi źniavolenymi, i ludzi z sadysckimi schilnaściami ź liku turemnaha piersanału atrymlivajuć adnosna palitviaźniaŭ kart-błanš.

Heta nie pieršaja śmierć viaźnia hrodzienskaj turmy z pačatku hoda. U studzieni ad pnieŭmanii tam pamior jašče adzin mastak Rusłan Karčauli.

• 15
• 0
• 2
• 6
• 4
• 15
• 177
• 0