«Samy paśpiachovy hienierał XXI stahodździa». Alaksandr Syrski — čałaviek, jaki staić za ŭkrainskim nastupam
Hienierał-pałkoŭnik Syrski ŭznačaliŭ abaronu Kijeva ŭ pačatku poŭnamaštabnaha ŭvarvańnia Rasii va Ukrainu. Byŭ adnym z kamandujučych kontrnastupam USU na Charkaŭščynie. Ciapier kiruje Uschodniaj hrupoŭkaj vojskaŭ, jakaja viadzie bai na samych haračych učastkach frontu ŭschodu Ukrainy.
Znajdzicie imia Alaksandra Syrskaha ŭ internecie — i vy ŭbačycie, što jaho nazyvajuć «samym paśpiachovym siońnia hienierałam XXI stahodździa». Heta vysokaja płanka, piša Ukrainskaja słužba Bi-bi-si.
Žurnalisty sustrakajucca ź im u sakretnym miescy pobač sa śpiecyjalnym «kamandzirskim» aŭtamabilem, na jakim jon naviedvaje svaich vajskoŭcaŭ i sočyć za dynamikaj bajoŭ. Źvierchu na aŭto staić mahutny kulamiot. A ŭnutry vialiki ekran pakazvaje niekalki videatranślacyj z pola boju.
Žurnalisty bačać na ekranie parezanyja snaradami ziemli vakoł Bachmuta, dzie ŭkraincy sprabujuć iści ŭ nastup. Adzin pytajecca ŭ hienierała, ci choča jon advajavać horad? Syrski ŭśmichajecca i kaža: «Tak, viadoma. Sprabujem».
Ale navat jon pryznaje, što doŭhačakany nastup Ukrainy idzie pavolniej, čym čakałasia.
«My chacieli b atrymać chutkija vyniki, — tłumačyć hienierał. — Ale heta praktyčna niemahčyma».
Pavodle jaho słoŭ, Rasija dobra akapałasia, pabudavała abarončyja zbudavańni i zaminiravała terytoryju. «Tamu naša prasoŭvańnie sapraŭdy idzie nie tak chutka, jak chaciełasia b», — kaža hienierał.
Ale, na dumku Syrskaha, Ukraina maje adnu vidavočnuju pieravahu.
«Adzinstva vajennaha kiraŭnictva i davier sałdat adzin da adnaho — mocny bok našaj armii».
Heta rezka kantrastuje z rasijskaj vajskovaj ijerarchijaj, jakaja, zdajecca, pakutuje ad unutranych razładaŭ, a starejšych aficeraŭ adchilajuć ad kamandavańnia.
Hienierał Syrski karystajecca vialikaj pavahaj u vojsku. Jon impanuje svajoj metanakiravanaściu, rašučaściu i chitraściu, śpić usiaho čatyry z pałovaj hadziny ŭ sutki. Adzinaja rełaksacyja — heta štodzionnyja zaniatki ŭ trenažornaj zale.
Ukraina zajaŭlaje, što adbiła kala 30 kvadratnych kiłamietraŭ terytoryi na poŭdzień i poŭnač ad Bachmuta.
Namieśnica ministra abarony Ukrainy Hanna Malar paviedamiła, što rasijanie chutka apynucca ŭ pastcy ŭ Bachmucie. Ale rasijskaja artyleryja praciahvaje bić pa ŭkrainskich pazicyjach usiaho za try kiłamietry ad horada.
Sałdat 57-j bryhady Alaksandr kaža, što situacyja «napružanaja».
Jon pakazvaje na vialikuju varonku ad rasijskaha snarada, jaki ŭpaŭ usiaho za niekalki mietraŭ ad jahonaha akopa. Nieŭzabavie žurnalistam taksama davodzicca biehčy ŭ schovišča.
Dalej, u hłybokim bunkiery, kamandziry kaardynujuć kroki pa advajavańni Bachmuta.
Dva miesiacy tamu, kali žurnalisty byli tut apošni raz, Ukraina hublała svaje pazicyi i była pad pahrozaj akružeńnia. Ciapier usio źmianiłasia.
Pałkoŭnik Alaksandr Bakulin, kamandzir 57-j bryhady, kaža, što ciapier prablemy ŭ rasijan.
Jon padkreślivaje, što nie niedaaceńvaje praciŭnika, — rehularnyja rasijskija vojski, ź jakimi jon ciapier maje spravu, nie padobnyja da najmitaŭ PVK «Vahnier» Jaŭhiena Pryhožyna, jakim udałosia zachapić horad u pačatku hetaha hoda.
Vahnieraŭcy, ź jahonych słoŭ, «byli niazručnym voraham… Jany zabivali dziela zabojstva».
«Kali my prykładziom namahańni, Bachmut možna akružyć», — kaža pałkoŭnik Bakulin. I dadaje, što, nasupierak ahulnapryniataj vajennaj teoryi, straty jaho padraździaleńnia padčas nastupu mienšyja, čym padčas abarony horada.
Ruch napierad, choć jon i pavolny, pavyšaje bajavy duch, tamu «lahčej pieranosić straty», jak tłumačyć Bakulin.
Upieršyniu na Uschodnim froncie kolkaść ukrainskich vojskaŭ adpaviadaje kolkaści rasijan — kala 160 tysiač. Ale ŭkrainskaja artyleryja pa-raniejšamu sastupaje ŭ kolkaści rasijskaj.
Ukraina ŭžo atrymała kasietnyja bomby, ab pastaŭkach jakich raniej paviedamlaŭ prezident ZŠA.
Ci paŭpłyvaje heta na dynamiku bajoŭ?
Pałkoŭnik Bakulin kaža, što kasietnyja bomby nieabchodnyja, kab «nanieści maksimalnuju škodu varožaj piachocie». «Čym bolš piachoty zahinie tut, tym bolš pytańniaŭ budzie ŭ ich svajakoŭ da rasijskaha ŭrada».
Ale dadaje: «Usie našy prablemy na poli boju kasietnyja snarady nie vyrašać».
Jon taksama pryznaje, što heta sprečnaja zbroja: «Kali b rasijanie jaje nie ŭžyvali, mahčyma, sumleńnie i nam by nie dazvoliła».
Hienierał Syrski paćviardžaje, što amierykanskija kasietnyja bojeprypasy prybyli va Ukrainu i buduć hatovyja da vykarystańnia ciaham niekalkich dzion.
Žurnalisty taksama bačyli pastaŭlenyja ZŠA haŭbicy M777 na pazicyjach vakoł Bachmuta.
Pa słovach Syrskaha, viartańnie horada budzie mieć nie tolki simvaličnaje značeńnie. Bachmut taksama maje stratehičnaje značeńnie jak varoty ŭ inšyja klučavyja harady rehijona.
«Našy ludzi čakajuć pieramoh. Im patrebnyja choć nievialikija, ale pieramohi», — reziumuje hienierał.
«Ja taja jašče pamidorka». Što Ihar Tur piša ŭ telehram-čatach sa svajho asnoŭnaha akaŭnta8
Kamientary